1 Ariki

20 KUA akaputuputu iora te ariki o Arama ko Bene-adada i te nuku katoa nana: e toru ngauru ma rua ariki i te kapiti anga mai kiaia ra, e te aronga akaoro oroenua, e te au kariota: kua aere maira aia e tamaki ia Samaria, kia pou iaia.

2 Kua tono mai ana aia i te au karere ki roto i te oire ki te ariki o Iseraela kia Ahaba ra, ko tei tuatua mai kiaia e, Te na ko mairā Bene-adada,

3 To ario e to auro, naku ïa; to au vaine e to au tamariki, e tae ua atu ki tei meitaki rava ra, naku ïa.

4 Kua karanga atura te ariki o Iseraela, na ko atura, E taku pu e te ariki, e taau oki i tuatua mai na, noou katoa au nei, e taku katoa ra.

5 Kua oki maira taua au karere ra, e kua tuatua maira, Te na ko mairā Bene-adada, tuatua maira, Kua tono au i te karere kia koe, e tuatua kia koe e, E tuku mai koe i to ario, e to auro, e to au vaine, e to au tamariki ra, kiaku nei;

6 Ka tono ra au i toku au tavini kia koe penei apopo, e ka kimi aere ratou i roto i to are, e i roto i te are o to au tavini; e tei mataora i to mata, ka rave to ratou rima, e apai mai.

7 Kua tiki atura te ariki o Iseraela i te aronga pakari katoa o te enua ra, e kua karanga atura. E akono meitaki ana, ko taku ïa tuatua kia kotou, e akara i taua tangata nei te kimi nei i te kino: kua tono mai oki aia i te karere i te au vaine naku nei, e taku au tamariki, e taku ario, e taku auro; e kare oki i tāpuia atu e au.

8 Kua tuatua maira te aronga pakari katoa e te tangata katoatoa kiaia, Auraka e akarongo, auraka e akatika atu.

9 Kua karanga atura aia ki taua au karere a Bene-adada ra, E karanga atu ki taku pu ki te ariki. Taau i tono mai ki to tavini nei i muatangana akera, kua tika ïa iaku: kareka i tena, kare ïa e tika iaku te reira. Oki atura te au karere ra, apai atura i taua tuatua ra.

10 Kua tono mairā Bene-adada i te karere kiaia, e kua tuatua maira, Kia pera mai te au atua kiaku, e kia maata mairai, kia toe te kapu-rima one-pueu o Samaria kia tatau, i te au tangata katoa e aru iaku.

11 Kua karanga atura te ariki o Iseraela, na ko atura, E karanga atu ki to kotou pu, Auraka tei akamou i te taoonga tamaki ra e akatietie mei te mea te kiriti ra.

12 Kite akerā Bene-adada i te reira tuatua, te inu ra i te kava ki roto i te au puakapa, koia katoa ma te au ariki ra, kua tuatua akera aia ki tona au tavini, E akamou ana i te tamaki. E kua akamou iora ratou e rave i taua oire ra.

13 E i na, kua aere maira tetai peroveta ki te ariki o Iseraela ra kia Ahaba, tuatua maira, Te na ko mairā Iehova, Kua kite ainei koe i teianei aronga i te maata? i na, e tukuia atu e au ki roto i to rima i teianei rā; e ka kite oki koe e ko Iehova au.

14 Kua karanga aturā Ahaba, Naai e rave? Kua tuatua maira aia, Te na ko mairā Iehova, Na te au tangata ou no te aronga tutara o te au tapere nei. Kua karanga atura aia, Naai e akamou i te tamaki? Kua tuatua maira aia, Naau.

15 Kua tatau iora aia i taua au tangata ou no te aronga tutara o te au tapere ra, e rua atura anere, e toru ngauru e rua ara: e oti akera te reira, kua tatau iora i te au tangata ravarai i to Iseraela katoa ra, e itu ïa tausani.

16 E avatea akera, kua aere iora ratou ki vao. Karekā Bene-adada e te au ariki e toru ngauru ma rua e tauturu mai iaia te inu ra ïa i te kava kona i roto i te puakapa.

17 Te au tangata ou no te aronga tutara o te au tapere ra te riro ana ki vao; kua tono akerā Bene-adada i te akara, e kua tuatua maira ratou kiaia, na ko maira, E tangata tera mei roto mai i Samaria ra.

18 Kua karanga atura aia, I aere au mai ratou, e rave ora ua ïa; i aere tamaki mai, e rave ora ua ïa rai.

19 Kua aere maira taua au tangata ou ra no te au tutara o te au tapere ra, mei roto mai i te oire, e kua aruia ratou e te nuku.

20 Ta iora ïa, ko te tangata ko tana, e ope rava akera ratou: oro atura to Arama; e ko Iseraela i te aruaru anga i murio: kareka te ariki o Arama ko Bene-adada, kua ora atura na runga i tetai oroenua, e te aronga akaoro oroenua katoa ra.

21 Aru ua atura te ariki o Iseraela i te tainga i te au oroenua e te au kariota, ta iora i to Arama, e pou maata rava.

22 Kua aere maira te peroveta ki te ariki o Iseraela, e kua tuatua maira kiaia, E aere, e akamaroiroi ia koe uaorai, e akamaara marie i taau ravenga; kia tae oki ki tona tuatau, ka tae mai ei te ariki o Arama e tamaki rai ia koe.

23 Kua karanga atura te au tavini o te ariki no Suria ra kiaia, E atua no te maunga to ratou au atua; i maroiroi ei ratou ia tatou nei, ei te ngai mataataa ra tatou kia tamaki akaou, ka riro ia tatou te maroiroi i reira.

