2 Samuela

3 E TAMAKI roa to te ngutuare no Saula e te ngutuare no Davida; te tupu ra ra to Davida ririnui, te aere ra oki to Saula ngutuare i te paruparu.

2 Kua anau oki ta Davida tamariki tamaroa i Heberona: e ko tana tama mua ra, ko Amanona ïa ia Ahinoama e vaine Iezereela;

3 E te rua ka, ko Kileaba ïa ia Abigaila i te vaine a Nabala e vaine Karamela; e te toru ra, ko Abasaloma ïa, te tamaiti a Maaka i ta tamaine a Talemai, te ariki no Gesura;

4 E te a ra, ko Adonia te tamaiti a Hagita; e te rima ra ko Sephatia te tamaiti na Abitala;

5 E te ono ra, ko Itereama ïa ia Egela i te vaine a Davida. I anau teia ia Davida i Heberona.

6 Tupu atura te tamaki ra, ko te ngutuare o Saula tetai pae, e te ngutuare o Davida tetai pae, kua akamaroiroi iorā Abenera no te ngutuare o Saula ra.

7 E vaine tavini ta Saula, ko Rizepa te ingoa, e tamaine na Aiā; kua karanga aturā Iseboseta kia Abenera, Eaa te mea i tae ei koe ki roto i te vaine tavini a toku metua nei?

8 Kua maata rava atura to Abenera riri i te tuatua a Iseboseta, e kua tuatua akera, E mimiti puaka aoa ainei au nei, ko tei takinga-meitaki ua nei i te ngutuare o te metua na o Saula, e tae ua mai nei ki teianei rā, i te māro anga atu ia Iuda ki tona au taeake, e tona au taunga, e kare i tuku atu ia koe ki te rima o Davida, e tapepe mai ei koe iaku i teianei rā i te ara i teianei vaine?

9 Kia pera mai te Atua ia Abenera, e kia maata mairai, kia kore au, mei ta Iehova i taputou mai kia Davida ra, kia pera katoa kiaia:

10 I te ruri ke anga atu i te au i te ngutuare o Saula, e te akatupuanga i te au o Davida ki runga ia Iseraela, e ki runga ia Iuda, mei Dana mai e tae ua atu ki Bereseba.

11 Kare atura e tika iaia kia karanga ua atu kia Abenera, no te mea te mataku ra aia iaia.

12 Kua tono akerā Abenera i te au karere kia Davida, nana uaorai i tono ei, tuatua akera, Noai te enua nei? e te na ko anga atu, E papau mai ana koe i te koreromotu naau kiaku nei; e i na, ko toku rima tei ko na ia koe na, e arataki ia Iseraela katoa ki ko na kia koe na.

13 Kua tuatua maira aia, Kua tika: ka papau atu au i te koreromotu kia koe na: okotai rava ra aku tuatua e umuumu ia koe na, ko teia ïa. Auraka rava koe kia kite mai i toku mata nei, me aere mai koe kiaku nei, kia kore koe e arataki katoa mai ia Mikala i te tamaine a Saula ra.

14 Kua tono aturā Davida i te au karere ki te tamaiti a Saula ia Iseboseta, karanga atura, Ka tuku mai ana i taku vaine ra ia Mikala, i taku i akaipoipo i te au kiri mua o te Philiseti okotai anere ra.

15 Kua tono aturā Iseboseta i te karere, kua rave maira iaia i tana tane ia Phalatiela te tamaiti a Laisa.

16 Kua aere katoa oki tana tane na te arataa, i te aue aere anga, e tae akera ki Bahurima. Kua karanga ua aturā Abenera kiaia, Ka aere, ka oki. E kua oki atura aia.

17 Kua karanga aturā Abenera ki te aronga pakari i Iseraela, na ko atura, I kimi oki kotou ia Davida i muatangana ei ariki i runga ia kotou:

18 E tenana, ka rave. Kua tuatua mai oki a Iehova ia Davida, na ko maira, Ei te rima o toku tavini o Davida e akaoraʼi au i toku iti-tangata ko Iseraela i roto i te rima o te Philiseti, e i roto oki i te rima o te aronga enemi katoa o ratou.

19 Kua pera oki ta Abenera tuatau i te taringa o to Beniamina: aere atura oki a Abenera e akakite kia Davida i Heberona i te au mea katoa i meitaki ia Iseraela, e tei meitaki oki i te ngutuare katoa ia Beniamina.

20 E tae aturā Abenera kia Davida ra ki Heberona, e te au tangata katoa okotai takau. E kua rave a Davida i te kaingakai na Abenera, e na te au tangata katoa i ona ra.

