1 Paraleipomeno

12 TEIA te aronga i aere mai ki Zikelaga kia Davida ra, ka pipini ei aia ia Saula te tamaiti a Kisa ra: e aronga toa ratou ko tei tauturu mai iaia i te tamaki.

2 To Beniamina ra, i te au taeake o Saula ra, ko teianei ïa, e ana te taoonga, e peke oki te toka kia maka, e peke oki te kakao kia akainana i roto i te ana, e rua rima te katau e te kaui;

3 Ko Ahiezera, ko tei maata ïa, e ko Ioasa, nga tamariki a Semaa i Gibea; e ko Ieziela, e ko Peleta, nga tamariki a Azamaveta; e ko Beraka, e ko Iehu i Anatota,

4 E ko Isemaia i Gibeona, ko tei ririnui ïa i roto i taua toru ngauru ra, e i rungao i taua toru ngauru ra, e ko Ieremia, e ko Iehaziela, e ko Iohanana, e ko Iosabada i Gedera,

5 Ko Eluzai, e ko Ierimota, e ko Bealia, e ko Semaria, e ko Sephatia i Haruphi,

6 Ko Elikana, e ko Iesia, e ko Azareela, e ko Iozera, e ko Iasobeama i Kora,

7 E ko Ioela, e ko Zebadia, nga tamariki a Ierohama i Gedora.

8 To te ngati Gada i akataka ia ratou uaorai e kua aere mai ki runga i te punanga i te medebara kia Davida ra, e aronga tangata ririnui ïa, e aronga toa ko te tau ïa i te korare e te paruru, ko tei tau to ratou mata ki te mata liona, e mei te au zabi ki runga i te au maunga ra te viviki;

9 Ko Ezera tei mua, ko Obadia te toko rua, ko Eliaba te toko toru,

10 Ko Misemana te toko a, ko Ieremia te toko rima.

11 Ko Atai te toko ono, ko Eliela te toko itu,

12 Ko Iohanana te toko varu, ko Elizabada te toko iva,

13 Ko Ieremia te ngauru, ko Makabanai te ngauru ma tai.

14 Ko te au tamariki a Gada taua aronga ra, e aronga rangatira no te nuku: ko tei iti ra okotai anere tana, e ko tei maata ra okotai ana tausani.

15 Ko taua aronga ra ïa i aere ki tetai pae Ioridana i te marama mua ra, ka pani ravaʼi te vai i runga i nga nia ra; puerikiriki ke atura ia ratou to te o katoa ra, i te pae i te itinga o te rā e te opunga o te rā.

16 E tae maira tetai pae i te au tamariki a Beniamina, e ta Iuda, ki te punanga kia Davida ra.

17 Kua aere aturā Davida ki vao e aravei ia ratou, e kua karanga atura kia ratou, na ko atura, E tere au to kotou e tauturu mai iaku, e tau katoa toku ngakau kia kotou; i aere maira kotou e tuku pikikaa mai iaku ki toku nei au enemi, kare ra oku e takinga-kino i toku nei rima, na te Atua o to tatou ai metua e akara mai, e e tutaki mai.

18 Kua uruia iora te tangata maata i taua au rangatira ra, ko Amasai, e te Vaerua i reira, e kua tuatua akera, Noou matou nei, e Davida, e no toou ra pae, e tenana tamaiti a Iese e; ei au! ei au toou, ei au oki to tei tupae mai ia koe ra; ko to Atua oki tei tauturu mai ia koe. Kua āriki mairā Davida ia ratou i reira, e kua akariro ia ratou ei aronga rangatira no te au takanava ra.

19 Kua topiri maira tetai pae o Manase kia Davida, iaia i kapiti katoa ki te Philiseti e tamaki atu ia Saula ra: kare ra ratou i tupae ia ratou: i akaokiia maira aia e te aronga mamaata o te Philiseti, ka kimi ei ratou ra, tuatua akera, Kia kapiti rai aia ki tona pu ra kia Saula, ko to tatou au mimiti te tutaki.

