2 Samuela

14 TE KITE rā Iehova, te tamaiti a Zeruia, e kua riro te ngakau o te ariki kia Abasaloma.

2 Kua tono akerā Ioaba i te karere ki Tekoa, e kua arataki maira i tetai vaine pakari no reira, e kua karanga atura kiaia, Teia taku tuatua kia koe, e akatutu vaine akaevaeva koe, e akakakau ki te kakau akaevaeva, auraka e tainu ia koe ki te manongi, kia riro ra koe mei te vaine akaevaeva anga roa i te tangata mate:

3 Ka aere ei ki te ariki ra, e akapera i taau tuatua anga atu kiaia. Kua tuku ua aturā Ioaba i te tuatua ki roto i tona vaa.

4 E kia tuatua taua vaine Tekoa ki te ariki ra, kua tipapa iora aia ki raro i te one, tupou atura, kua karanga atura, E tauturu mai, e te ariki e.

5 Kua tuatua maira te ariki kiaia, Te peea ana koe? Kua karanga atura aia, E vaine takaua au, kua mate oki taku tane.

6 Toko rua a to tavini vaine tamariki tamaroa, e kua kukumi iora raua i te kainga, e kare e tangata ei vavae ia raua, mate rava akera tetai i te taia e tetai.

7 E i na, tei runga ua maira taua kopu-tangata ravarai i to tavini vaine nei, e kua tuatua maira ratou, E tuku ua mai taua tangata i ta i tona tuakana ra, kia taia e matou, e tutaki i tona tuakana i taia e ia; e ta katoa matou i te tangata kainga. E tamate rai ratou i taua ngarau iti naku ra, kare e vaooia tetai ingoa no taku tane, auraka tana ei toe i te ao nei.

8 E kua tuatua maira te ariki ki taua vaine ra, Ka aere ki toou ngutuare, e naku e tuku i te tuatua ki te tangata ia koe.

9 Kua karanga atura taua vaine Tekoa ra ki te ariki, E taku pu e te ariki e, ei runga iaku te ara vaoo ei, e ei runga i te ngutuare o toku metua: e auraka te ariki e tona terono kia araia.

10 Kua tuatua maira te ariki, Ko te tangata e tuatua mai kia koe ra, e arataki mai koe iaia kiaku nei, kare aia e akaanata akaou mai ia koe.

11 Kua karanga atura taua vaine ra, Teia taku tuatua kia koe, e akamaara ana koe, e te ariki, i toou Atua ra ia Iehova, e auraka kia tukuia e koe te aronga akamoupuku i te toto i te ta aere anga, ko te ta aea ratou i taku tamaiti. Kua tuatua maira aia, Te ora rā Iehova, kare rava tetai io rauru o to tamaiti e topa ki raro i te one.

12 Kua karanga atura taua vaine ra, E tuatua ua ana to tavini vaine nei i tetai tuatua iti, e taku pu e te ariki e. Kua tuatua maira aia, Ka tuatua mai.

13 Kua karanga atura taua vaine ra, Eaa oki koe i akaperaʼi i te manako i te au tangata o te Atua na? I tenana oki tuatua ta te ariki e tuatua maira mei te tangata e apa tana, i te mea kare te ariki e akaoki mai i tana tamaiti i tuaru ra.

14 E mate rai oki tatou, e ka riro mei te vai i maringi ua ki raro i te one, kare e rauka akaou mai; kare rava te Atua e akono ua i te tangata, e kimi rai oki aia i te ravenga, kia kore tana i tuaru ra e taku ke iaia ra.

15 E teianei, i aere mai nei au e tuatua i taua tuatua nei ki taku pu ki te ariki ra, no te mea, kua akamataku mai te au tangata iaku: kua tuatua akera to tavini vaine nei, E tuatua ana au ki te ariki; peneiake ko te akatika mai te ariki i te tuatua a tona tavini vaine.

16 E riro oki te ariki i te akarongo mai, e te akaora oki i tona tavini vaine, i te rima o te tangata i inangaro i te ta iaku e taku tamaiti katoa, i te tuanga a te Atua nei.

17 E kua tuatua akera oki to tavini vaine, Ka riro te tuatua a taku pu a te ariki nei, ei mea maru: e tau oki taku pu te ariki ra ki tetai angela a te Atua ra, i te kite i te mea meitaki e te mea kino: e ei vaitata to Atua ra ko Iehova ia koe.

