Malaki

3 I NA, e tono au i taku karere, e nana e akamaka i te ara i mua iaku, e te Atu ta kotou e kimi na, ko te ka tae vave mai ïa ki tona ra nao, koia oki te karere a te koreromotu ta kotou i rekareka na: i na, e tae mai aia, te tuatua mairā Iehova Sabaota ra.

2 Ka tika ra iaai ra kia akakoromaki i te rā e aaere mai ei aia ra? e koai te ka mou kia mama mai aia ra? kua aite oki aia ki te ai a te tamā moni ra, e mei te pua a te tamā kakau ra.

3 Ka noo mai aia mei te tamā e te akameitaki i te ario ra; ka akameitaki aia i te au tamariki a Levi, e ka tamā aia ia ratou mei te auro, e mei te ario ra, kia apai oki ratou i te atinga tuatua-tika kia Iehova ra.

4 Ei reira e riro ei te atinga a Iuda e ta Ierusalema ei mea mareka na Iehova, mei tei te au rā taito ra, e mei tei te au mataiti muatangana ra.

5 E akavaitata atura au ia kotou i te akava anga; e riro ïa au ei kite viviki ki runga i te aronga purepure, e ki runga i te aronga e taputou pikikaa, e ki runga i te aronga e akangere i tei ouia ra i tana tutaki, te vaine takaua, e te matiroeroe, e tei ruri ke atu i te tangata ke i tana, e kare i mataku mai iaku, te tuatua mairā Iehova Sabaota ra.

6 No te mea, ko Iehova au, kare au e tu ke ke, no reira kotou, e te au tamariki a Iakoba, i kore ei i pou.

7 Mei te au rā maira oki o to kotou ai metua ra to kotou ariu ke anga i taku ra au akonoanga, e kare i tāpu i te reira. E ariu mai kotou kiaku, e naku e ariu atu kia kotou, te tuatua mairā Iehova Sabaota ra. Te tuatua mai nei ra kotou, E oki atu matou ki te aa?

8 E keia ainei te tangata nei i ta te Atua? Kua keia maira kotou i taku ra. Te karanga nei ra kotou I keia matou i taau i te aa? I te ngauruanga o te apinga e te au atinga.

9 Kua taumaaia kotou ki te taumaa, no te mea, kua keia anake kotou, te enua katoatoa nei, i taku.

10 Ka apai mai na kotou i te ngauruanga o te au apinga ravarai ki roto i te are vairanga, kia mangaia taku are nei, ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.

11 E no kotou e akamura atu ei au i te kai aere, e auraka aia e kai i te manga o to kotou enua; e kare oki ta kotou vine i roto i te kainga e akamakaioreia, te tuatua mairā Iehova Sabaota ra.

12 Ka tuatuaia oki e te pa enua katoa, Ko kotou tei meitaki, e riro oki kotou ei enua inangaroia, te tuatua mairā Iehova Sabaota ra.

13 E tuatua mārokiakia ta kotou iaku nei, te tuatua mairā Iehova Sabaota ra. E te tuatua maira kotou e, Eaa ra ta matou tuatua ia koe?

14 Kua karanga kotou e, E mea puapinga kore te akamori atu i te Atua: e eaa ta tatou puapinga i te akono anga i tana au akonoanga, e ko tatou i aaere ma te aue ki mua i te aroaro o Iehova Sabaota ra?

15 E tenana te karanga ra tatou i te aronga ngakau parau ra, ko tei meitaki ïa; e te aronga i rave i te kino ra, tei akateiteiia ïa; e te aronga i akakoko i te Atua, kua ora ïa.

16 I reira te aronga i mataku ia Iehova i te tuatua putuputu anga ki tetai ki tetai: e kua akarongo mairā Iehova, e kua kite e kua tataia iora tetai buka manakoanga ki mua iaia, no te aronga e mataku ia Iehova, e tei manako i tona ra ingoa.

17 E ka riro ratou noku, te tuatua mairā Iehova Sabaota ra, i te rā i akatakaia e au ra, ei apinga meitaki rava ra; e naku e akaperepere ia ratou, mei te tangata e akaperepere i tana uaorai tamaiti kia tavini atu kiaia ra. 18 Ei reira kotou e kite akaou ei i te tu ke anga i te tangata tuatua-tika e te tangata kino, i te tangata i akamori i te Atua, e i tei kore i akamori iaia.