2 Paraleipomeno

31 E OTI rava akera te reira, kua aere iora Iseraela katoa i tae mai i reira ki te au oire i Iuda, e kua vavaʼi i te au tiki, e kua tipu i te au Asetoreta, e kua uri i te au ngai teitei ki raro, e te au atarau i Iuda ravarai e Beniamina ra, e Epheraima katoa oki e Manase, e pou rava akera ia ratou. Kua oki anake iora te tamariki a Iseraela, te tangata katoa ki to ratou uaorai kainga, ki to ratou au oire.

2 Kua akono atura oki a Hezekia i te au pupu taunga, e te ngati Levi ki ta ratou ra au angaanga; i te kau taunga ngati Levi i ta ratou rave anga, ei apai i te au atinga karakaratio, e te atinga au, e rave i te angaanga, ei akameitaki, e te akapaapaa i te au ngutupa o te puakapa o Iehova.

3 Kua akataka iora oki aia i tetai pae no roto i ta te ariki uaorai apinga; no te atinga karakaratio, no te atinga karakaratio, popongi e to te aiai, e no te atinga karakaratio sabati, e no te au marama ou, e no nga oroa i akonoia ra, i tei tataia i roto i te ture a Iehova.

4 E kua akaue atura aia i to Ierusalema e apai mai i ta te kau taunga e ta te ngati Levi ra tuanga na ratou, kia akamaroiroi ratou i te ture a Iehova.

5 E tae atura taua akauenga ra, kua tari maira te tamariki a Iseraela i te popo o te sitona, e mea maata, te wina, e te inu, e te meli, e tei tupu katoa i te kainga ra; e te ngauru i te au mea katoa ra, kua tari maira ratou ki roto e manganui.

6 E ko Iuda oki, e te au tamariki a Iseraela, i noo i roto i te au oire o Iuda ra, kua apai katoa mai ratou i te ngauru o te puakatoro, e te mamoe, e te ngauru i te au mea tapu ra, i akatapuia na to ratou Atua na Iehova, e kua akaututua aereia ïa e ratou ra.

7 Tei te toru o te marama te tari angaia taua au ututua ra, e tae akera ki te itu o te marama i akaoti ei.

8 E tae mairā Hezekia, e te aronga mamaata, e kite akera i taua au ututua ra, kua akameitaki atura ia Iehova, e ia Iseraela i tona iti-tangata.

9 Kua ui akerā Hezeki te kau taunga e te ngati Levi i taua au ututua ra.

10 E na Azaria taunga maata no te ngutuare o Zadoka i karanga atu kiaia, na ko atura, Mei te tari anga mairai te au tangata i te apinga ki roto i te are o Iehova, e kai maata ta matou, e e maata oki te toe: kua akameitaki mai oki a Iehova i tona tangata; e te toenga, koia teianei mea maata.

11 Kua akaue aturā Hezekia kia akonokonoia nga pia apinga i roto i te are o Iehova; kua akonokono oki ratou,

12 E kua apai maira ratou i te apinga tini i orongaia maira, e te ngauru, e te au mea i akatapuia ra ma te pikikaa kore; e ko Kononia te ngati Levi te tutara i rungao, e ko tona taeake ko Simei te tauturu.

13 E ko Iehiela, e ko Azazia, e ko Nahata, e ko Asahela, e ko Ierimota, e ko Iozabada, e ko Eliela, e ko Isemakia, e ko Mahata, e ko Benaia,e akamaroiroi ïa i raro ake ia Kononia, e te taeake nona ra ia Simei, ko tei akaueia mai ïa e te ariki ra e Hezekia, e te tutara i te are o te Atua ra ko Azaria.

14 E ko Kora, te tamaiti a Iamina, te ngati Levi ra, te tiaki ngutupa i te pae i te itinga o te rā ra, tei runga ïa i te au apinga oronga ua na te Atua ra, ei tua i te au apinga a Iehova, e te au mea tapu rava ra.

15 E ei tauturu iaia, ko Edene ïa, e ko Miniamina, e ko Iosua, e ko Semaia, e ko Amaria, e ko Sekania; no ratou te taoonga i te apai i tetai tuanga na to ratou ai taeake i roto i te au oire o te kau taunga ra, i to ratou ra au pupu, ko te aronga maata e te aronga iti:

16 E te au tane ra, e na te toru o te mataiti i te tatau e ko runga atu, (te aronga i tae mai ki roto i te are o Iehova taua tuanga no te reira rā,) no ta ratou angaanga e rave i to ratou ra au pupu;

17 Te kau taunga e te au ngati Levi, kua tatauia ïa i te ngutuare o to ratou ai metua, ko tei tae ki te mataiti tai takau e ko runga atu, i ta ratou rave anga i to ratou au pupu;

18 E ta ratou au tamariki katoa ra, ta ratou au vaine, e ta ratou au tamaroa, e ta ratou au tamaine, i roto i te uipaanga katoa ra, kua tatau katoaia ïa; no te aronga i akatapu rava ia ratou uaorai i ta ratou au taoonga.

19 E ta te tamariki a Aarona, te kau taunga ra, tei roto i te au kainga i te au tapere i te pae o to ratou au oire, i te au oire katoa ra, kua apai te au tangata i akakiteia te ingoa ra i ta ratou tuanga, ta te aronga tamaroa i roto i te kau taunga, e te au ngati Levi i tatau katoaia to ratou anau-anga i roto ia ratou ra.

20 Kua akaperā Hezekia e pini ua ake Iuda katoa ra, i te akono anga i te mea meitaki e te mea tika, e te pikikaa kore, i mua i te aroaro o tona Atua o Iehova.

21 E te au angaanga ravarai tana i akamata i te rava no te are o te Atua ra, e no te ture, e no te au akauenga, i te kimi anga o tona Atua, kua akonoia e ia ma te ngakau katoa, i manuiaʼi tana ra.