Salamo

9 E AKAMEITAKI rai au ia koe, e Iehova, i toku ngakau katoa nei; e akakite au i te au angaanga taka ke katoa naau ra.

2 E rekareka au ma te umere parua ia koe; e imene akameitaki au i toou ingoa, e Tei Teitei,

3 Ka akaokiiaʼi toku au enemi ra, kua inga ratou, e mate atura ki mua i to aroaro ra.

4 Kua akatika mai oki koe i te tuatua-tau e te tuatua-tika naku ra; kua noo koe ki runga i te terono ma te akono i te tuatua-tika.

5 I akamura ana koe i te au etene, kua akapou i te aronga kino; kua tangaro roaia e koe to ratou au ingoa e tuatau ua atu.

6 Kua pou te au enemi i te taitaipakokoia; kua tairipotiia e koe te au oire; kua kore katoa te maara anga ia ratou!

7 Ka tu rā Iehova e rimua: kua akonokono aia i tona terono ei akava anga.

8 Kua akava oki aia i to te ao nei ma te tuatua-tika, ka akatikaoru ua aia i ta te au tangata ma te apa kore.

9 E akapuanga oki a Iehova no te aronga i takinga-kinoia, e akapuanga i te tuatau tumatetenga.

10 Te aronga i kite i toou ra ingoa, ka irinaki ia koe; ko tei kimi oki ia koe ra, e Iehova, ko tei kore roa ïa e akarukeia e koe ra.

11 E imene akametaki kia Iehova, tei noo i Ziona; e akakite i te au tangata ra i tana i rave ra:

12 Ko tei kimi i te toto ra, ko tei manako ïa ia ratou; e kare ei ngaropoina iaia te aue o tei tairoia ra.

13 E aroa mai koe iaku, e Iehova e, ka akara mai i toku nei tumatetenga i te aronga i riri mai iaku nei, e tei akatu mai iaku mei te ngutupa mai o te mate ra;

14 Kia akaope au i taku akameitaki ia koe i te au ngutupa o te tamaine o Ziona: e rekareka au i te ora naau ra.

15 Kua topa te au etene ki roto i te vaarua i koia e ratou: kua ii to ratou vaevae ki roto i te kupenga i uunaia e ratou uaorai.

16 Te kitea rā Iehova i te tuatua-tau tana i rave ra; e te taii anga i te tangata kino i te angaanga i raveia e tona uaorai rima. Higaiona. Sela.

17 Ka uriia te tangata kino ki te po, te pa enua ravarai kare i manako i te Atua ra.

18 Kare oki te tangata rikiriki e akangaropoina roaia atu; kare oki te irinaki anga o te tangata ao ra e akangere roaia.

19 Ka tu, e Iehova; auraka kia tupu ta te tangata: kia akavaia te au etene ki mua i toou uaorai aroaro.

20 E tuku, e Iehova, i te mataku ki runga ia ratou; kia kite te pa enua e, e tangata ratou. Sela.