Isaia

10 E AE oki to tei akatu i te ture tika kore ra, to te au tata tuatua tei tata i te tuatua takinga-kino ra;

2 Ei akatarevake anga atu i te aronga putaua i te tuatua-tau, ei akangere atu i te mea tika i te aronga ao o toku nei iti-tangata; kia riro te au vaine takaua ei apinga na ratou, e kia noni oki ratou i ta te au matiroeroe.

3 E akapeea ra kotou kia tae ki te rā e rokoia atu ei ra, e i te mate e tae mai mei te ngai mamao mai? e oro tika kotou kiaai kia tauturuia mai? e eiea kotou e vaoo ei i to kotou ra au tangata nunui?

4 Kia kore ratou e taakaaka ki raro i te aronga i tapekaia, ka inga ratou e te aronga i taia katoa ra. Kare akerai tona riri i anga ke, te akatika ua mairai oki tona rima.

5 Aue to te tangata Asura e, te rakau o toku nei riri e, e no toku nei riri te rakau i vai i tona ra rima!

6 E akaunga atu au iaia ki te enua pikikaa ra, e porokiroki atu au iaia ki te aronga ririia e au ra; kia akaputuputu aia i te aronga tamaki, e kia apai ke i tei noniia ra; e kia takatakai aia ia ratou ki raro mei te vari o te au arataa ra.

7 Kare ra aia i pera i te manako, e kare i pera te akakoro anga o tona ngakau; kareka te ta, tei tona ïa ngakau, e kia tipu i te au enua kare e iti.

8 Te tuatua maira oki aia, Kare ainei toku nei ui rangatira ei ui ariki anake rai?

9 Kare ainei Kalano i aite kia Karekemisa? kare ainei Hamata e aite kia Arepada? kare ainei Samaria e aite kia Damaseko?

10 Mei toku rima i rave i te au basileia idolo, e to ratou au tiki ra, ko tei meitaki i to Ierusalema e to Samaria;

11 Mei taku oki i rave i to Samaria e tona ra au idolo, kare ainei au e akapera katoa atu kia Ierusalema e tona katoa ra au tiki?

12 E riro ra, ka ope te au angaanga katoa a te Atu i te raveia e ia ki runga i te maunga ra ko Ziona, e ki runga ia Ierusalema, e tutaki ei au i tei tupu i te ngakau parau o te ariki no Asura, e te akara anga nengonengo o tona mata.

13 Kua tuatua oki aia e, No taku rima ririnui i tikaʼi iaku i te rave, e no toku nei karape; kua pakari oki au: kua apai keia e au te kena kainga o te au enua ra, kua noniia e au ta ratou apinga i akaputuputu ra; e mei te toa ririnui ra, kua tuku oki au i te aronga i noo i te enua ra ki raro:

14 Kua kitea e toku rima te apinga o te au tangata, mei te koanga i kitea ra; e mei te tangata i akaputu i te ua manu i akarukeia ra, kua pera katoa taku akaputuputu anga i ta te pa enua katoa; kare ua tetai i akakapakapa ua ake te peau, e i amama ua ake te vaa, e i kiokio ua mai oki.

15 E akateitei ainei te tapae ki tei rave e tipu? e akateitei ainei te keke ki tei rave iaia e keke? mei te mea e, na te rakau pāpā e takirikiri ki tei apai iaia ra; mei te mea oki, na te rakau e apai i te mea rakau kore.

16 E teianei na te Atu, na Iehova Sabaota ra, e apai atu ei i te ikoke ki runga i te aronga poria nona ra, e ki raro ake i tona kakā e tutungi ei aia i te ka anga, mei te ai vera ra.

17 E riro te Mārama o Iseraela ra ei ai, e Tei Tapu nona ra ei ai mura: e taʼu rava aia, e e akapou i tana rakau taratara, e tana au tataramoa ra,i te rā okotai.

18 E tei manea oki no tona vaorakau, e no tona kainga ua meitaki ra, mei te vaerua e tae ua atu ki te kopapa, te ka pou ïa iaia: e ka roroe oki ïa, mei te tangata maki i roroeia nei.

19 E ko te toenga rakau o tona vaorakau ra, e iti ïa, e ope ua ake i tetai tamaiti iti kia tata.

20 E kia tae ki taua rā ra, kare te toenga o Iseraela ra, e tei ora i te ngutuare o Iakoba, e irinaki akaou i tei ta mai ia ratou; e irinaki ra ratou ia Iehova, i Tei Tapu i Iseraela nei, ma te pikikaa kore.

21 E oki maira tetai toenga, tetai toenga no Iakoba, ki te Atua ki Tei Mana ra.

22 Arite ua rai toou atu tangata, e Iseraela e, ki te one i taatai, e toenga ua te ka oki mai. Te akaotianga i akakoroia ra kua maringi ua i to tuatua-tika:

23 Taua akaotianga i akakoroia ra, na te Atu ra, na Iehova Sabaota, e rave i rotopu i te enua katoa nei.

24 E teianei, te na ko maira te Atu ra ko Iehova Sabaota, Auraka e mataku, e taku iti-tangata, i noo ki Ziona ra, i te tangata Asura ra: e ta mairai aia ia koe ki te rakau, e apai aia i tana rakau ki runga ia koe, mei ta Aiphiti ra.

25 E kia rakoau itio ra e anga atura taua riri otooto ra, e toku riri i to ratou mate.

26 Na Iehova Sabaota ra e apai i tetai ta ki runga iaia, mei te tainga ia Midiana, ki te mato ra ki Oreba: e riro oki te rakau nana ki runga i te tai ra, e apai aia i te reira ki runga, mei tei Aiphiti ra.

27 E kia tae ki taua rā ra, e apai keiaʼi tana apainga i to pakuivi, e tana zugo i runga i to kaki ra; e kua akakoreia oki te zugo no te akatainu anga ra.

28 Tei Aiata mai nei aia; i na roto atura aia ia Migirona te aere; ei Mikemasa vaoo ei aia i tana au apainga;

29 Kua topa ia ratou te ngai o iti; ei Geba ratou e moe ei; kua raungara Rama; kua ati Gibea o Saula.

30 E akateitei i toou reo, e te tamaine a Galima e: e akarongo mai, e Laisa e, e Anatota tumatetengaia e!

31 Kua aere Mademena; kua ati to Gebima.

32 Ei Noba aia noo ei akonei; e ruru aia i tona rima ki te maunga i te tamaine a Ziona, ki te maunga ra o Ierusalema.

33 I na, na te Atu ra, na Iehova Sabaota ra, e tipu i te mangamanga ma te aruru maata; e kokotiia oki te aronga roroa ki raro, e taakaakaia te aronga teitei.

34 E tipupu oki aia i te ngai piri o te vaorakau ra ki te auri, e inga Lebanona i te rima marōrō.