21 Kua karanga aturā Abenera kia Davida, Ka tu au e aere, e akaputuputu katoa mai ia Iseraela ravarai ki taku pu nei ki te ariki, kia papau ratou i te koreromotu kia koe nei, e kia mana koe ki runga i te aronga katoa i anoanoia e to ngakau na. Kua tuku aturā Davida ia Abenera; e aere atura aia ma te au.

22 E i na, te aere maira te au tavini o Davida, ratou katoa ko Ioaba, i te arumaki anga ra i tetai takanava tangata, e kua apai katoa maira ratou i te apinga maata: kare rā Abenera ia Davida ra i Heberona; kua tuku atu oki aia iaia kia aere ra, e kua riro aia ma te au.

23 E tae mairā Ioaba e te nuku katoa ki ona ra, kua karanga atura ratou kia Ioaba, na ko atura, I ko nei a Abenera te tamaiti a Nera ra, tei aere mai ki o te ariki nei, e kua tuku akenei aia iaia kia aere ana, e kua riro aia ma te au.

24 Kua aere tika aturā Ioaba ki te ariki ra, kua karanga atura, I aa na koe? i na oki a Abenera tei aere mai ki ku nei kia koe nei; eaa ra oki koe i tuku ua atu ei iaia, e kua riro takiri?

25 Kua kite koe ia Abenera te tamaiti a Nera, i aere mai aia e pikikaa ia koe, e kia kite aia i toou na aerenga ki vao, e toou aerenga mai ki roto, kia kite oki aia i te au mea katoa taau i rave ra.

26 E kia taka ke mairā Ioaba ia Davida ra, kua tono akera aia i te au karere kia Abenera, ko tei akaoki mai iaia mei te punavai maira mei Sira: kare rava rā Davida i kite.

27 E tae mairā Abenera ki Heberona, kua arataki ke aturā Ioaba iaia ki te ngutupa ra, e tuatua poiri ua atu ei kiaia, e kua ko iora aia iaia i reira ki raro ake i te îo kaokao ra, no te toto o tona taeake o Asahela, mate iora aia.

28 Kia kite rā Davida a muri atu, kua tuatua akera aia, Kare rava aku e ara i mua i te aroaro o Iehova, e taku basileia katoa e tuatau ua atu, i te toto o Abenera te tamaiti a Nera ra:

29 Kia vai tikai ïa ki runga i te mimiti o Ioaba, e ei runga i te ngutuare katoa o tona metua tane; auraka ra te ngutuare o Ioaba kia kore i te maki, e te lepera, e tei akaangaroi ki runga i te rakau, e tei topa ki te koke, e tei ngere i te kai ra.

30 Kua pera oki a Ioaba, e ko Abisai i tona tuakana, kua ta raua ia Abenera, no te mea kua ta aia i to raua teina ia Asahela ra i te tamaki anga i Gibeona ra.

31 Kua karanga aturā Davida kia Ioaba, e te au tangata ravarai iaia ra, Ka aeae ana i to kotou au kakau, ka tatua ana ki te kakau paoa, ka aue ei ia Abenera. E na te ariki na Davida i aru mai i te apainga.

32 Kua tanu iora ratou ia Abenera i Heberona: e kua akateitei akera te ariki i tona reo, e kua aue iora i te tanumanga ia Abenera; e kua aue katoa te tangata ravarai.

33 Kua aue iora te ariki ia Abenera, e tuatua akera, Eaā Abenera i mate ei i te matenga o te tangata neneva?

34 Kare oki oou puke rima i ruruia, kare oou puke vaevae i tapekaia: mei te tangata e topa nei ki mua i te aroaro o te au tangata kino ra, mei te reira katoa koe i toou na inga! Kua aue akaou iora te tangata ravarai ki runga iaia.

35 E kia aere mai te tangata katoa e tuatua kia Davida e kaikai koi vai ake te ao, kua taputou aturā Davida, karanga atura. Kia pera mai te Atua kiaku, e kia maata mairai, kia tongi ua atu au i te faraoa, e te au kai katoa ra, e kia topa ua atu te rā.

36 Kua akara tamou maira te tangata ravarai i te reira, e kua mareka ratou; ko ta te ariki i rave ra kua mareka katoa ïa te tangata katoa.

37 Kua kite oki te tangata katoa, e Iseraela katoa, i taua rā ra, kare no te mea e na te ariki i akaue i taia;i a Abenera, te tamaiti a Nera ra.

38 Kua karanga atu rai te ariki ki tona au tavini, Kare kotou i kite e, e ariki e e tangata maata tei topa i Iseraela i teianei rā?

39 E te parukaua nei au i teianei rā, kua akatainuia oki ei ariki; e eianei puke tangata i nga tamariki a Zeruia, te ketaketa rava nei: na Iehova e tutaki mai i te rave i te kino kia tau tikai ki tona kino.