18 Kua tuatua maira te ariki, e kua na ko maira ki taua vaine ra, Teia taku tuatua kia koe, auraka koe e uuna iaku i teianei tuatua taku e ui atu kia koe. Kua karanga atura taua vaine ra, Ka tuatua mai koe, e taku pu e te ariki.

19 Kua tuatua maira te ariki, Kare ainei teia katoa te rima o Ioaba ia koe, i teia katoa nei au tuatua? Kua karanga atura taua vaine ra, na ko atura, Te ora ra to vaerua, e taku pu e te ariki, kare i tika i tetai kia anga ke ki te rima katau e te rima kaui i ta taku pu ta te ariki i tuatua mai nei: na to tavini oki na Ioaba i ako mai iaku, e nana i tuku mai i taua au tuatua katoa nei ki roto i te vaa o to tavini vaine nei:

20 Ei ruri ke anga i taua tuatua nei, i pera mai ei to tavini ko Ioaba E pakari ra to taku pu, mei te pakari o tetai angela a te Atua, i te kite anga i te au tuatua katoa i te ao nei.

21 Kua karanga atura te ariki kia Ioaba, I na, kua tika iaku taua tuatua ra i teianei: e tenana ka aere, e akaoki mai i te tangata ou ra ia Abasaloma.

22 Kua tipapa iorā Ioaba ki raro tona mata i te one, e kua tupou iora, kua akameitaki atura i te ariki: kua karanga aturā Ioaba, Kua kite atura to tavini nei i teianei rā e kua kite aroaia mai au e koe, e taku pu e te ariki, ko koe, e te ariki, i akatika mai i te inangaro o to tavini.

23 Riro aturā Ioaba, aere atura ki Gesura, e kua arataki mai ia Abasaloma ki Ierusalema.

24 Kua tuatua maira te ariki, E ariu aia ki tona ngutuare, auraka ra aia kia kite mai i toku mata. Kua oki mairā Abasaloma ki tona uaorai ngutuare, kare ra i kite i te mata o te ariki.

25 Kare ra e tangata i akapaapaaia i Iseraela katoa ra mari ra ko Abasaloma i to purotu: mei te tapuae mai, e tae ua atura ki te take upoko ra, kare rava e kino.

26 E kia pakoti oki aia i tona mimiti ra, e akapera oki aia kia tae ki te ope mataiti ra, no te teimaa i pakoti ei aia ra; e kia aite aia i te rauru o tona mimiti, e rua ïa anere te sekela i te teimaa i te toka aite a te ariki ra.

27 Ka toru a Abasaloma tamariki i anau, okotai oki tamaine, ko Tamara te ingoa: e vaine tu meitaki taua vaine ra.

28 Ka rua akera o Absaloma mataiti i te noo anga i Ierusalema, kare akerai i kite i te mata o te ariki ra.

29 Kua tono akerā Abasaloma i te karere kia Ioaba kia tono ake aia iaia ki te ariki ra; kare akera aia i tae mai kiaia ra, e kia tono akaou rai aia i te karere i te tu rua o te tono anga mai, kare aia i keu mai.

30 Kua tuatua maira aia ki tona au tavini, I na, tera ake te kainga o Ioaba, tei vaitata ki toku ra, e kerite oki tei roto ra: ka aere e tutungi ki te ai. Kua tutungi iora te au tavini o Abasaloma i taua kainga ra ki te ai.

31 Kua tu mairā Ioaba, kua aere maira kia Abasaloma ki te ngutuare ra, e kua tuatua maira kiaia, Eaa to au tavini i tutungi ei i toku nei kainga ki te ai?

32 Kua karanga aturā Abasaloma kia Ioaba, I na, i tono oki au i te karere kia koe, i te tuatua anga atu e, E aere mai ana koe ki ku nei, kia tono au ia koe ki te ariki ra, e karanga atu e, Eaa au i aratakiia mai ei mei Gesura mai? ngari ake au naringa au i reira e teia noaʼi: e tenana kia kite au i te mata o te ariki ra; e te ara ua nei rai au, ka rave aia e ta iaku kia mate.

33 Kua aere mairā Ioaba ki te ariki ra, kua akakite maira kiaia: e kia tuatuaiā Abasaloma e ia, kua aere iora aia ki o te ariki ra, kua tupou iora aia ki te ariki i raro tona mata i te one: e kua ongi iora te ariki ia Abasaloma.