Genese

11 OKOTAI ua oki o to te ao katoa nei reo, okotai oki tuatua.

2 E te aere ua tetai papaki o ratou, mei te itinga o te rā mai, e kite atura ratou i tetai ngai mania ka ua i te enua ra ko Sinara; e noo iora ratou ki reira.

3 E kua tuatua iora ratou ki tetai ki tetai, Taki aere tatou, e anga i te karakaraea, ka taʼu ei ki te ai. Ko ta ratou ïa toka ko te karakaraea, e te hemera ei ngaika na ratou.

4 E kua na ko iora ratou, Taki aere tatou, ka patu i tetai oire no tatou, e tetai punanga, kia tae ua atu te take ki runga i te rangi ra, kia kitea to tatou ingoa; ko te pueurikiriki ke ua atu aea tatou e pini ua ake te enua katoa nei.

5 E kua eke mairā Iehova ki raro e akara i taua oire ra, e taua punanga ra, e patuia e te tamariki a te tangata ra.

6 E kua tuatua iorā Iehova, I na, okotai ua ïa aronga nei, e okotai rai oki reo to ratou katoa ra; e te rave nei oki ratou i taua mea nei; e kare rava oki ratou e kore i te rave i tei akakoroia e ratou ra:

7 Taki aere tatou ki raro, e akatareva ke i to ratou reo i reira, kia kore tetai e kite i to tetai ra reo.

8 I reira to Iehova akapueurikiriki ke anga ia ratou, ki runga i te enua katoa e pini ua ake: e akapaki akera ratou i te patu i taua oire ra.

9 I tapaiaʼi oki tona ingoa ko Babela; no te mea, i reira to Iehova akatarevake anga i te reo o te tangata katoa; e kua akapueurikiriki ke a Iehova ia ratou, ki runga i te enua katoa e pini ua ake i reira.

10 Teia te tuatua ia Sema: Okotai akera o Sema anere anga i te mataiti, e anau akera tana, ko Arepakada, i muri ake i te diluvi ka rua akera mataiti:

11 E ka rima akera o Sema anere anga i te mataiti i te ora anga, i muri ake i tana anau anga ia Arepakada, e anau akera te tamariki tamaroa, e te tamariki tamaine.

12 E ka toru akera ngauru e rima ara to Arepakada mataiti i te ora anga. e anau akera tana, ko Sala:

13 E noo iorā Arepakada i muri ake i tana anau anga ia Sala, e a akera anere, e toru ara te mataiti, e anau akera te tamariki tamaroa, e te tamariki tamaine.

14 E ka toru akera ngauru to Sala mataiti i te ora anga, e anau akera tana, ko Ebera:

15 E noo iorā Sala i muri ake i tana anau anga ia Ebera, e a akera anere, e toru ara te mataiti, e anau akera te tamariki tamaroa, e te tamariki tamaine.

16 E ka toru akera ngauru e a ara to Ebera mataiti i te ora anga, e anau akera tana, ko Pelega:

17 E noo iorā Ebera i muri ake i tana anau anga ia Pelega, e a akera anere, e toru ngauru te mataiti, e anau iora te tamariki tamaroa, e te tamariki tamaine.

18 E ka toru akera ngauru to Pelega mataiti i te ora anga, e anau akera tana, ko Reu:

19 Noo iorā Pelega i muri ake i tana anau anga ia Reu, e rua akera anere, e iva ara te mataiti, e anau akera te tamariki tamaroa, e te tamariki tamaine.

20 E ka toru akera ngauru, e rua ara, to Reu mataiti i te ora anga, e anau akera tana, ko Seruga:

21 E noo iorā Reu i muri ake i tana anau anga ia Seruga, e rua akera anere, e itu ara te mataiti, e anau akera te tamariki tamaroa, e te tamariki tamaine.

22 E ka toru akera ngauru to Seruga mataiti i te ora anga, e anau akera tana, ko Nahora:

23 E noo iorā Seruga i muri ake i tana anau anga ia Nahora, e rua ïa anere te mataiti, e anau akera te tamariki tamaroa, e te tamariki tamaine.

24 E ka rua akera ngauru, e iva ara to Nahora mataiti i te ora anga, e anau akera tana, ko Tera:

25 E noo iorā Nahora i muri ake i tana anau anga ia Tera, e okotai akera anere, okotai ngauru ma iva te mataiti, e anau akera te tamariki tamaroa, e te tamariki tamaine.

26 E ka itu akera ngauru anga to Tera mataiti i te ora anga, e anau akera tana, ko Aberama, e ko Hanora, i ko Harana.

27 Teia te tuatua ia Tera: E anau akera ta Tera, ko Aberama, e ko Hanora, e ko Harana; e anau akera ta Harana, ko Lota.

28 E mate atura oki a Harana i mua ake i tona metua ia Tera, i tona enua tikai i anau ei ra, i Ura ki o te Kaledea.

29 E kua akaipoipo iorā Aberama, e Nahora katoa, i te vaine na raua: ko Sarai te ingoa o te vaine a Aberama; e ko Mileka te ingoa o te vaine a Nahora, e tamaine na Harana, ko te metua tane ïa o Mileka, e te metua oki o Iseka.

30 E pa rā Sarai; kare ana tamariki.

31 E kua rave akerā Tera i tana tamaiti ra ia Aberama, e tona mokopuna ia Lota, te tamaiti a Harana ra, e tana unonga ia Sarai, i te vaine a tana tamaiti ra, a Aberama; kua arataki maira mei ko te Kaledea mai i Ura ra, e aere ki te enua ra ki Kanaana; e tae maira ratou ki Harana, kua noo iora ratou i reira.

32 E to Tera puke rā nei, e rua ïa anere e rima ara te mataiti; e mate iorā Tera i Harana.