Isaia
62 NO ZIONA nei i kore ei au e muteki uaʼi, e no Ierusalema nei i kore ei au e noo uaʼi, e kia puroro atu tana tuatua-tika mei te mea kakā; e te ora nona mei te turama e mura ra.
2 E kite te pa enua i te tuatua-tika naau ra, e te au ariki katoa i toou ra kakā: e e tapaia koe i tetai ingoa ou, na te vaa o Iehova e tapa.
3 e riro oki koe ei korona manea i te rima o Iehova, ei pare ariki i te rima o toou Atua ra.
4 Kare koe e tapa akaouia atu, E tei akarukeia e; kare oki toou enua e tuatua akaouia, E tei tanea e: e tapaia ra koe, E te mea mataora naku: e toou enua, Tei akaipoipoia ra; ka mataora oki a Iehova ia koe, e e akaipoipoia toou enua.
5 Mei te tangata ou oki e akaipoipo i te paretenia nei, e akaipoipo katoa to au tamariki tamaroa ra ia koe: e mei te tane akaipoipo ou e rekareka i tana vaine, e rekarekaʼi to Atua ra ia koe.
6 Kua tukuia e au te tiaki ki runga i to au patu, e Ierusalema, e po ua atu te rā, e ao ua ake te po, kare ratou e muteki ua: e kotou oki tei akapaapaa i te ingoa o Iehova, auraka kotou e muteki ua:
7 E auraka e vaoo iaia kia noo ua ana, e kia akatinamou aia, e kia akariro aia ia Ierusalema ei akameitaki anga i te ao nei.
8 I taputou anā Iehova i tona rima katau, e i tona rima mana, Kare rava au e oronga akaou i taau sitona ei kai na toou au enemi; e kare oki te au tamariki a te tangata ke ra e inu akaou i taau wina, tei roiia e koe ra.
9 Ko te aronga ra e kokoti i te reira, ko te ka kai ïa, ka akameitaki ei ia Iehova; e te aronga e koi aere i te vine ra, ko te ka inu rai ïa i roto i toku au paepae tapu ra.
10 Ka aere kotou, ka aere kotou na roto i te au ngutupa; e akateateamamao ana i te ara no te au tangata ra; e akāū ki runga, e akāū i te arataa ki runga; auraka ei tokatoka; e akatu i tetai reva ki runga no te au tangata ra.
11 I na, kua akakiteia e Iehova, kua tae ki te openga mai o te enua nei: E karanga atu kotou ki te tamaine a Ziona, I na, te aere maira toou Ora; i na, tei iaia uaorai tana tutaki, e tana angaanga ra, tei mua ïa i tona aroaro.
12 E tapaia oki ratou, I te aronga tapu, tei okoia e Iehova ra: e e tapaia oki koe, I tei kimiia ra, Te oire kare i akarukeia ra.