24 E akapera oki koe, E tuku ke te ui ariki, ratou katoa i tona ngai, i tona ngai, e tupau maira i te rangatira:

25 Ka tatau akaou ei i te tangata e kia aiteite katoa mei tei pou io nei, ko te oroenua rai te oroenua, ko te kariota rai te kariota; ei te ngai mataataa rai tatou tamaki ei, e ka riro ia tatou te maroiroi i reira. Kua akarongo atura aia i ta ratou tuatua, e kua akapera atura.

26 E tae akera ki te tuatau tikai, kua tatau iorā Bene-adada i to Arama, e aere atura ki Apheka, e tamaki ia Iseraela.

27 Tatauia iora oki te tamariki a Iseraela, e tu akera i te kai, e kua aere e tamaki ia ratou, kua patia iora te tamariki a Iseraela i te puakapa e aite akera kia ratou, mei nga anana rikiriki puakanio e rua ra; kareka to Arama ra, kua ki ïa te enua.

28 Kua aere maira te tangata no te Atua, kua tuatua maira ki te ariki no Iseraela, na ko maira, Te na ko mairā Iehova, No te mea kua tuatua mai to Arama e, E atuā Iehova no te maunga, kare ra aia i te atua no te ngai mataataa, ka tuku katoa atu au i teianei aronga maata ki roto i to rima na, e ka kite oki kotou e ko Iehova au.

29 E po itu akera ratou i te vaoo ua anga ki roto i te puakapa, te aite ra tetai e tetai: kia tae ra ki te po itu, kua akaaravei akera ratou e tamaki: ta iora te tamariki a Iseraela i to Arama, okotai anere i te tausani i te tangata aere ua, i te rā okotai.

30 Kua oro iora te toenga ki te oire ra ko Apheka; topaia iora taua toenga ra e te patu, e rua ngauru ma itu i te tausani. Kua oro iora oki a Bene-adada ki roto i taua oire ra, ki roto i tetai pia ki roto rava ra.

31 Kua karanga atura tona au tavini kiaia, I na, kua rongo akenei matou e, ko te au ariki o te ngutuare no Iseraela, e ariki aroa ua ïa: e teia ta matou tuatua kia koe; e rave matou i te kakau paoa e tatua ia matou, e te taura ei runga i to matou kaki, ka aere ei matou ki vao ki te ariki o Iseraela: peneiake ko te ora koe.

32 Kua tatua iora ratou ki te kakau paoa, e kua tuku i te taura ki runga i to ratou kaki, e kua aere maira ki te ariki o Iseraela ra, e kua na ko maira, Te tuatua nei to tavini ko Bene-adada, Kia ora au. Kua karanga atura aia, Te ora ra aia? ko toku ïa taeake.

33 Kua akono marie taua aronga tangata ra, e kua mou vave akera i tei mei ko iaia ra, e kua tuatua akera, Ko to taeake ko Bene-adada te ora ra. Kua karanga atura aia, Ka aere kotou ka arataki mai iaia. Kua aere mairā Bene-adada kiaia ra; kua tuku ua maira ai iaia ki runga i te kariota.

34 Kua tuatua mairā Bene-adada kiaia, Te au oire o to metua i raveia e te metua noku ra, ka akaoki ïa au; e naau e anga i te arataa noou i Damaseko, mei tei angaia e toku metua i Samaria ra. Kua karanga aturā Ahaba, Ko taku ïa koreromotu ia koe, ka tuku atu ei au ia koe. Kua papau iora iaia i taua koreromotu ra iaia, e kua tuku atura kia aere ana.

35 Kua tuatua maira tetai tangata no te au tamariki a te peroveta ra ki tetai tangata, i tuatuaia mai e Iehova, E ta mai koe iaku, ko taku ïa tuatua kia koe. E kare atura i tika i taua tangata ra i te ta iaia.

36 Kua karanga atura aia kiaia, No te mea kare akenei koe i akarongo i te tuatua a Iehova, i na, kia riro ke koe iaku nei, ka mate koe i tetai liona. E kia taka ke atura aia iaia, kua rokoia iora aia e tetai liona, mate atura aia.

37 Kua aravei atura aia i tetai tangata, e kua karanga atura, E ta mai koe iaku, ko taku ïa tuatua kia koe. Kua ta atura taua tangata ra iaia, e paruparu atura aia i te tainga anga.

38 Aere atura taua peroveta ra, e kua tapapa maira i te ariki i te pae arataa ra, e kua tapoki iora iaia uaorai kia ngaro ki tetai ri ki runga i te mata ra.

39 Te aere ua maira taua ariki ra na reirao, kua kapiki atura aia ki te ariki; kua karanga atura, Kua tae rava to tavini i rotopu i te tamaki anga ra; e i na, kua tapae maira tetai tangata, kua arataki maira i tetai tangata kiaku nei, kua tuatua maira, E tiaki ana koe i teianei tangata: e kia ngaro aia ra, ko koe uaorai te oko, e kare ra, e tutaki mai koe i tetai taleni ario.

40 E i na, varenga ke akera to tavini i tera mea i tera mea, kare ua ra taua tangata ra. Kua tuatua maira te ariki o Iseraela kiaia, Ko taau rai ïa utunga; naau uaorai i akataka ra.

41 Kua tatara rapurapu iora aia i taua ri i runga i tona mata ra; kite akera te ariki o Iseraela e, ko tetai ïa o te au peroveta ra.

42 Kua karanga atura aia kiaia, Te na ko maira Iehova, No te mea kua tuku ua akenei koe i tetai tangata i roto i to rima na, i akonoia e au kia mate rava, e tenana, ko koe uaorai te oko iaia, e toou ra au tangata ei tutaki i tona ra au tangata.

43 Aere atura te ariki o Iseraela ki tona ngutuare ma te ongoongo e te riri, e tae atura ki Samaria.