Salamo

57 E AROA mai iaku, e te Atua e, e aroa mai; te irinaki nei oki toku vaerua ia koe: ei roto i to maru peau toku akapuanga, e kia taka ke teianei au mea tumatetenga.

2 Ka kapiki ua ki te Atua, ki Tei Teitei ra; ki te Atua ko tei akatupu i te au mea katoa noku.

3 Ka tono mai ïa aia no te rangi mai kia ora au, ka taakama atu ei iaia ko tei anoano i te apuku ua mai iaku. Sela. Na te Atua e tono ua mai i tona aroa, e tana tuatua-mou.

4 Te noo nei toku vaerua i rotopu i te au liona; te moe nei au i rotopu i te au tangata e ka ua nei to ratou riri; to ratou au nio, e korare ïa, e te kakao, e to ratou au arero, e koke kokoi ïa.

5 Kia akateiteiia koe, e te Atua, ki rungao i te au rangi; toou kakā ki rungao i te enua katoa nei.

6 E kupenga tei tukuia e ratou no toku takainga vaevae; e kua taakaakaia toku vaerua; e vaarua tei koia e ratou ki mua iaku: ko ratou uaorai ra tei topa ki roto. Sela.

7 Kua mou toku ngakau, e te Atua, kua mou toku ngakau; ka imene au, e e akameitaki rai au.

8 E ara, e toku kakā; e ara, e te nabala e te kinura! e ara rai au i te popongi akirata!

9 Ka akameitaki au ia koe, e te Atu, i rotopu i te au tangata nei; ka imene au ia koe i rotopu i te au enua.

10 Kua maata oki to aroa e tae ua atu ki te au rangi ra; e taau tuatua-mou ra e tae ua atu ki te au tumurangi ra.

11 Kia akateiteiia koe, e te Atua, ki rungao i te au rangi; toou kakā ki rungao i te enua katoa nei.