Levitiku

10 KUA rave iora nga tamariki a Aarona, ko Nadaba raua ko Abihu, i te āriki ai tetai e tetai, e kua tuku iora i te ai ki rungao, e kua tuku iora i te atinga kakara ki rungao, e kua apai atura i te ai noa ra ki mua i te aroaro o Iehova, i tei kore i akaueia mai e ia.

2 Kua puroro maira te ai no ko mai ia Iehova ra, pou takiri iora raua, e mate iora raua ki mua i te aroaro o Iehova ra.

3 Kua karanga aturā Mose kia Aarona, Ko ta Iehova teia i tuatua maira, ka na ko mai ei ra e, Ka akatapuia au e te aronga e akavaitata mai kiaku ra, e ka akakakāia au ki mua i te aroaro o te tangata katoatoa ra Te muteki ua rā Aarona.

4 Kua karanga aturā Mose kia Misaela raua ko Elizapana, i nga tamariki a te metua o Aarona ra ko Uziela, na ko atura kia raua, Ka aere mai ana, e apai i to korua taeake i mua i te ngai-tapu nei ki vao mai i te puakapa. 5 Kua aere atura raua i vaitata, kua apai atura ia raua ki vao mai i te puakapa i roto i to raua piriaro; i ta Mose i tuatua maira.

6 Kua karanga aturā Mose kia Aarona, e kia Eleazara, e kia Itamara, i nga tamariki ana ra, Auraka e kiritiia to kotou pare, auraka oki e aeae i to kotou kakau; ka mate aea kotou, e ka rokoia katoaia aea te au tangata ravarai nei e te riri: na to kotou ai taeake ra, na te ngutuare katoa o Iseraela, e aue i teianei ai i ka, ta Iehova i tutungi nei.

7 Auraka ra kotou e aere ki vao i te ngutupa o te Are uipaanga, ka mate aea kotou: tei runga oki ia kotou te manongi akatainu a Iehova ra. Kua akapera oki ratou i ta Mose i tuatua maira.

8 Kua tuatua mairā Iehova kia Aarona, na ko maira,

9 Auraka ei wina e te kava kona e inumia e koe, e taau tamariki katoa, kia aere kotou ki roto i te Are uipaanga ra, ka mate aea kotou: ei akonoanga mou ïa e ope ua ake to kotou au uki ra;

10 Kia taka ia kotou te mea tapu e te mea tapu kore, e te mea viivii e te mea viivii kore;

11 E kia apii kotou i te tamariki a Iseraela i te au akonoanga ravarai ta Iehova i tuatua mai kia ratou ia Mose ra.

12 Kua karanga aturā Mose kia Aarona, e kia Eleazara, e kia Itamara, ki nga tamariki toe nana ra, Ka rave i te atinga kai i tei toe i te au atinga ai a Iehova ra, ka kai ei ma te akaopue kore i te pae atarau ra; e mea tapu roa oki ïa te reira:

13 Ei roto i tetai ngai tapu kotou kai ei, no te mea ko taau ïa taunga i akonoia, e te tuanga na taau tamariki i akonoia, no te au atinga ai a Iehova ra: kua akaueia mai oki au nei.

14 E te uma i ruruia ra, e te ūā mua i apaiia ki runga ra, ka kai kotou i te reira i tetai ngai viivii kore; ko koe, e taau au tamariki tamaroa, e te au tamaine katoa naau; ko taau ïa tuanga i akonoia, e te tuanga i akonoia na taau au tamariki, i akatakaia no roto i te au atinga au a te tamariki a Iseraela.

15 Ko te ūā mua i apaiia ki runga ra, e te uma i ruruia ra, e te au atinga ai, te tongaua ra, ta ratou e apai mai e ruru ei atinga ruru ki mua i te aroaro o Iehova; naau ïa, e na taau tamariki katoa, ei mea akono tamouia ïa; i ta Iehova i akaue maira. 16 Kua kimi matatio rā Mose i te puakanio tarangaara, e i na, kua ka i te ai: e riri akera aia ia Eleazara raua ko Itamara, i nga tamariki toe a Aarona ra, e kua karanga atura aia,

17 Eaa i kore ei kotou i kai i te tarangaara ki roto i te ngai tapu ra, e mea tapu roa oki te reira, e mea orongaia mai oki na kotou kia maranga ia kotou te ara a te uipaanga, kia apai kotou i te tapokiangaara na ratou ki mua i te aroaro o Iehova ra?

18 I na, kare to reira toto i apaiia ki roto i te ngai-tapu ra; e kai oki kotou e tikaʼi i roto i te ngai-tapu ra, taku i karanga atu na. 19 Kua tuatua mairā Aarona kia Mose, I na, kua apai ratou i ta ratou tarangaara i teianei rā, e ta ratou atinga karakaratio, ki mua i te aroaro o Iehova: e kua rokoia mai au e teianei mea: naringa au i kai i taua tarangaara nei i teianei rā, ka riro aina ei mea tau kia Iehova ra?

20 E kite akerā Mose i te reira, maru atura aia.