Numero

26 E I MURI ake i taua maki-mate ra, kua tuatua mairā Iehova kia Mose raua ko Eleazara, te tamaiti a Aarona taunga, na ko maira,

2 Ka tatau ana i te uipaanga tamariki a Iseraela ravarai i te maata anga, ko tei tae ki te mataiti e tai takau, e tei ara atu, e pini ua ake te ngutuare katoa o to ratou ai metua ra, ko te tika ki aere ki te tamaki i roto ia Iseraela nei.

3 Kua tuatua iorā Mose raua ko Eleazara taunga ra ia ratou i te ngai mataataa i o Moabi, i te pae Ioridana, i te ngai i aite kia Ieriko ra, na ko atura, 4 Ko tei tae ki te mataiti e tai takau, e tei ara atu, ta kotou ïa e tatau; ta Iehova oki i akaue mai kia Mose ra, e taua au tamariki a Iseraela, tei aere mai mei te enua maira mei Aiphiti. 5 Ko Reubena, te tama mua na Iseraela: ko ta Reubena tamariki; ta Hanoka ra, ko te kopu-tangata ngati Hanoka ïa: ta Palu ra, ko te kopu-tangata ngati Palu ïa:

6 Ta Hezerona ra, ko te kopu-tangata ngati Hezerona ïa: ta Karemi ra, ko te kopu-tangata ngati Karemi ïa.

7 Ko nga kopu-tangata ngati Reubena eia: e te aronga i tatauia i roto ia ratou ra, e a ïa ngauru e toru ara i te tausani, e itu anere, e toru ngauru.

8 Ko ta Palu tamariki; ko Eliaba ïa.

9 E ta Eliaba puke tamariki; ko Nemuela, e ko Datana, e ko Abirama: ko nga tangata ingoa kitea teia, ko Datana e ko Abirama, i roto i te uipaanga ra, ko tei tauetono mai ia Mose raua ko Aarona i te pupu o Kora ra, ka tauetono ei ratou ia Iehova ra:

10 E kua amama mai te enua i tona vaa, e kua apuku ia ratou katoa ma Kora ka mate ei taua pouou tangata ra, pou akera te au tangata e rua anere e rima ngauru i te ai: riro atura ratou ei akaraanga.

11 Kare ra te tamariki a Kora i mate.

12 Nga tamariki a Simeona i to ratou au kopu-tangata: ta Nemuela ra, ko te kopu-tangata ngati Nemuela ïa: te Iamina ra, ko te kopu-tangata ngati Iamina ïa: ta Iakino ra, ko te kopu-tangata ngati Iakino ïa:

13 Ta Zera ra, ko te kopu-tangata ngati Zera ïa: ta Saula ra, ko te kopu-tangata ngati Saula ïa.

14 Ko nga kopu-tangata o Simeona eia, e rua ïa ngauru ma rua i te tausani, e rua oki anere.

15 Nga tamariki a Gada i to ratou au kopu-tangata: ta Zephona ra, ko te kopu-tangata ngati Zephona ïa: ta Hagi ra, ko te kopu-tangata ngati Hagi ïa: ta Suni ra, ko te kopu-tangata ngati Suni ïa:

16 Ta Ozini ra, ko te kopu-tangata ngati Ozini ïa: ta Eri ra, ko te kopu-tangata ngati Eri ïa: 17 Ta Arodi ra, ko te kopu-tangata ngati Arodi ïa: ta Areli ra, ko te kopu-tangata ngati Areli ïa.

18 Ko nga kopu-tangata tamariki a Gada ïa, i tei tatauia i roto ia ratou ra, e a ïa ngauru i te tausani, e rima anere.

19 Ta Iuda ra au tamariki, ko Era ïa e ko Onana; mate iorā Era raua ko Onana i te enua ra i Kanaana.

20 Ko ta Iuda ra au tamariki i to ratou au kopu-tangata; ta Sela ra, ko te kopu-tangata ngati Sela ïa: ta Phareza ra, ko te kopu-tangata ngati Phareza ïa: ta Zera ra, ko te kopu-tangata ngati Zera ïa:

21 Ta Phareza ra au tamariki ra; ta Hezerona ra, ko te kopu-tangata ngati Hezerona ïa: ta Hamula ra, ko te kopu-tangata ngati Hamula ïa.

