Amosa

5 E AKARONGO mai kotou i teianei tuatua, taku e tuatua nei ia kotou, teianei peʼe tangi, e te ngutuare o Iseraela e.

2 Kua inga te paretenia o Iseraela, kare aia e tu akaou ki runga; kua akatiraaia aia ki runga i tona uaorai enua, kare ua e tangata i te akatu iaia ki runga.

3 Te na ko maira oki te Atu ra ko Iehova; Ko te oire i tataki tai tausani i te aere anga ki vao, okotai ua ona anere te ka toe; e ko tei taki tai anere i te aere anga ki vao, okotai ona ngauru te ka toe, no te ngutuare o Iseraela.

4 Te na ko maira oki a Iehova ki te ngutuare o Iseraela, E kimi kotou iaku, e e ora ïa kotou.

5 Auraka ra e kimi ia Betela; auraka oki e aere ki Gilagala; auraka rai e na roto ka aere ei ki Bere-seba; e riro oki Gilagala ei tuikaa, e riro oki Betela ei mea puapinga kore.

6 E kimi kotou ia Iehova, e e ora ïa kotou, ko te oro viviki mai aea aia mei te ai ra ki runga i te ngutuare o Iosepha; e pou iora ïa, e kare ua e tangata i Betela i te tamate atu.

7 E kotou, e tei akariro i te tuatua-tau ei rakau maamaa, e tei titiri i te tuatua-tika ki raro i te one,

8 E kimi iaia tei anga ia Matariki e ia Oriona; tei akariro i te maru-mate ei popongi; tei akariro i te ao ei poiri mei te po; ko tei kapiki ki te au ngaru o te moana e kua riringi i te reira ki runga i te enua ra; ko Iehova tona ingoa:

9 Ko tei tuku viviki mai i te mate ki runga i tei ririnui, tae maira oki te mate ki runga i te punanga.

10 Te riri nei ratou iaia i tei ako mai i te ngutupa ra, e te akaviivii nei iaia i tei tuatua ma te tiratiratu.

11 E tenana, no te mea, te takatakai na kotou ki runga i te tangata rikiriki, e te umuumu nei kotou i tana sitona ei tāunga: patu ua rai kotou i te are i te toka taraiia ra, kare kotou e noo ki roto; tanu ua rai kotou i te kainga vine memeitaki ra, kare rai kotou e inu i to reira wina.

12 Kua kite oki au i ta kotou au tareva ke anga e manganui, e ta kotou au ara kua maata: i te akareionga anga i te tangata tuatua-tika, i te rave anga i te oko, e te akaoki anga i te tangata rikiriki i te ngutupa ra.

13 E muteki uaʼi te tangata pakari i taua tuatau ra; no te mea e tuatau kino te reira.

14 Ka kimi i te meitaki, auraka te kino, kia ora kotou; ei vaitata katoao te Atua Sabaota ra ko Iehova ia kotou i reira, mei ta kotou i karanga ra.

15 Kia rikarika i te kino, e kia inangaro i te meitaki, e akatinamou i te tuatua-tau i te ngutupa; peneiake, ko te Atua Sabaota ra, ko Iehova, ko te aroa mai i te toenga o Iosepha.

16 E teianei, te na ko maira te Atu, te Atua Sabaota ra, ko Iehova: E aue anga tei te au ngai atea katoa ra; e tuatua oki ratou i te au arataa katoa ra, Aue! aue! E ka tiki oki ratou i te tangata tanukai, ei aue, e te aronga i karape i te eva, ei aue.

17 E aue anga anake oki tei te au kainga vine katoa ra, e na roto oki au ia koe te aere, te tuatua mairā Iehova.

18 E ae oki kotou to tei inangaro i te rā o Iehova! eaa no kotou taua rā no Iehova ra? e poiri tei taua rā ra, kare e mārama.

19 Mei te mea e te oro ra te tangata i te liona, e te aravei maira te daba iaia; e kua tomo aia ki roto i te are, e kua irinaki tona rima ki runga i te ngaika, ooniia maira aia e te ovi.

20 Kare ainei e poiri te rā o Iehova e kare e mārama; te poiri tangotango oki, e kare rava e manga kakā i roto?

21 E mea riri naku, e mea viivii naku ta kotou aronga pokai; kare rai oki au e ongi atu i to kotou au rā tapu.

22 Apai ua mai kotou i te au atinga karakaratio, e ta kotou au atinga kai, kare au e mareka atu; e kare rai au e akono i te au atinga au i ta kotou au puaka matu ra.

23 Apai ke atu i taau au peʼe turituri; kare oki au e akarongo atu i te tangi o to au nabala.

24 Kia taʼe ua maira te tuatua-tau mei te vai ra, e te tuatua-tika mei te vai taʼe viviki.

25 Kua apai ainei kotou i te au atinga e te apinga naku, i te medebara e a akera ngaru anga i te mataiti, e te ngutuare o Iseraela?

26 Kua apai rai kotou i te puakapa o to kotou Moloka, e ia Kiuna, i to kotou au tiki, te etu o to kotou atua ra, ta kotou i anga no kotou uaorai.

27 E teianei, e apai ke atu au atu ia kotou ei tuikaa e kia topa mai Damaseko, te tuatua mairā Iehova, ko te Atua Sabaota ra tona ingoa.