Hosea

14 E ISERAELA e, e anga mai koe ki to Atua ra ia Iehova, no te mea kua inga koe i toou ra kino.

2 Kua rave kotou i te tuatua, ka ariu ei kia Iehova: ka tuatuaʼi kiaia, Ka akakore mai koe i te au kino katoa, ka āriki mai ei ia matou ma te aroa: ka oronga atu ei matou i te atinga ra o to matou vaa.

3 Kare Asura e akaora ia matou; kare matou e oro na runga i te au oroenua: kare oki matou e tuatua akaou ki tei angaia e to matou rima, Ko kotou to matou Atua: ei ia koe oki te matiroeroe ra e aroaia mai ei.

4 Naku e akaora i to ratou kotoe anga ki muri, naku e aroa ua atu ia ratou: kua ruri keia oki taku riri ia ratou.

5 E riro au mei te au ia Iseraela: e pua tiareia oki aia mei te lili, e toro oki tona aka mei ia Lebanona.

6 E pararauare ke atu tona au rara, e riro oki tona manea mei to te olive, e tona aunga mei ia Lebanona ra.

7 E oki mai ratou ko tei noo i raro ake i tona marumaru; e ruperupe ra ratou mei te sitona, e e tutupu ratou mei te vine, e tona rongo e aite ïa ki te wina i Lebanona ra.

8 E karanga iora Epheraima, Eaa taku kia rave akaou i te au idolo? Kua akarongo au iaia, e kua akara au iaia: mei te berusi ruperupe ra au: no ko nei atu iaku nei toou ua.

9 Koai tei pakari, ka kite ei i teianei au mea? e te akono meitaki, ka kite ei aia i te reira? kua tika oki te au aerenga o Iehova, e na te aronga tuatua-tika e na reira te aere: kareka te aronga rave ara ra, e inga ïa i reira.