Numero

27 KUA aere maira nga tamaine a Zelophehada, te tamaiti a Hepheri, te tamaiti a Gileada, te tamaiti a Makira, te tamaiti a Manase, no te au kopu-tangata o Manase, te tamaiti a Iosepha: teia oki te ingoa o tana au tamaine ra; ko Mahala, e ko Noa, e ko Hogela, e ko Mileka, e ko Tireza. 2 Kua tu maira ratou ki mua i te aroaro o Mose, e ki mua i te aroaro o Eleazara taunga ra, e ki mua katoa i te aroaro o te aronga mamaata, e te uipaanga katoa ra, i te ngutupa o te Are uipaanga ra, kua tuatua maira, 3 I mate to matou metua tane i te medebara, kare ra aia i roto i taua aronga i kapiti katoa i te urupu o Kora ra, e tauetono ia Iehova ra; i mate ra aia i tana uaorai ara: e kare ana tamariki tamaroa.

4 Eaa e tangaroiaʼi te ingoa o to matou metua tane i tona kopu-tangata, i te mea kare ana e tamariki tamaroa? O mai i tetai tuanga no matou i roto i te au taeake o to matou metua ra.

5 Kua apai akerā Mose i taua tuatua na ratou ra ki mua i te aroaro o Iehova.

6 Kua tuatua mairā Iehova kia Mose, na ko maira,

7 E tuatua tika ta te au tamaine a Zelophehada e apai rai koe i tetai tuanga kainga no ratou i roto i te au taeake o to ratou metua tane; e ūē koe i te kainga o to ratou metua tane no ratou.

8 E karanga atu oki koe ki te tamariki a Iseraela, e na ko atu, Kia mate te tangata ra, e kare ana e tamaroa, e ūē kotou i tona kainga no te tamaine.

9 E kare ana e tamaine ra, e apai kotou i tona kainga no tona ra au taeake i reira.

10 E kare ona e taeake ra, e apai kotou i tona kainga no te au taeake o tona metua tane ra.

11 E kare o tona metua tane ra e taeake ra, e apai kotou i tona kainga no tei piri tika mai kiaia i tona kopu-tangata, e nona atura taua kainga ra; e ei akonoanga tuatuatau teia na te tamariki a Iseraela, ko ta Iehova ïa i akaue mai kia Mose ra. 12 Kua tuatua mairā Iehova kia Mose, Ka aere koe ki runga i te maunga nei ia Abarima, e akara i te enua taku e oronga no te tamariki a Iseraela nei.

13 E kia kite koe i te reira ra, ka kapiti katoaia koe, ko koe katoa, ki toou iti-tangata, mei to tuakana ra mei ia Aarona i kapiti katoaia ki tona ra. 14 Kua akatokā oki korua i taku tuatua i te medebara ra i Zini, i te tauetonoanga a te uipaanga ra, kare oki au i akatapuia e korua ki mua ia ratou i te vai ra: koia taua vai ra ko Meriba i Kadesa, i te medebara ra i Zini. 15 Kua karanga aturā Mose kia Iehova, na ko atura,

16 E tuku koe, e Iehova, e te Atua o te au vaerua o te tangata ravarai, i tetai tangata ki rungao i te uipaanga nei,

17 Kia aere aia ki vao ki mua ia ratou, e kia oki mai ki roto ki mua ia ratou, ei arataki oki ia ratou ki vao, e ei akaoki mai ia ratou ki roto; kia kore oki e riro te uipaanga o Iehova ra mei te mamoe kare e tiaki ra. 18 Kua tuatua mairā Iehova kia Mose, Ka rave ia Iosua, te tamaiti a Nuna ra, e tangata ïa tei roto iaia te Vaerua, e tuku oki koe i toou rima ki rungao iaia;

19 E tuku koe iaia ki mua ia Eleazara taunga ra, e ki mua i te uipaanga katoa ra; ka ikuiku atu ei koe iaia ki mua i to ratou aroaro;

20 E tuku oki koe i tetai pae i te rangi noou ra ki runga iaia, kia akarongo te uipaanga tamariki ravarai a Iseraela ra iaia.

21 E tu oki aia ki mua i te aroaro o Eleazara taunga ra, e nana e ui i te tuatua nana ki mua i te aroaro o Iehova i te tuatua-tau ra i te Urima ra; tei iaia te tuatua e tae ei ratou ki vao, e tei iaia oki te tuatua e aere mai ei ratou ki roto; koia, e te tamariki katoa a Iseraela, koia oki te uipaanga ravarai. 22 Kua pera oki a Mose i ta Iehova i akaue mai kiaia ra: kua rave oki aia ia Iosua, e kua tuku iaia ki mua ia Eleazara taunga ra, e ki mua i te uipaanga katoa ra.

23 Kua tuku ra oki aia i ona rima ki runga iaia, e kua ikuiku mai oki iaia, ta Iehova i akaue mai ia Mose ra.