20 Te aere ua ra aia ki Zikelaga, kua aere maira no ko i o Manase ra, ko Adana, e ko Iozabada, e ko Iediaela, e ko Mikaela, e ko Iozabada, e ko Eliu, e ko Zilitai, e rangatira no te au tausani i o Manase ra.

21 Kua tauturu ratou ia Davida i te takanava ngati Amaleka ra: e aronga toa anake oki ratou, e au rangatira no te nuku ra.

22 Te aere ua maira oki ratou i tera rā i tera rā e tauturu ia Davida i taua tuatau ra, e riro ua atura tona ei nuku maata mei te nuku a te Atua ra.

23 Teia te tu o te rainga o taua au takanava i aere mai, kua rakeiia no te tamaki, kia Davida ki Heberona ra, e ruri te basileia o Saula kiaia, ta Iehova i tuatua maira.

24 To te au tamariki a Iuda ra, e ono ïa tausani, e varu anere, ma te korare e te paruru, ma te rakei no te tamaki.

25 To te au tamariki a Simeona, e aronga toa e tu ki te tamaki, e itu ïa tausani, okotai anere.

26 To te au tamariki a Levi ra, e a ïa tausani, e ono anere.

27 E ko Iehoiada te arataki i te ngati Aarona, e toru ana tausani, e itu anere.

28 E ko Zadoka, e tangata ou, e toa ririnui, e te au rangatira e rua ngauru e rua ara, no te ngutuare o tona metua tane.

29 To te au tamariki a Beniamina, te au taeake o Saula ra, e toru ïa tausani; te tiaki ra oki te maata o ratou i te ngutuare o Saula ra.

30 To te au tamariki a Epheraima ra, okotai takau ïa tausani, e varu anere, e aronga toa anake, e te rongonui i te ngutuare o to ratou ai metua ra.

31 To te kopu veenga o Manase ra, okotai ïa ngauru ma varu i te tausani, ko tei akaikiia to ratou ingoa , e aere mai e akaariki ia Davida.

32 To te au tamariki a Isakara ra, to ratou aronga mamaata ra e rua ïa anere, e aronga karape i te kite, ko tei kite i te ravenga e tau ei ia Iseraela i taua tuatau ra, e akarongoia mai oki e to ratou ai taeake katoa ra.

33 To te ngati Zebuluna, ko tei tae ki te tamaki ra, ko tei kakape i te tamaki, i te au taoonga tamaki katoa ra, e rima ïa ngauru i te tausani tei aere mai, ko tei akono tikai i te tupati ra: kare ïa te aronga ngakau rua.

34 To te ngati Naphatali ra, okotai tausani ïa aronga rangatira, e toru ngauru ma itu i te tausani i te tangata, ma te paruru e te korare.

35 To te ngati Dana ra, e aronga karape i te tamaki, e rua ngauru ma varu i te tausani, e ono oki anere.

36 To te ngati Asera ra, ko tei tae ki te tamaki, ko tei kakape i te tamaki ra, e a ïa ngauru anga i te tausani.

37 E to te ngati Reubena, e te ngati Gada, e te kopu veenga o Manase, i tetai pae Ioridana ra, ma te au taoonga tamaki katoa kia tamaki ra, okotai ïa anere e rua ngauru i te tausani.

38 Ko taua aronga tamaki katoa nei, ko tei akono tikai i te tupati ra, tei aere katoa mai ïa ma te ngakau meitaki ki Heberona, ei akaariki ia Davida ki runga ia Iseraela katoa ra; okotai katoa ïa ngakau to te toenga o Iseraela ravarai ra, e akaariki rai ia Davida.

39 I reira ratou ia Davida ra, ka toru akera râ, i te kai anga e te inu anga: e mea akonokonoia oki e to ratou au taeake na ratou.

40 E te aronga i vaitata mai oki ia ratou ra, ko Isakara, e ko Zebuluna, e ko Naphatali, tei akaoro mai i te kai na runga i te asini, e te kamela, e te mule, e te puakatoro, i te manga, te faraoa, te au kou suke, e te au kaui vine, e te wina, e te inu, e te puakatoro, e te mamoe e manganui: kua mareka oki Iseraela.