1 Paraleipomeno
5 TE AU tamariki a Reubena, te tama mua a Iseraela, (koia uaorai oki te tama mua; no te mea ra, kua akaviivii aia i te roi o tona metua tane, kua apai keia te meitaki o te tama mua ra ki te au tamariki a Iosepha, te tamaiti a Iseraela ra: kare oki i na te tama mua kia tatau i te anauanga.
2 Rauka ua te meitaki i te anauanga ia Iosepha, kua maata aturā Iuda i tona ra ai taeake, e i rauka maira te mataiapo tutara iaia.)
3 Te au tamariki a Reubena, te tama mua a Iseraela; ko Hanoka ïa, e ko Palu, ko Hezerona, e ko Karimi.
4 Te tamariki a Ioela ra; ko tana tamaiti ra ko Semaia ïa, ko tana tamaiti ra ko Goga ïa, ko tana tamaiti ra ko Simei ïa,
5 Ko tana tamaiti ra ko Mika ïa, ko tana tamaiti ra ko Reaia ïa, ko tana tamaiti ra ko Baala ïa,
6 Ko tana tamaiti ra ko Beera ïa, ko tei apai tuikaaia e te ariki o Asura e Tigelata-pilesera: ko tei maata ïa i te ngati Reubena.
7 E tona ra ia taeake i to ratou ra au kopu-tangata, kia tatauia to ratou uki i te anauanga, ko Ieiela te mataiapo, e ko Zekaria,
8 E ko Bela te tamaiti a Azaza, te tamaiti a Sema, te tamaiti a Ioela, ko tei noo i Aroera ra, e tae ua atura ki Nebo e Baala-meona:
9 E te pae katoa i te itinga o te rā tei noo katoia e ia, e tae ua atu ki te tomoanga atu i te medebara i te pae o te vai ra ko Eupharati: kua maata oki ta ratou au puaka i te enua ra i Gileada.
10 E i te au rā o Saula ra kua tamaki iora ratou i te Hagara, ko tei inga i to ratou rima: noo iora ratou i to ratou ra au puakapa, e pini ua akera te pae i te itinga o te rā i te enua ra i Gileada.
11 Noo maira te tamariki a Gada i te pae i aite kia ratou, i te enua ra i Basana e tae atura ki Salaka:
12 Ko Ioela te mataiapo, e ko Saphama i muri ake, e ko Ianai, e ko Saphata, i Basana.
13 E to ratou au taeake no te ngutuare o to ratou ai metua, ko Mikaela ïa, e ko Mesulama, e ko Seba, e ko Iorai, e ko Iakana, e ko Zia, e ko Ebera, toko itu.
14 Teia te au tamariki a Abihaila te tamaiti a Huri, te tamaiti a Iaroa, te tamaiti a Gileada, te tamaiti a Mikaela, te tamaiti a Iesisai, te tamaiti a Iado, te tamaiti a Buza;
15 Ko Ahi te tamaiti a Abadiela, te tamaiti a Guni, ko te mataiapo ïa i te ngutuare o to ratou ai metua.
16 E noo ratou i Gileada i Basana, e to reira au oire, e te au kainga katoa ra i Sarona, i to ratou au kotinga.
17 I tatauia ratou ravarai i to ratou anauanga i te au rā o te ariki o Iuda o Iotama, e te au rā oki o te ariki o Iseraela o Ieroboama.
18 Te au tamariki a Reubena, e te ngati Gada, e tetai pae i te kopu o Manase, e aronga toa anake, e rave rai i te paruru e te koke, e te akainana ana, e kua karape i te tamaki, e a ïa ngauru e a ara i te tausani, e itu oki anere, e ono ngauru ara, ko tei tae ïa ki te tamaki.
19 Kua tamaki iora ratou i te Hagara, e ia Ietura, e ia Napisa, e ia Nadaba.
20 Kua tauturuia ratou kia rave ia ratou, e kua orongaia maira te Hagara i to ratou rima, e te aronga katoa i piri mai ia ratou: kua kapiki atura oki ratou ki te Atua i taua tamaki anga ra, e kua kite maira aia ia ratou; no te mea, kua irinaki ratou iaia.
21 E kua apai ke ratou i ta ratou au puaka; e rima ngauru i te tausani i te kamela, e rua anere e rima ngauru i te tausani i te mamoe, e rua tausani i te asini, okotai anere i te tausani i te tangata.
22 E manganui oki tei topa ki raro kua mate rava, no te mea, na te Atua taua tamaki ra. Noo iora ratou ei tupau ia ratou e tae ua atura ki to ratou uaorai tuikaa anga.
23 Noo iora te au tamariki o te kopu veenga o Manase i taua enua ra: Mei Basana e tae ua akera ki Baala-heremona, e ki Senira e tae ua atura ki te maunga ra ki Heremona, e kua maata atura ratou.
24 Teia oki te aronga mataiapo i te ngutuare o to ratou ai metua, ko Ephera, e ko Isi, e ko Eliela, e ko Azeriela, e ko Ieremia, e ko Hodavia, e ko Iadiela, taua aronga mataiapo ra i te ngutuare o to ratou ra ai metua, e aronga toa ïa, e aronga rongonui ïa.
25 Ara iora ra ratou i te Atua o to ratou ai metua, e kua akaturi aere ratou i te au atua o te au tangata o te enua ra, tei pou i te Atua ki mua i to ratou aroaro.
26 Kua akaarara maira te Atua o Iseraela i te ngakau o te ariki no Asura no Pula, e te ngakau oki o Tigelata-pilesera e ariki rai no Asura, apai ke atura aia ia ratou, i te ngati Reubena, e te ngati Gada, e te kopu veenga o Manase, kave atura ia ratou ki Hala, e ki Habora, e ki Ara, e ki te vai i Gozana, e tae rava akenei ki teianei râ.