22 Ko nga kopu-tangata eia o Iuda, i tei tatauia i roto ia ratou, e itu ngauru e ono ara i te tausani, e rima anere.

23 Ta Isakara au tamariki i to ratou au kopu-tangata: ta Tola ra, ko te kopu-tangata ngati Tola ïa: ta Pua ra, ko te kopu-tangata ngati Pua ïa:

24 Ta Iasuba ra, ko te kopu-tangata ngati Iasuba ïa: ta Simirona ra, ko te kopu-tangata ngati Simirona ïa.

25 Ko nga kopu-tangata o Isakara ra eia, i tei tatauia i roto ia ratou, e ono ïa ngauru e a ara i te tausani, e toru anere.

26 Ta Zebuluna au tamariki i to ratou au kopu-tangata: ta Sereda ra, ko te kopu-tangata ngati Sereda ïa: ta Elona ra, ko te kopu-tangata ngati Elona ïa: ta Ialeela ra, ko te kopu-tangata ngati Ialeela ïa. 27 Ko nga kopu-tangata ngati Zebuluna ra eia, i tei tatauia i roto ia ratou ra, e ono ïa ngauru te tausani, e rima anere. 28 Te au tamariki a Iosepha i to ratou au kopu-tangata, ko Manase ïa, e ko Epheraima.

29 Ko ta Manase ra tamariki: ta Makira ra, ko te kopu-tangata ngati Makira ïa: e anau akera ta Makira ko Gileada ïa: ta Gileada ra, ko te kopu-tangata ngati Gileada ïa.

30 Teia nga tamariki a Gileada ra: ta Ieezera ra, ko te kopu-tangata ngati Ieezera ïa: ta Heleka ra, ko te kopu-tangata ngati Heleka ïa:

31 Ta Aseriela ra, ko te kopu-tangata ngati Aseriela ïa: ta Sekema ra, ko te kopu-tangata ngati Sekema ïa:

32 Ta Semida ra, ko te kopu-tangata ngati Semida ïa: ta Hepheri ra, ko te kopu-tangata ngati Hepheri ïa.

33 Kare a Zelophehada te tamaiti a Hepheri ra tamariki tamaroa, e tamaine ra: teia oki te ingoa o nga tamaine a Zelophehada ra, ko Mahala ïa, e ko Noa, ko Hogela, ko Mileka, e ko Tireza.

34 Ko nga kopu-tangata eia o Manase, e tei tatauia i roto ia ratou ra, e rima ïa ngauru e rua ara i te tausani, e itu anere.

35 Teia nga tamariki a Epheraima i to ratou au kopu-tangata ra: ta Sutela ra, ko te kopu-tangata ngati Sutela ïa: ta Bekera ra, ko te kopu-tangata ngati Bekera ïa: ta Tahana ra, ko te kopu-tangata ngati Tahana ïa.

36 Teia oki nga tamariki a Sutela: ta Erana ra, ko te kopu-tangata ngati Erana ïa.

37 Ko nga kopu-tangata eia o nga tamariki a Epheraima ra, i tei tatauia i roto ia ratou ra, e toru ïa ngauru e rua ara i te tausani, e rima anere. Ko ta Iosepha ïa au tamariki i to ratou au kopu-tangata.

38 Ta Beniamina ra au tamariki i to ratou ra au kopu-tangata: ta Bela ra, ko te kopu-tangata ngati Bela ïa: ta Asebela ra, ko te kopu-tangata ngati Asebela ïa: ta Ahirama ra, ko te kopu-tangata ngati Ahirama ïa:

39 Ta Suphama ra, ko te kopu-tangata ngati Suphama ïa: ta Huphama ra, ko te kopu-tangata ngati Huphama ïa.

40 Nga tamariki a Bela ra, ko Arada ïa, e ko Naamana: ta Arada ra, ko te kopu-tangata ngati Arada ïa: ta Naamana ra, ko te kopu-tangata ngati Naamana ïa. 41 Ko nga tamariki a Beniamina ra eia i to ratou au kopu-tangata: e tei tatauia i roto ia ratou ra, e a ïa ngauru e rima ara i te tausani, e ono anere.

42 Teia nga tamariki a Dana ra i to ratou au kopu-tangata: ta Suama ra, ko te kopu-tangata ngati Suama ïa. Ko nga kopu-tangata eia o Dana ra i to ratou au kopu-tangata.

43 Nga kopu-tangata ngati Suama katoa ra, i tei tatauia i roto ia ratou ra, e ono ïa ngauru e a ara i te tausani, e a anere.

