Deuteronomi

21 KIA kitea uaia atu te tangata taia i te vai ua anga i te kainga, i te enua ta to Atua ta Iehova e oronga mai noou ei nooanga, e kare i kitea tei ta iaia ra;

2 Ei reira te aronga pakari, e te au akava i o ou ra e aere, e anga ai i te au oire i vaitata ki taua tangata i taia ra;

3 E te oire i vaitata atu ki taua tangata i taia ra; ka rave te aronga pakari o taua oire ra i tetai punua puakatoro ua kare i rave i te angaanga, kare i akazugoia ra;

4 E na te aronga pakari o taua oire ra e taki i taua punua puakatoro ua ra, ki te kauvai ora roa, kare e tika kia arote e kia ruru i te ua, ka akataka ke atu ei i te mimiti o taua puakatoro ra ki raro i taua kauvai ra;

5 E aere mai oki te kau taunga ra te ngati Levi i vaitata; ko ratou oki tei ikiia e to Atua ra e Iehova ei rave i te taoonga iaia, ei akaora i te tangata i te ingoa o Iehova, e tei ia ratou oki te tuatua i te au taumāroanga ravarai, e te au ara katoa ra:

6 E orei oki te aronga pakari katoa o taua oire ra, i vaitata i taua tangata i taia ra, i to ratou au rima i rungao i taua punua puakatoro ua i tipuia te mimiti ki raro i te kauvai ra:

7 E ka tuatua oki ratou, e na ko mai, Kare to matou rima i akamaringi i teianei toto, kare oki to matou mata i kite.

8 E aroa mai koe, e Iehova, i toou ra au tangata i Iseraela, i akaoraia e koe ra, auraka oki toou ra au tangata o Iseraela kia tapepeia i te akamaringi i te toto ara kore ra. E ka akakoreia taua ara akamaringi toto ra ia ratou.

9 Taka ke atura te ara i te akamaringi toto ara kore ra ia koe, kia rave koe i te mea tika ki mua i te aroaro o Iehova ra.

10 Kia aere koe ki te tamaki i toou ra au enemi, e kua tukuia mai ratou e to Atua ra e Iehova ki toou na rima, e kua riro ratou ei tuikaa naau ra,

11 Kia akara ra koe i tetai vaine purotu i taua au tuikaa ra, e kua anoano koe i te akaipoipo iaia ra ei vaine naau;

12 E arataki koe iaia ki toou ngutuare i reira; ka varu ei aia i tona mimiti, ka kokoti ei i tona maikuku;

13 E kopae oki aia i te kakau i riro mai ei aia ra, noo uaʼi i toou ra are, aue ei i tona metua tane e tona metua vaine, e kia okotai marama tikai: e muri akera, ka akaipoipo ei koe iaia, ei tane nana, e ei vaine oki aia naau.

14 Kia kore ra koe e anoano iaia, ka tuku ua atu koe iaia kia aere i tona aerenga; auraka rava koe e oko iaia i te moni, auraka oki e akariro iaia ei tavini, no te mea kua taakaaka koe iaia.

15 Toko rua vaine a tetai tangata, e vaine anoanoia tetai, e kare tetai i anoanoia; e kua anau raua, ko tei anoanoia e tei kore i anoanoia ra, i te tamariki nana; e na tei kore i anoanoia te tamaiti tama mua ra;

16 Kia tuku ra aia i tana apinga ki tana au tamariki tamaroa ra, kare e tika iaia kia akariro aia i te tamaiti a tei anoanoia ei mataiapo i mua i te tamaiti a tei kore i anoanoia ra, ko te mataiapo tikai ra:

17 Ka akono ra aia i te tamaiti a tei kore i anoanoia ra ei mataiapo, i te taki rua anga i tana tuanga i te apinga ravarai nana ra; ko te muatangana oki aia o tona maroiroi; ko ta te tama mua, nana ïa.

18 E tamaiti māro, e te upokoango ta tetai tangata ra, kare e akarongo i te tuatua a tona metua tane, e te tuatua a tona metua vaine, e kia akoia mai aia e raua, kare rai e akarongo ia raua:

19 E opu te metua tane e te metua vaine iaia i reira, ka arataki ei iaia ki vao ki te aronga pakari i tona oire ra, e ki te ngutupa o tona ra ngai;

20 Ka karanga atu ei ki te aronga pakari i tona oire, E tamaiti māro taua tamaiti na maua nei, e te upokoango, kare aia i akarongo i to maua reo, e kaimoumou ïa, e te konā kava.

21 E na te tangata ravarai o tona oire e peî iaia ki te toka, e kia mate takiri rava aia; pou atura ia koe i reira te kino i roto ia kotou; kia akarongo to Iseraela katoa ra e kia mataku.

22 Kia rave te tangata i te ara e tau iaia te mate, e kia tamate ravaia aia, e kua ri atura koe iaia ki runga i te rakau;

23 Auraka tona kopapa e vaooia ki runga i taua rakau ra e kia ao te po ra, ei taua rā ra koe e tanu ei iaia; kia kore e viivii to enua ta to Atua ra ta Iehova e oronga mai noou ei nooanga; ko te tangata oki i riia ra, kua taumaaia ïa e te Atua.