1 Ariki

9 E OTI akera te are o Iehova i te akatuia e Solomona, e te are o te ariki, e te au mea katoa ta Solomona i anoano i te rave,

2 Kua mama mairā Iehova kia Solomona ra, ko te tu rua ïa i te mama anga mai, mei iaia katoa i mama mai kiaia i Gibeona.

3 Kua tuatua mairā Iehova kiaia, Kua akarongo au i taau pure e taau pati anga, i taau i pure mai ki mua iaku ra: kua akatapuia e au taua are i akatuia e koe ra, ei reira toku ingoa vaoo ei e tuatau ua atu; ei reira oki toku mata e toku ngakau ka vaoo atu ei i te au rā katoa.

4 Kareka ko koe ra, kia na mua tikai koe iaku i te aere mei to to metua ra mei to Davida i aere ra, ma te akono meitaki o te ngakau, e ma te tiratiratu, i te rave i taku i akaue atu ia koe ra, kia akono koe i taku ra au akonoanga, e taku ra au tuatua-tau:

5 Ei reira au ka akamou ei i te terono i toou ra basileia ki runga ia Iseraela e tuatau ua atu, taku oki i karanga atu ki to metua ra kia Davida, ka tuatuaʼi au ra e, Kare koe e ngere i te tangata i te noo ki runga i te terono o Iseraela.

6 Kia anga ke ra kotou, e ta kotou au tamariki, e kia kore e aru mai iaku, e kia kore oki e akono mai i taku au akauenga, taku ra au akonoanga i tukuia atu e au ki mua i to kotou aroaro, kia aere rai kotou e kia akarongo i te au atua ke, e kia akamori ia ratou:

7 Ka tipu keia e au Iseraela i reira i te enua i orongaia e au no ratou ra; e teianei are, i akatapuia e au i toku nei ingoa, ka akaruke keia e au e kia ngaro atu; ka riro oki Iseraela ei amuamuanga, e ei tuatuaanga, i te tangata ravarai.

8 E teianei are e teitei nei, ka riro ei vavaranga, e ei avirianga na te tangata katoa e na reira te aere; ka riro i te tuatua mai e, Eaa rā Iehova i akapera mai ei ki teianei enua, e teianei are?

9 Ei reira e karangaia atu ei e, No te mea kua akaruke ratou i to ratou Atua ia Iehova, tei arataki mai i to ratou ai metua mei te enua maira mei Aiphiti, e kua opu atu ratou i te au atua ke, e kua akamori ia ratou, e kua akarongo ia ratou ra: i apai mai ei a Iehova i teia katoa nei au kino ki runga ia ratou.

10 E ope akera te au mataiti okotai takau ra, e oti akera nga are e rua i te akatuia e Solomona, i te are o Iehova, e te are o te ariki ra,

11 No te mea kua oronga mai te ariki o Turia ra ko Hirama i te arezi e te berusi, e te auro, na Solomona, e na akera tona inangaro, kua apai atura te ariki ra ko Solomona i te au oire no Hirama, okotai taku, i te enua ra i Galilea.

12 Kua aere mairā Hirama mei Turia mai e atoro i taua au oire ra i o maiia mai e Solomona; kare akerai i tau iaia.

13 Kua tuatua akera aia, Eaa teianei au oire taau i o mai noku nei, e taku taeake? Tapa iora aia i taua au oire ra, ko te enua ra ko Kabula, te ingoa uaorai ïa e tae rava akenei ki teianei rā.

14 Kua akau mairā Hirama i te au taleni auro na te ariki, okotai anere e rua ngauru.

15 Teia te mea i akatakaiaʼi tetai pouou tangata e Solomona; ei akatu i te are o Iehova, e te are nona uaorai, e Milo, e te patu i Ierusalema, e ia Hazora, e Megido, e Gezera.

16 Kua aere maira te ariki o Aiphiti ra ko Pharao, e kua rauka Gezera iaia, kua ka i te ai, e kua pou te ngati Kanaana i noo i taua oire ra i te taia, e kua oronga mai no te tamaine no te vaine a Solomona ei ora;

17 E kua akatu akerā Solomona ia Gezera, e ia Bete-horona i raro ra,

18 E Baalata, e Tadamora i te medebara, i te enua ra,

19 E te au oire vairanga apinga ravarai na Solomona, e te au oire no te au kariota, e te au oire no te aronga akaoro oroenua ra, e te au mea katoa ta Solomona i anoano i te patu i Ierusalema, e Lebanona, e i te enua katoa o tona ra basileia.

20 Ko te au tangata katoa i toe ra i te ngati Amori, te ngati Heta, te Perizi, te ngati Heva, e te ngati Iebusi, kare to te tamariki a Iseraela,

21 E tamariki ra na te aronga i vaioia i runga i te enua ra, tei kore i pou i te tamariki a Iseraela, ko ta Solomona ïa i akataka ei tautaunga e tae rava akenei ki teianei rā.

22 Kareka te tamariki a Iseraela, kare ratou i akataviniia e Solomona; ei tangata ïa no te tamaki, ei tavini nona, ei ui mataiapo, e aronga rangatira, ei aronga tutara no te au kariota nona, e te akaoro oroenua ra.

23 Ko te aronga ïa i maata i te au rangatira i rungao i te angaanga a Solomona, e rima anere, e rima oki ngauru, tei ia ratou te tuatua i te aronga i rave i taua angaanga ra.

24 E tae maira te tamaine a Pharao mei te oire mai o Davida ra ki tona ra are i akatuia e Solomona nona ra: kua akatu akera aia ia Milo i reira.

25 Ka toru akera o Solomona apai anga i te atinga karakaratio, e te atinga au, ki runga i te atarau i akatuia e ia na Iehova, i te mataiti okotai; e kua tutungi aia i te atinga kakara ki runga i te reira, ki mua i te aroaro o Iehova. Oti rava akera taua are ra iaia.

26 Kua tarai oki a Solomona i te au pai i Eziona-gebera, i vaitata i Elota, i taatai i te Tai Muramura, i te enua ra i Edoma.

27 Kua akaue akerā Hirama i tona uaorai au tavini e kapiti katoa i te au tavini o Solomona ki runga i te pai, e aronga pai karape i te angaanga moana.

28 E aere atura ratou ki Ophira, e kua rave maira i te auro, e a anere e rua ngauru i te taleni, e kua apai maira ki te ariki ra kia Solomona.