Ieremia

33 TAE maira oki te tuatua a Iehova kia Ieremia, ko te tu rua ïa, te tapeka uaia ra aia ki roto i te paepae o te are tapeka anga, na ko maira,

2 Te na ko mairā Iehova, ko Tei anga i te reira ra, ko Iehova tei akaaite i te reira, e tei akatinamou i te reira; ko Iehova tona ingoa;

3 E kapiki mai kiaku, e naku e tuatua atu kia koe, e e ravenga maata taku e akakite atu kia koe, e te taea kore, kare i kitea e koe ra.

4 Te na ko maira oki te Atua o Iseraela ko Iehova, i te au are o teianei oire, e i te au are o te au ariki o Iuda, tei ngaangaa i te au ravenga tamaki, e te koke;

5 Te aere maira ratou e tatamaki ki te au Kaledea, ka riro ra i te akaki i te reira ki te au kopapa tangata mate; i tei taia e au i toku riri, e te riri otooto noku nei, i uunaʼi oki au i toku mata i teianei oire, no to ratou au kino katoa.

6 I na, ka apai mai au i te meitaki, e te ora, e naku ratou e akaora, e akakite ua atu au i te au nuingangare no ratou, e te tuatua-mou.

7 E naku e akaoki mai i to Iuda i tuikaa ra, e te au tuikaa o Iseraela; e e patu au ia ratou mei tei muatangana ra.

8 E ka tamā au ia ratou i to ratou au kino katoa ra, i ara ai ratou iaku nei; e akakore oki au i to ratou katoa ua kino, i ara ai ratou iaku nei, e i tatipake uaʼi ratou iaku nei.

9 E riro te reira ei ingoa rekareka iaku nei, ei akameitaki, e ei akangateitei, i te au enua katoa o te ao nei, te ka akarongo i te au meitaki katoa taku e rave no ratou ra: e riro ratou i te mataku e te ruketekete, i te au meitaki katoa ra, e te au mea manuia katoa ra, taku e rave no te reira ra.

10 Te na ko mairā Iehova; Ka akarongo akaouia i teianei ngai, i ta kotou i karanga ra e, Kua tanea, kare e tangata, e kare oki e puaka, i te au oire o Iuda nei, e te au arataa i Ierusalema, tei vai tanea ua, kare e tangata, e kare oki e nooia, e kare oki e puaka.

11 Te reo rekareka, e te reo pereperekavana, te reo o te tane akaipoipo ou, e te reo o te vaine akaipoipo ou, te reo o te aronga i tuatua e, E akameitaki ia Iehova Sabaota ra: e meitaki oki to Iehova; e tu oki tona aroa e rimua: e to te aronga i apai mai i te atinga akameitaki ki roto i te are o Iehova. E akaoki mai oki au i te tuikaa o teianei enua, mei tei muatangana ra, te tuatua mairā Iehova.

12 Te na ko mairā Iehova Sabaota ra; E riro akaou i teianei ngai, i tei tanea nei, kare e tangata, e kare oki e puaka, e i te au oire katoa nei, ei nooanga no te aronga tiaki mamoe, e ei ngai akamoe aere anga i te au anana ra;

13 I roto i te au oire no te au maunga, i roto i te au oire no te ngai akaaka, e roto i te au oire i te pae i apatonga, e i roto i te enua o Beniamina, e roto i te au ngai i vaitatao i Ierusalema, e i roto i te au oire o Iuda ra, e na reira rai te au anana te aere, na roto i te rima o tei tatau ra, te tuatua mairā Iehova.

14 I na, e tae mai te au rā, te tuatua mairā Iehova, e akatupu ei au i taua mea meitaki ra, taku i akakite i te ngutuare o Iseraela, e te ngutuare o Iuda.

15 I te reira au rā, e i te reira tuatau, e akatupu ei au no Davida i te Rara tuatua-tika ra; e nana e rave i te tuatua-tau, e te tuatua-tika, i te enua nei.

16 I te reira au rā e oraʼi Iuda, e e noo ponuiaau ua mai oki Ierusalema: teia oki te ingoa e tapaia nona, Ko Iehovah ta tatou tuatua-tika ra.

17 Te na ko maira oki a Iehova; Kare ravā Davida e ngere i te tangata ei noo ki runga i te terono i te ngutuare o Iseraela;

18 Kare oki e ngere te kau taunga ngati Levi i te tangata i mua iaku nei, ei apai i te atinga karakaratio, e te tutungi i te atinga kai, e te ko i te atinga i te au rā katoa.

19 E kua tae maira te tuatua a Iehova kia Ieremia, na ko maira,

20 Te tuatua mairā Iehova; Kia tika ia kotou kia akaatikau i taku nei koreromotu i te ao nei, e taku nei koreromotu i te po nei, e auraka ua atu ei ao e te po i to raua tuatau:

21 Ei reira taku koreromotu ki toku tavini nei kia Davida e akaatikau katoaiaʼi, e ngere ei oki aia i te tamaiti i te noo anga ki runga i tona terono ei ariki; e te kau taunga ngati Levi, toku aronga tavini.

22 Mei te nuku o te rangi kare e ope kia tatau ra, e te one taatai kare e tika kia aite ra: mei te reira toku akamaata anga i te uanga o taku tavini ra o Davida, e te au ngati Levi e tavini mai iaku nei.

23 Kua tae maira oki te tuatua a Iehova kia Ieremia, na ko maira,

24 Kare ainei koe i kite i ta teianei au tangata e tuatua nei, i te na ko anga mai? Nga kopu e rua nei i ikiia e Iehova ra, ratou tei akarukeia e ia. E kua akavaavaa ratou i toku ra au tangata, mei te mea kare ratou e riro akaou ei enua tangata ki mua ia ratou ra.

25 Te na ko mairā Iehova; Kua kore taku nei koreromotu i te ao e te po nei, e kua kore iaku te au akonoanga o te rangi e te enua;

26 Ei reira au e akaruke ei i te uanga o Iakoba, e to te tavini noku ra, to Davida, e kare atura au e rave i tona uanga ei tutara ki runga i te uanga o Aberahama, e to Isaaka, e to Iakoba: e akaoki mai au i to ratou i tuikaa ra, e aroaia ratou e au ra.