Salamo

138 E AKAMEITAKI au ia koe ma toku ngakau katoa nei; e imene akameitaki au ia koe ki mua i te aroaro o te au atua. 2 E akamori tika atu au i to nao tapu ra, ka akameitaki atu ei i toou ingoa, no toou aroa e no taau tuatua-mou; kua akamaata oki koe i taau tuatua e kua maata i to ingoa katoa ra. 3 I te rā i kapiki atu ei au ra, kua tuatua mai koe kiaku; kua oronga mai koe i te maroiroi ki toku vaerua. 4 Ka ope te au ariki katoa o te enua nei i te akameitaki ia koe, e Iehova; kia kite ratou i te tuatua a to vaa. 5 Ka imene ratou i te au arataa o Iehova; e kakā maata oki to Iehova. 6 Teitei ua rai a Iehova, ka akono mairai aia i tei akaaka; kareka te nengonengo ra, ei te mamao ke aia e akara mai ei. 7 Me aere ua au na roto i te tumatetenga ra, ka akamaroiroiia mai au e koe ra, na to rima e tāpu i te riri o toku au enemi ra; e na to rima katau uaorai e akaora iaku. 8 Na Iehova e akatupu mai i teia iaku nei: ka tu, e Iehova, to aroa e rimua: auraka ana koe e akaruke i te angaanga a to rima.