Exodo

22 KIA keia te tangata i te puakatoro, e kare ra, i te mamoe, e ko iora, e kare ra, e oko atura; kia rima mairai ana puakatoro ei tutaki i taua puakatoro okotai ra, kia a mai oki ana mamoe ei tutaki i te mamoe okotai ra.

2 Kia kitea te keia i te vavaʼi anga i te are, e taia iora aia, e mate roa akera, kare ïa i te ta tangata.

3 Kareka tei runga te rā i ta ai ra, e ta tangata ïa aia i reira, e rave ïa aia i te utunga. Kare a te keia e apinga ra, ka okoia aia uaorai ei tutaki i tana keia ra.

4 Rokoia atu te vai ra taua apinga keiaia ra, tei iaia uaorai, te ora ra, e puakatoro e puakatoro ïa, e te asini, e te mamoe oki, kia taki rua mai tana kia tutaki mai.

5 Kia pou te kainga, e te kainga vine i tetai tangata, kia tuku aia i tana puaka ki roto, kia pou ta tetai ra paʼu kai, e tutaki mai ïa aia i te mea memeitaki no roto i tona uaorai kainga, e te mea memeitaki no roto i tona uaorai kainga vine.

6 Kia ka te ai i roto i te ngangaere ra, e pou iora te sitona i uipa ra, e te sitona tu ua ra, e te kainga; ko tei tutungi i taua ai ra, ka tutaki mai ïa aia e kia tutaki na ïa.

7 Kia apai te tangata i te moni e te apinga ki tetai tangata ei tiaki, e keiaia iora i roto i te are o taua tangata ra; kia kitea te keia ra, kia taki rua mai tana e tutaki mai.

8 Kia kore ra e kitea te keia ra, ka aratakiia mai te tangata ngutuare ki te aronga akava ra, kia kitea e kua rave ainei tona uaorai rima i taua apinga a tona taeake ra.

9 E te au ara katoa ra, mei te puakatoro ra, te asini ra, te mamoe ra, te kakau ra, te au apinga kia ngaro ra, kia tuatua mai tetai e nana taua apinga ra; e apai ïa ta tetai pae ra tuatua, e ta tetai, ki mua i te aroaro o te aronga akava; e ta te aronga akava i akaapa ra, kia taki rua mai tana apinga kia apai mai na tona taeake.

10 Kia apai atu te tangata i te asini na tetai e tiaki, e te puakatoro, e te mamoe, e te au puaka katoa oki; e mate iora, e kare ra, paruparu iora, e arumaki keia atura, kare e tangata i kite:

11 Ei reira tetai e taputou ei ia Iehova i tetai, e kare roa tona rima i rave i ta tetai ra apinga; e āriki te tangata apinga ra i taua taputou nana ra, e auraka oki aia e tutaki mai.

12 E i keiaia taua mea ra iaia ra, e rave mai ïa aia i te tutaki na te tangata apinga ra.

13 E i etietiia ra, ka apai mai aia i te akairo i taua etieti anga ra, auraka ra aia e rave mai i te tutaki.

14 E kia ori te tangata i tetai puaka a tona taeake, e paruparu iora, e mate roa akera, kare te pu i vaitata, e apai mai ïa aia i te tutaki i reira.

15 Tei vaitata katoao te pu ra, auraka aia e tutaki mai i reira; e mea ouia ra, no te ou ïa i tukuia mai ei.

16 Kia akanauru te tangata i te paretenia, kare i momokoia ra, e kua moe iaia; ka apai aia i te apinga nana, ei vaine tikai nana.

17 Kia kore roa ra e pa mai tona metua tane iaia ei vaine nana, ka apai ïa aia i te moni e tau ki te ōra paretenia ra.

18 Auraka roa e vaoo ora ua i te purepure vaine.

19 Ko tei moe i te puaka ra, ka tamate takiri roaia ïa.

20 Ko tei apai i te atinga na te au atua, kare kia Iehova anake ra, ka akapou roaia ïa.

21 Auraka koe e takinga-kino i te tangata ke, auraka oki e tinaimate atu: i tangata ke ana oki kotou i te enua ra i Aiphiti.

22 Auraka kotou e takinga-kino i te vaine takaua e te matiroeroe:

23 Kia takinga-kino ua ake koe i te reira, kia kapiki mai ratou kiaku, ka akarongo tikai au i ta ratou kapiki;

24 Ka otooto toku riri i reira, ka tamate takiri roa ïa au ia kotou ki te koke; e ka riro ta kotou au vaine ei takaua, e ta kotou au tamariki ei matiroeroe.

25 Kia apai koe i te moni ori ki toku nei au tangata putaua, auraka koe kia riro mei tei umuumu i te tutaki ra iaia; auraka kotou e akateimaa iaia i te tutaki.

26 Kia rave ua atu koe i te kakau o to taeake ei tutaki, kia topa te rā ra e akaoki akaou atu ïa kiaia.

27 Otira ua oki ona tapoki, ko tona ïa kakau ei vaî iaia ra; eaa atu rai oki tona kakau kia moe? kia kapiki mai oki aia kiaku ra, ka akarongo ïa atu au iaia; e aroa oki toku.

28 Auraka koe e akakino i te au akava, auraka e tuatua kino i te tutara i rungao i to iti-tangata na.

29 Te popo mua i te au kai naau na, e te vai vine naau ra, auraka koe e pupuru i te reira iaku nei. Taau au tamariki tama mua ra ka o mai katoa mai ïa kiaku nei.

30 E pera oki koe i te anaunga mua a taau au puakatoro, e taau au mamoe; kia po itu i te vairanga ki te tinana ra; kia tae ki te rā varu ra, ka apai mai koe i te reira kiaku nei.

31 Ei au tangata tapu kotou noku: e te au puaka katoa kia etietiia ki te ngangaere ra, auraka kotou e kai; e akaruke ke atu na te puakaaoa.