Iona

1 KUA tae maira te tuatua a Iehova kia Iona te tamaiti a Amitai, na ko maira,

2 Ka tu, ka aere ki te oire maata ra ki Nineve, e tutu aere i te reira, no te mea kua tae rava mai to ratou kino ki mua i taku aroaro nei.

3 Tu akerā Iona ki runga e oro ki Taresisa, mei te aroaro atu o Iehova; aere atura aia ki raro i Iopa ra, e kite atura i tetai pai te aere atura ki Taresisa, e kua oko atura, e kua tomo atura ki roto i te reira ra, e aere katoa ma ratou ki Taresisa mei te aroaro atu o Iehova.

4 Kua tuku maira rā Iehova i tetai matangi maata ki runga i taua tai ra, maata atura oki te uriia i taua tai ra; manakoia iora e ka ngaa taua pai ra.

5 Mataku iora te aonga pai, kua tautopa iora ratou ravarai ki tona atua, ki tona atua, e kua titiri atura ratou i te au apinga i runga i te pai ki raro i te tai, kia maranga te pai ki runga: karekā Iona kua aere aia ki raro i te pae ki roto roa i te pai, kua tiriapuia aia e te moe.

6 Kua akavaitata maira te rangatira pai kiaia, e kua na ko maira kiaia, Eaa koe i moe tinainai uaʼi? Ka tu, ka tautopa ki to Atua; peneiake ko te manako mai te Atua ia tatou, kia kore tatou e mate.

7 Kua tuatua ratou ravarai tetai ki tetai; Ka aere mai, ka tua tatou i te kelero, kia kite tatou e naai te ara, i rokoiaʼi tatou e teia kino nei. Kua tua kelero iora ratou, e kua riro atura te kelero ia Iona.

8 Kua karanga atura ratou kiaia: Ka akakite mai ana koe i tenana kia matou i te mea i rokoiaʼi tatou e teianei kino. Eaa toou na toroa? e noea roa mai koe? koai toou na enua? e no teaa pae tangata koe?

9 Ku tuatua maira aia kia ratou: E ngati Ebera au, e te mataku nei au ia Iehova, i te Atua o te rangi ra, ko tei anga i te tai e te enua marō nei.

10 Maata rava akera to te au tangata mataku, e kua karanga atura kiaia, No te aa ua akera koe i akaperaʼi? Kua kite oki taua au tangata ra e, i oro mai aia mei te aroaro mai o Iehova, nana uaorai oki i akakite mai kia ratou.

11 Kua karanga atura ratou kiaia, E akapeea atu matou kia koe, kia marino te tai ia matou nei? te aere nei oki te tikitiki anga o te tai ki te maata anga.

12 Kua tuatua maira aia kia ratou, E rave mai kotou iaku, ka titiri iaku ki raro i te tai; ei reira e marino ei te tai ia kotou: kua kite oki au e noku i rokoiaʼi kotou e teianei uriia maata.

13 Akamaroiroi iora te au tangata i te oe e oki akaou ki uta; kare ra i rauka ia ratou, no te mea te aere ra te tikitiki anga o te tai ki te maata anga ia ratou.

14 E kua kapiki atura ratou kia Iehova, e kua na ko atura: E tenana, e Iehova! te pati atu nei matou kia koe, auraka matou e mate i te ara a teianei tangata; auraka ei toto ara kore kia io mai ki runga ia matou nei, kua rave oki koe, e Iehova, i taau i inangaro ra.

15 Kua rave iora ratou ia Iona, e kua titiri atura ki raro i te tai: kore akera te tikitiki anga o taua tai ra.

16 Maata rava atura te mataku o taua aronga tangata ia Iehova, e kua apai ratou i tetai atinga kia Iehova, e kua tia iora ratou.

17 Kua akonoia e Iehova tetai ika maata ei apuku ia Iona. E i roto oki a Iona i te kopu o taua ika ra, e toru po, e toru oki ao.