Deuteronomi

25 KIA tupu te tauetono i te tangata nei, e kua aere mai ratou e akava; na te au akava e akava ia ratou, e ka akatika oki i te tangata tuatua-tika, e akaapa oki i te tangata tuatua-kino.

2 E kia tau ki taua tangata tuatua-tino ra kia pāpā, na te akava e akatipapa iaia ki raro, kia pāpāia aia ki mua i tona aroaro, e akono rai i te pāpā anga i tei tau ki tana ara.

3 E tika iaia kia tataki a ngauru anga i te pāpā-anga, auraka ra ei ara; ko te akaara aea aia, e kua akamaata roa i te pāpaanga, riro iora to taeake ei mea puapinga kore ki mua i to mata na.

4 Auraka koe e topiri i te vaa o te puakatoro e takatakai i te sitona ra.

5 E puke taeake tei noo kapipiti, mate iora tetai kare e tamariki, auraka te vaine a tei mate ra e akaipoipo ke ua ki tetai tangata ke; ko te taeake o tana tane te ka rave iaia e akaipoipo iaia ei vaine nana, ka rave ei i ta te taeake o te tane ra iaia.

6 E te tama mua tana e anau ra, e tangata kainga ïa ma te ingoa o tona taeake i mate, kia kore tona ingoa e ngaro i roto ia Iseraela.

7 Kia kore ra e tika i taua tangata ra, i te rave i te vaine a tona taeake i mate ra, ei reira te vaine a tona taeake e aere ei ki te ngutupa ki te aronga pakari ra, ka karanga atu ei ra, Kare te taeake o taku tane nei e akatupu i tetai ingoa no tona taeake i Iseraela nei, kare aia e rave i te peu tikai a te taeake o taku tane iaku nei.

8 Ei reira te aronga pakari o tona oire e kapiki atu ei iaia, ka karanga atu ei kiaia; e kia māro aia ra e, kia tuatua e, Kare au e rave iaia;

9 Ei reira te vaine a tona taeake ka aere mai ei kiaia ra ki mua i te aroaro o te aronga pakari ra, ka kiriti ei i tona tamaka i tona vaevae, ka tutuaʼi i te uavare ki tona mata, ka tuatuaʼi, ka na ko ei, E akaperaia te tangata te kore e patu i te are o tona taeake.

10 E ka tapaia oki te ingoa nona i Iseraela nei, Ko te ngutuare o te tangata i kiritiia te tamaka ra.

11 Kia kukumi te tangata ra, tetai e tetai, e kia aere mai te vaine a tetai e vavao i tana tane i te rima o tei moto mai iaia ra, e kua akatika atura i tona rima e opu atura i te ngai akama nona ra;

12 Ka tipu ke koe i te rima o taua vaine ra i reira, auraka to mata e akara aroa mai iaia.

13 Auraka aau ei puke toka ke ke i roto i to pute ra, i te mea maata e te mea ngiti.

14 Auraka taau ei aite ke ke i roto i to are, i te mea maata e te mea ngiti.

15 Kia okotai ra aau toka tikai e te mea tika taau ra, e kia okotai oki aau aite tikai e te mea tika; kia akaroaia toou au rā ki runga i te enua ta to Atua ra ta Iehova e oronga mai noou ra.

16 Ko te aronga ravarai oki e akapera, ko tei rave i te mea tika kore ra, e mea viivii ïa ratou i to Atua ra ia Iehova.

17 E akamaara i ta Amaleka i rave ia koe i te ara tiroa, ka aere mai ei koe mei Aiphiti maira;

18 Iaia i aravei mai ia koe i te ara tiroa ra, e kua ta iora i to muri ia koe ra, i te aronga ravarai i apikepike i topa ki muri ra, ka aanu ei koe, e te roiroi oki; e kare aia i mataku i te Atua.

19 E teianei, kia akanooia koe e to Atua ra e Iehova ma te au i to au enemi ravarai e pini ua ake, ki runga i te enua ta to Atua ra ta Iehova e oronga mai noou, e kua rauka ia koe ei nooanga, ka tangarongaro koe ia Amaleka, auraka kia akamaaraia i raro ake i te rangi nei: auraka te reira kia ngaropoina ia koe.