Salamo

80 E AKARONGO mai, e te Tiaki o Iseraela e, ko tei arataki ia Iosepha mei te anana ra: ko tei noo ki runga i nga kerubi ra, e akakakā mai.

2 Ki mua i te aroaro o Epheraima, e ko Beniamina, e ko Manase ra, e akamaroiroi koe, e aere mai e akaora ia matou.

3 E akaariu koe ia matou, e te Atua e, kia kakā mai oki to mata, e ka ora ïa matou.

4 Eaa te roa, e te Atua Sabaota, e Iehova, i toou riri anga i te pure a to au tangata nei?

5 Kua angai koe ia ratou ki te kai roi-mata, e kua tuku mai i te roi-mata na ratou e inu e kua maata.

6 Kua akariro koe ia matou ei tauetono-anga na to matou au tangata tupu; e te kata aviri ua maira to matou au enemi.

7 E akaariu koe ia matou, e te Atua Sabaota e, kia kakā mai oki to mata ra, e ka ora ïa matou.

8 E vine taau i rave mai mei Aiphiti maira: kua vaere koe i te au etene, e kua tanu iora i te reira.

9 Kua akaatea koe i te ngai ki mua i te reira, e kua toro tona aka, e kua kapi akera te enua.

10 Kua ngaromia te au maunga i te maru nona, e te au arezi teitei i tona au rara.

11 Kua toro tona mangamanga ki taatai, e tona au rara ki te vai maata ra.

12 Eaa oki koe i vavaʼi ei i tona au koro, e kua akiakiia e te aronga katoa e aere na te ara?

13 Te ketuia nei e te puaka toa o te vaorakau ra, e te kaingaia nei e te au puaka ae o te ngangaere ra.

14 E te Atua Sabaota e, e oki mai, ko ta matou ïa tuatua kia koe, e akara mai koe i runga i te rangi kia kite, e atoro mairai koe i taua vine nei;

15 Te rakau oki i tanumia e to rima katau nei, e te mangamanga taau i akaetaeta naau uaorai.

16 Kua tipuia ïa, e kua taʼu naia ki te ai: kua mate ïa i te akamura o to mata ra.

17 Ei runga to rima i te tangata i to rima katau ra, ei runga i te tamaiti a te tangata i akaetaetaia e koe noou uaorai ra.

18 Kare oki matou e akatitima ia koe i reira: e akamaroiroi mai ia matou, e na matou e tautopa i toou ra ingoa.

19 E akaoki mai ia matou, e te Atua Sabaota, e Iehova e, kia kakā mai to mata ra, e ka ora ïa matou.