Iobu

13 I NA, kua kite taku mata i taua au mea katoa nei; kua akarongo oki taku taringa, e kua kite.

2 Ko ta kotou i kite ra, kua kite katoa au: kare au i iti ia kotou.

3 E karanga tika atura au ki te Mana katoatoa, e te inangaro nei au ko maua ko te Atua ka akatakaʼi i taku tuatua.

4 Ko kotou ra, e aronga kimi tuatua pikikaa ïa, e aronga rapakau puapinga kore anake kotou.

5 Angairi oki kotou e muteki takiri rava atu e! ko to kotou ïa pakari ko te reira ra.

6 Akarongo mai ana ra kotou i taku nei tuatua i tenana, e ta toku vaa nei ka akataka, ta kotou ïa e akarongo mai.

7 Ei tuatua kino ainei ta kotou no te Atua? e ko te tuatua pikikaa ainei ta kotou e tuatua nona?

8 E akara atu ainei kotou i tona tu? e māro ainei kotou no te Atua?

9 E meitaki ainei kia kimi matatio mai aia ia kotou? e vare ainei aia ia kotou, mei te tangata i pikikaaia nei?

10 E akamura tikaia mai kotou e ia, kia taopa pikikaa atu kotou i te tangata.

11 Kare ainei kotou e mataku i te mekameka nona? kare ainei kotou e rokoia e te koiriria iaia?

12 Ta kotou au tuatua i tangaakaputuia ra, e reu ua ïa; ta kotou au ututua ra, ei ututua vari ïa.

13 Ka muteki ua ana kotou, e kia tuatua ana au, na te rokoia au e tetai mea ke, vaoo atu ïa kia tae mai.

14 E akapeea oki, ka rave rai au i toku kiko ki toku nio, e ka tuku rai au i toku ora ki roto i toku rima?

15 Ta oti mai aia iaku, ka irinaki atu rai au iaia; e akatika ra au i toku uaorai au aerenga ki mua i tona aroaro.

16 Ko te ora oki aia noku: kare oki te pikikaa e tae ki mua i tona aroaro.

17 E akarongo meitaki mai na kotou i taku tuatua; e taku i akakite atu na, i to kotou pukai taringa.

18 I na, kua akataka ana au i taku tuatua i tenana; kua kite au e ka akatikaia mairai au.

19 Koai te tangata te ka taumāro mai iaku ra? e muteki ua ïa au i reira, e mate ua atu.

20 Auraka ra koe e rave i nga mea e rua iaku nei; e kare au e uuna iaku uaorai ia koe i reira:

21 Kia atea ke atu to rima iaku nei: e auraka au e mataku i te mekameka noou ra.

22 Ka kapiki mai ei koe, e naku e io atu: e kare ra, ko au te kapiki atu, e naau e tuatua mai kiaku ra.

23 Kua peea te rai o toku kino ma taku ara? Ka akakite mai iaku kia kite au i toku kino, ma taku ara.

24 Eaa oki koe i uunaʼi i to mata, e i akono mai ei koe iaku ei enemi noou?

25 E aeae ainei koe i te rau i peke i te matangi ra? e arumaki ainei koe i te kata marō?

26 Te tata nei oki koe i te au mea maramara iaku nei, e te uri maira i te au ara a toku ou anga ki runga iaku.

27 Te momono katoa nei koe i oku vaevae ki roto i te patiti, e te akara matariki nei i toku katoa nei au aerenga; te akapini ra koe i oku tapuae ki te akairo.

28 Kua pou oki au, mei te mea pe ra, mei te kakau i pou i te neu ra.