1 Paraleipomeno

22 KUA tuatua akerā Davida, Teia te are o te Atua ra ko Iehova, teia oki te atarau atinga karakaratio na Iseraela.

2 Kua akaue aturā Davida e akaputuputu mai i te aronga tangata ke i te enua ra i Iseraela; e kua tono akera aia i te tarai toka, ei tarai i te toka ei patu i te are o te Atua ra.

3 Kua akonokono iorā Davida i te auri e manganui ei nairo no te au pa i te au ngutupa, e no te topirianga; e te veo e manganui kare i aiteia;

4 E te arezi kare e ope kia tatau: to Sidona oki e to Turia te apai mai i te arezi e manganui kia Davida.

5 Te tuatua ra oki a Davida, Ko taku tamaiti nei ko Solomona, te vai ou nei aia e te pakari kore, e te are te ka akatuia nei no Iehova, ka riro ïa ei maata, ei teitei, ei rongonui, e ei kakā, e pini ua ake te pa enua katoa nei: e teianei ka kopî oki au i te apinga no te reira. Kua kopî atura oki a Davida i te apinga maata ka mate atu ei ra.

6 Kua tiki atura aia i tana tamaiti ia Solomona i reira, kua ikuiku atura iaia e akatu i tetai are no te Atua o Iseraela no Iehova.

7 Kua karanga aturā Davida kia Solomona, E taku tamaiti, ko au nei rai, ko roto oki i toku ngakau e akatu i tetai are no te ingoa o taku Atua no Iehova:

8 Kua tae maira ra te tuatua a Iehova kiaku nei, na ko maira, E toto maata tei maringi ia koe, e tamaki maata taau: auraka koe e akatu i te are no toku nei ingoa, no te mea e toto maata tei maringi ia koe ki mua i toku mata ki runga i te enua nei.

9 I na, ka anau mai tetai tamaiti naau, ka riro aia ei tangata noo ua; naku oki e oronga i te au nona e pini ua ake i tona katoa ra au enemi: ka riro oki tona ingoa i te tapaia ia Solomona, naku oki e oronga mai i te au; e te noo ua ia Iseraela i tona ra au rā.

10 Nana e akatu mai i tetai are no toku nei ingoa; ei tamaiti aia naku, ei metua oki au nona; e ka akatinamou oki au i te terono a tona ra au ki runga ia Iseraela e tuatau ua atu.

11 E tenana, e taku tamaiti, ei vaitatâ Iehova ia koe; kia manuia taau, e e akatu i te are o to Atua o Iehova, tana oki i tuatua maira ia koe ra.

12 Kia oronga mairā Iehova i te pakari e te kite kia koe, e kia ikuiku mai aia ia koe ia Iseraela, kia akono koe i te ture a to Atua ra a Iehova.

13 Ei reira e manuia mai ei taau, kia akono tikai koe i te au akonoanga, e te au tuatua-tau, ta Iehova i ikuiku ia Mose ra ia Iseraela; e kaumaiti, e akamaroiroi; auraka e mataku, auraka e tumatetenga.

14 I na, i teianei, i toku tumatetenga anga ra kua kopî au i te apinga no te are o Iehova, okotai anere anga i te tausani i te taleni auro, okotai oki tausani anga i te tausani i te taleni ario; e te veo e te auri kare ïa e aite; kua maata rava oki: e te rakau katoa, e te toka, tei kopîia e au; e naau e akarava atu i te reira.

15 E te aronga taunga oki e manganui, tena ia koe ra; i te aronga kite i te tarai toka e te rakau; e te aronga karape oki no te au angaanga katoa ra.

16 Tena te auro, te ario, e te veo, e te auri, kare e tika kia tatau. Ka tu ka rave, e ei vaitata katoao a Iehova ia koe.

17 Kua akaue katoa akerā Davida i te au mataiapo ravarai i Iseraela ra, kia tauturu mai i tana tamaiti ia Solomona, na ko maira,

18 Kare ainei tei vaitata katoa to kotou Atua ra ko Iehova ia kotou? kare ainei aia i oronga mai oki i te au kia kotou e pini ua ake? kua oronga mai oki aia i to te enua nei ki roto i toku nei rima; e kua vi te enua ki mua i te aroaro o Iehova, e ki mua i tona nei iti-tangata.

19 E tenana, e akamou ana i to kotou ngakau e to kotou vaerua, ei te kimi i to kotou Atua ra ia Iehova; ka tu i tenana, ka rave kotou i te ngai-tapu a te Atua ra a Iehova, kia apaiia mai te aruna koreromotu a Iehova, e te au âriki katoa i akatapuia na te Atua ra, ki roto i te are, te ka akatuia no te ingoa o Iehova.