Amosa
8 KUA na ko te Atu ra ko Iehova i te akakite anga mai kiaku, e i na, e kete kai para.
2 Kua tuatua maira aia, E Amosa, eaa taau e akara ra? Kua karanga atura au, E kete kai para. Kua tuatua mairā Iehova kiaku, ko te openga teia kua tae ki toku ra au tangata ia Iseraela kare oki au e aere tapaepae akaou na vao ia ratou.
3 E riro oki te au peʼe i te are ariki ra ei kakaoa anga i te reira rā, te tuatua maira te Atu ra ko Iehova. E manganui te au turuma, ei te au ngai katoa ka akaruke aere uaʼi, auraka e koma.
4 E akarongo mai i teia, e te aronga i apuku ua i tei putaua ra, e kia akakoreia te ao i te enua nei, I te tuatua anga e,
5 Aea e kore ei te marama ou nei, kia oki tatou i te sitona? e te sabati oki, kia akakitekite tatou i te sitona? i te akaiti anga i te epha, e te sekela kia maata, e te akatareva ke anga i te aite akateiaa i te pikikaa;
6 Kia oko tatou i te ao ki te ario, e tei putaua ki nga tamaka e rua ra; e kia oko i te sitona akarukeia ra.
7 Kua taputou a Iehova ki te meitaki o Iakoba: Kare rava atu e ngaro iaku ta ratou katoa ra au ravenga.
8 Kare ainei te enua nei e ngaruerue i te reira, e e aue oki te aronga katoa e noo ki rungao ra? kare ainei e maranga katoatoa ra ki runga mei te kauvai ra? kare ainei e taia, e e roroma ki raro mei te kauvai i Aiphiti ra?
9 E kia tae ki te reira rā, te tuatua maira te Atu ra ko Iehova, ei te avatea e akaopu ei au i te rā, e ei te rā rangi marie e akapoiri ei au i te enua.
10 E akariro au i ta kotou au pokai ei aue anga, e ta kotou au peʼe ei evakaku anga, e tuku oki au i te kakau paoa ki runga i te au taukupu katoa; e te pakiko ki runga i te au mimiti katoa; e akariro oki au i te reira mei te aue anga i te tamaiti anau tai ra, e tona openga ei rā kino maata ra.
11 I na, te tuatua maira te Atu ra ko Iehova, e tae maira te au rā, e unga atu ei au i te onge ki runga i te enua; kare ra i te onge kai, e te kaki i te vai, i te akarongo ra i te tuatua na Iehova.
12 E uoa aere ua te tangata mei tetai tai e tae rava atu ki tetai tai, e mei te pae i apatokerau e tae rava atu ki te itinga o te rā, i te oro aere anga na runga na raro i te kimi anga i te tuatua na Iehova, e kare rava ra e kitea e ratou.
13 I taua rā ra e rere a mate uaʼi te au paretenia purotu ra, e te au tangata ou katoa ra, i te kaki vai;
14 Tei taputou ki te ara a Samaria, e tei tuatua e, Te ora ra to atua, e Dana; e, Te vai ra taau akonoanga, e Bereseba; ka inga ra oki ratou, e kare rava atu e tu akaou mai.