Ieremia

9 NARINGA ei vai toku upoko nei, e oku mata nei ei punavai roimata, kia aue ua ana au i te po e te ao i tei taia i te tamaine a toku ra iti-tangata!

2 Naringa ei are piritanga toku i te medebara mei to te tangata tuitarere; kia akaruke atu au i toku iti-tangata, kia aere ke atu! no te mea e aronga akaturi anake ratou; e uipa anga tangata pikikaa.

3 E kua akamingi ratou i to ratou arero mei to ratou ana ra, i te au tuatua pikikaa: kare ra ratou i ririnui i te tuatua-mou i runga i te enua nei; te ana atura ratou mei tetai kino e tae ua atu ki tetai kino, e kare akera ratou i kite iaku, te tuatua mairā Iehova.

4 Kia matakite te tangata ravarai i tona uaorai tangata tupu, e auraka oki e irinaki ki tona uaorai taeake: no te mea e pikikaa tikai te au taeake ravarai, e aaere oki te au tangata tupu ravarai ma te monomono korero.

5 E pikikaa oki te tangata ravarai i tona uaorai tangata tupu, kare oki e tuatua i te tuatua-mou: kua akamātau oki ratou i to ratou arero i te tuatua pikikaa; kua akaroiroi ratou ia ratou uaorai i te rave anga i te kino.

6 Tei rotopu i te pikikaa toou na nooanga; no te pikikaa i kore ei i tika ia ratou kia kite mai iaku nei, te tuatua mairā Iehova.

7 I na ko mai ei a Iehova Sabaota, I na, e akataravai au ia ratou, e e timata ia ratou; e akapeea atu oki au i te tamaine a toku iti-tangata nei?

8 Mei te kakao i mate ei ra to ratou arero; ko tei tuatua i te pikikaa: ma te vaa, kua tuatua aia i te au ki tona tangata tupu, kareka ma te ngakau ra, te moetapapa ra ïa iaia.

9 Te tuatua mairā Iehova, Auraka ainei au e tutaki atu ia ratou i taua au mea nei? auraka ainei toku Vaerua e akaoko atu i te enua mei te reira te tu?

10 No te au maunga e akatupu ei au i te aue, e te mii, e no te au ngai one kai i te medebara ra i te peʼe tangi; no te mea kua tanea, e kare ua e tangata e na reira te aere; kare rai i kite i te aue anga o te au puaka; mei te au manu o te reva e tae ua atu ki te au puaka, kua rere ke anake ïa; kua aere.

11 E akariro au ia Ierusalema ei au ututua, ei vaarua no te au taae; e akariro au i te au oire o Iuda ei tanea, kare rava e tangataia.

12 Koai te tangata pakari, e kite i teia? e tei tuatuaia atu e te vaa o Iehova, tei tika iaia kia akakite i te mea i pou ei te enua, e i akatanea ravaiaʼi mei te medebara, kare e tangata e na reira te aere?

13 E kua tuatua mairā Iehova, No te mea kua akaruke ratou i taku nei ture, taku i tuku atu ki mua ia ratou, e kare oki i akarongo i toku nei reo, e kare oki i na reira te aere;

14 Kua aru aere ra i te au manako o to ratou uaorai ngakau, e i te au Baala, ta to ratou ai metua i apii mai ia ratou:

15 I na ko mai ei a Iehova Sabaota, te Atua no Iseraela; I na, e angai atu au ia ratou, teia iti-tangata nei, ki te rakau maamaa, e e akainu atu ia ratou ki te vai kavangu.

16 E akapueurikiriki ke au ia ratou ki rotopu i te pa enua, ko tei kore i kitea e ratou, e to ratou ai metua katoa: e e unga atu au i te koke ei aru ia ratou, e kia pou ratou iaku nei.

17 Te na ko mairā Iehova Sabaota, E akamaara na kotou, e e kapiki atu i te au vaine aue ra, kia aere mai ratou; e e tiki atu i te au vaine karape, kia aere mai ratou:

18 E kia rapurapu ratou i te tumu i te peʼe tangi ia tatou nei, kia eeke te roi-mata i to tatou nei mata, e kia koîî te vai i to tatou topiri mata.

19 Te kitea ra oki te reo aue mei Ziona mai; Kare ra e eke ia tatou e! kua maata to tatou aringaringa; no te mea kua akarukeia e tatou te enua, kua vavaʼiia oki e ratou to tatou au are.

20 E teianei ka akarongo mai kotou e te au vaine e, i te tuatua a Iehova, e kia āriki mai to kotou taringa i te tuatua a tona vaa; e apii oki i ta kotou au tamaine i te eva, e te au vaine katoa i tona uaorai tangata tupu i te peʼe tangi.

21 No te mea kua kake mai te mate na runga i to tatou au māramārama, kua tomo ki roto i to tatou au are ariki ra, kia tipu keia te au tamariki ki vao, te au tangata ou i te au arataa.

22 E tuatua, Te na ko mairā Iehova, E inga te au kopapa tangata ki raro, mei te teita ki rungao i te enua, e mei tei topa i te rima o te tangata kokoti sitona ra, e kare oki e tangata i koi aere.

23 Te na ko mairā Iehova, Auraka tei pakari ra e akatietie i tona pakari, auraka oki tei ririnui e akatietie i tona ririnui, auraka oki tei apinga nuiia ra e akatietie i tona apinga nui:

24 Ko tei akatietie ra, teia tana e akatietie, koia i kite, e kua kite tikai aia iaku nei e, ko Iehova au, ko tei rave i te takinga-meitaki, te tuatua-tau, e te tuatua-tika, ki runga i te enua nei: ko taku ïa au mea inangaro, te tuatua mairā Iehova,

25 I na, te tuatua mairā Iehova, te vaitata mai nei te au rā, e tutaki atu ei au i to te peritome ravarai, e to te peritome kore katoa oki;

26 Ia Aiphiti, e ia Iuda, e ia Edoma, e te au tamariki a Amona, e ia Moabi, e ia ratou katoa e varu i to ratou parata, ko tei noo i te medebara: e peritome kore anakeia oki to taua au enua katoa ra, e e ngakau peritome kore katoa oki to te ngutuare katoatoa o Iseraela.