44 Te tamariki a Asera ra i to ratou au kopu-tangata: ta Imena ra, ko te kopu-tangata ngati Imena ïa: ta Isui ra, ko te kopu-tangata ngati Isui ïa: ta Beria ra, ko te kopu-tangata ngati Beria ïa.

45 Ta te au tamariki a Beria ra: ta Hebera ra, ko te kopu-tangata ngati Hebera ïa: ta Malekiela ra, ko te kopu-tangata ngati Malekiela ïa.

46 E te ingoa o te tamaine a Asera ra ko Sara ïa.

47 Ko nga kopu-tangata eia o nga tamariki Asera ra, i tei tatauia i roto ia ratou ra; e rima ïa ngauru e toru ara i te tausani, e a anere.

48 Te tamariki a Naphatali i to ratou au kopu-tangata: ta Iazeela ra, ko te kopu-tangata ngati Iazeela ïa: ta Guni ra, ko te kopu-tangata ngati Guni ïa:

49 Ta Iezera, ko te kopu-tangata ngati Iezera ïa: ta Silema ra, ko te kopu-tangata ngati Silema ïa.

50 Ko nga kopu-tangata eia o Naphatali i to ratou au kopu-tangata; e tei tatauia i roto ia ratou ra, e a ïa ngauru e rima ara i te tausani, e a anere.

51 Ko taua aronga i tatauia teia i te tamariki a Iseraela ra, e ono anere okotai ara i te tausani, e itu anere, e toru ngauru.

52 E kua tuatua mairā Iehova kia Mose, na ko maira,

53 E tuaia te enua nei no ratou ei nooanga, e akono rai i te maata anga o te ingoa kia tatau ra.

54 E aronga maata ra kia maata ïa kainga taau e apai atu, e e aronga iti ra, kia iti ïa kainga taau e apai atu: e akaariteia to te tangata katoa ra kainga i apai atu i tei tatauia ki ona ra. 55 Ka tua keleroia ra taua enua nei: e akono rai i te ingoa o te au kopu o to ratou ra ai metua ka mou ei ratou ra i to ratou kainga.

56 E akono rai i te kelero ka tuaʼi i te enua i ta tei maata e tei iti.

57 Teia to te ngati Levi i tatauia i to ratou au kopu-tangata: ta Geresona ra, ko te kopu-tangata ngati Geresona ïa: ta Kohata ra, ko te kopu-tangata ngati Kohata ïa: ta Merari ra, ko te kopu-tangata ngati Merari ïa.

58 Teia nga kopu-tangata ngati Levi ra: te kopu-tangata ngati Libeni ra, te kopu-tangata ngati Heberona ra, te kopu-tangata ngati Mahali ra, te kopu-tangata ngati Musi ra, e te kopu-tangata ngati Kora ra. E anau akera ta Kohata ko Amerama.

59 E te ingoa o ta Amerama ra vaine ko Iokebeda ïa, te tamaine na Levi, ta Levi i anau i Aiphiti ra; e anau akera tana ia Amerama, ko Aarona ïa, e ko Mose, e to raua ra tuaine ko Miriama.

60 Anau akera ta Aarona ra, ko Nadaba ïa, e ko Abihu, ko Eleazara, e ko Itamara ra.

61 E mate iorā Nadaba raua ko Abihu, ia raua i apai i te ai noa ki mua i te aroaro o Iehova ra.

62 E tei tatauia i roto ia ratou ra, e tai takau ïa e toru ara i te tausani, e tamaroa anake, ko tei tae ki te marama okotai ra e tei maata atu; kare akera oki ratou i tatauia i te tamariki a Iseraela ra, no te mea kare a ratou tuanga kainga i o maiia mai i roto i te tamariki a Iseraela ra. 63 Ko te aronga teia i tatauia e Mose raua ko Eleazara taunga ra, ko tei tatau i te tamariki a Iseraela i te ngai mataataa i Moabi ra, i te pae Ioridana i aite ki Ieriko ra. 64 E kare rava tetai tangata, ta Mose raua ko Aarona taunga i tatau, ka tatau ei raua i te tamariki a Iseraela i te medebara ra ko Sinai, i roto i taua aronga ra.

65 Kua tuatua ana oki a Iehova kia ratou e, Ka mate tikai ratou i te medebara nei. Kare rava tetai o ratou i toe, mari ra ko Kaleba te tamaiti a Iephune, e ko Iosua te tamaiti a Nuna ra.