Malaki

1 TE totou ra i te tuatua a Iehova kia Iseraela ia Malaki ra.

2 I inangaro ana au ia kotou, te tuatua mairā Iehova. E te tuatua maira kotou, Teiea toou inangaro anga mai ia matou? Te tuatua mairā Iehova, Kare ainei a Esau i te tuakana o Iakoba?

3 I inangaro ra au ia Iakoba, Kare ra au i inangaro ia Esau, e kua akariro au i tona ra au maunga ei ngai pou, e tana ra tuanga ei au nooanga medebara ua.

4 No te mea, te tuatua nei a Edoma, Kua pou tatou, e patu akaou ra tatou i te au ngai pou; te na ko mairā Iehova Sabaota ra, E patu ïa ratou, e naku e uri ki raro; e e tapaia ratou, Te kotinga o te kino ra e, Te au tangata i riri tamouia e Iehova e tuatau ua atu.

5 E kite oki o kotou mata, ka tuatua oki kotou e, Kia akamaataiā Iehova mei te kotinga o Iseraela mai.

6 E akangateitei te tamaiti i te metua tane, e te tavini i tona atu: e teianei, e Metua au nei, teiea taua akangateitei noku ra? e e Atu oki au ra, teiea au i te mataku angaia, ko ta Iehova Sabaota ïa tuatua ia kotou, e te kau taunga, ko tei akavaavaa i toku nei ingoa; e te tuatua nei ra kotou, Teiea matou i te akavaavaa anga i toou ingoa?

7 Te apai nei kotou i te kai viivii ki runga i taku nei atarau; e e tuatua mai na kotou, Teiea iora matou i te akaviivii anga ia koe? ko kotou i karanga e, E mea vaavaa te kaingakai a Iehova.

8 E kia apai kotou i te matapo ei atinga, kare ainei i te mea kino? e kia apai kotou i te pirikoki e tei makiia, kare ainei i te mea kino? e tenana ka apai atu na to tutara; e mareka ainei aia ia koe? e kiteia mai ainei koe? te tuatua mairā Iehova Sabaota ra.

9 E teianei, ka pure kotou ki te Atua i tenana, kia tangi mai aia ia tatou; na to kotou rima oki teia: ka kite mai ainei aia ia kotou? te tuatua mairā Iehova Sabaota ra.

10 Koai ia kotou te tika kia topiri ua i te au pa? kare oki kotou e tutungi tutaki kore ua i te ai ki runga i taku atarau. Kare au i mareka ia kotou, te tuatua mairā Iehova Sabaota ra, kare oki au e āriki atu i tei apaiia mai e to kotou rima. 11 E maata oki toku nei ingoa i rotopu i te ou enua ra, mei te itinga mai o te rā e tae rava atu ki tona opunga; e e apaiia mai te atinga kakara ki toku nei ingoa i te au ngai katoa, e te atinga viivii kore ra; ka maata oki toku nei ingoa i rotopu i te au enua ra, te tuatua mairā Iehova Sabaota ra.

12 Kua viivii ra te reira ia kotou, ko kotou i karanga ra e, Kua viivii te kaingakai a Iehova, e tei apaiia ra koia te kai i rungao ra, e mea vaavaa ïa.

13 Kua tuatua katoa oki kotou, I na, e mea roiroi teia! e kua akaviivii kotou i te reira, te tuatua mairā Iehova Sabaota ra; e kua apai mai kotou i tei aeaeia ra, e tei pirikoki, e tei makiia ra; e kua apai mai oki kotou i te atinga: e āriki atu ainei au i te reira i to kotou na rima? te tuatua mairā Iehova.

14 Kia taumaaia ra te pikikaa, te vai ra te toa i roto i tana anana, e kua tia iora, e kua apai te mea viivii na te Atu: e Ariki maata oki au nei, te tuatua mairā Iehova Sabaota ra, e matakuia oki toku nei ingoa i roto i te pa enua ra.