Iobu

24 KARE oki te au tuatau i ngaro i te Mana katoatoa, no te aa ra te aronga i kite iaia i kore ei i kite i tona rā?

2 Te rave ke nei etai i te kena kainga; te noni ua ra ratou i te au anana, e te angai ra.

3 Te îîa ke nei ratou i te asini a te matiroeroe, e te rave nei ratou i te puakatoro a te vaine takaua ei tutaki.

4 Te tute ke nei ratou i te aronga putaua i te arataa: uipa akera te ao o te enua i te pipini ia ratou.

5 I na, te aere ra ratou ki ta ratou angaanga, mei te au asini momoavao i te medebara; i te tu popongi anga kia rauka te kai: ko te medebara ta ratou kai, e ta te tamariki oki.

6 Te kokoti ra ratou i ta ratou sitona i te kainga: e te koi ra ratou i te kainga vine o te aronga kino.

7 Te akanoo kakau kore ua ra ratou i te aronga putaua, e kare ua e tapoki i te anu.

8 Kua mauu ratou i te ua o te maunga, e no te tapoki kore i piri ei ki te mato ra.

9 Ei runga i te u e aō ei ratou i te matiroeroe, e te rave nei ratou i to runga i te ao ra ei tutaki.

10 Te tuku nei ratou i te aronga putaua kia aere ma te kakau kore, e kia apai i te ruru sitona ma te pongi ra;

11 Te taomi nei ratou i te mori i roto i to ratou au are, te takatakai ra i te vine, e te mate ra i te kaki vai.

12 Te ngunguru ua nei te tangata mei roto mai i te oire, e te kakaoa nei te vaerua o tei puta ra: kare ra te Atua i akono i taua kino ra.

13 Ko te aronga teia kare i tau ki te mārama; kare ratou i kite i tona ra au arataa, kare oki ratou e noo i tona ra au matara.

14 I te mārama anga e tu ei te ta tangata, kia mate te ao, e tei putaua, iaia; e kia po ra kua riro ei keia.

15 E tapapa rai te mata o te akaturi i te poiri, te na ko ra e, Kare e mata e akara mai iaku, ka puroku ei i tona mata.

16 Kia poiri e vavaʼi ei ratou i te are, e kia ao kua akangaro aere ratou: kare ratou i kite i te mārama.

17 E riro oki te popongi ei maru-mate ia ratou: e rokoia iora ratou e te rikarika o te maru-mate i te kitea anga atu.

18 Mei te apinga māmā ratou na runga i te kiriavai; kua akakinoia ta ratou tuanga i te enua nei; kare aia e anga na te arataa o te au kainga vine.

19 Te pou nei te vai kiona i te marō e te pukakā, e te aronga ara i te vaarua.

20 E akangaropoina te kopu iaia; ka nanave te toke i te kai anga iaia; kare rava aia e maara akaouia atu; e ka aatiia te kino mei te rakau ra.

21 Kua takinga-kino aia i tei pa, kare i anau tama na: e kare i takinga-meitaki atu i te vaine takaua.

22 Te kika nei aia i te aronga mana i tona ririnui; e kia tu aia ki runga ra, kare e tangata e manako i te ora.

23 Te tuku ra aia iaia kia noo ponuiaau ua, e kia anga marie te roi; tei runga ra tona mata i to ratou au aerenga.

24 Kua akateiteiia ratou i tetai manga tuatau poto ua, e kare ua, e kua tuku akaakaia ratou ki raro; mei te au mea katoa kua akaputuia ratou ki roto i te menema, e kua kokotiia mei te kaui sitona ra.

25 E kare i te reira ra, naai e akaapa mai i taku, ka akariro ei i taku tuatua ei mea puapinga kore?