Iobu

34 KUA tamou iorā Eliu i tana tuatua, na ko akera,

2 E akarongo mai i taku tuatua, e te aronga pakari e; e ko kotou oki, e te aronga kite, ariu mai i to kotou taringa iaku.

3 Ko te taringa oki tei timata i te tuatua, mei te vaa e tongi i te kai.

4 Ka iki tatou i te tuatua-tau na tatou uaorai: kia kite tatou uaorai i tei meitaki.

5 I tuatua ana oki a Iobu e, E tuatua-tika taku: e kua akaruke te Atua i taku nei tuatua-tau:

6 Ko taua tuatua-tau naku ra tei akariroia ei pikikaa: e puta ora kore toku, e kare e ara.

7 Koai ïa tangata e aite kia Iobu, ko tei inu i te akavaavaa mei te vai ra?

8 Te piri aere ra aia ki te aronga rave tuatua kino ra, e te aere ra ma te aronga akono kore i te Atua ra.

9 I tuatua ana oki aia e, Kare a te tangata nei e puapinga, akono oti aia i te Atua.

10 E tenana, e akarongo mai kotou iaku, e te au tangata kite ra: kia atea ke atu te tuatua kino i te Atua; e te ara i te Mana katoatoa.

11 E tutaki atu oki aia i ta te tangata ra angaanga, e ei iaia i raukaʼi ta te tangata katoa ra kia tau ki tona ra aerenga.

12 Kare takiri te Atua e rave i te tuatua kino, e kare oki te Mana katoatoa e taruri ke i te tuatua-tau.

13 Koai tei poroki mai kiaia i te enua nei? koai tei akonokono i te ao katoa nei?

14 Naringa tona ngakau i manako iaia, e tika ïa iaia i te akaoki i tona vaerua e te aʼo nona kiaia uaorai;

15 Ope roa akera te tangata katoa i te mate, e riro akaou atura te tangata ei one-pueu.

16 Te kite ra koe i tenana, e akarongo mai i teia: e anga mai i to taringa ki te reo o taku nei tuatua.

17 Ei iaia ainei te au i tei makitakita ki te tuatua-tika? e akaapa ainei koe iaia i tei tika maata roa ra?

18 Koai tei karanga atu ki te ariki ra, E kanga koe? e ki te ui ariki ra, E aronga kino kotou?

19 Ka tanga atu ei kiaia tei kore e akono mai i te tu o te ui ariki, ko tei kore i maata i te akono i te aronga apinga nui, iti iora te aronga putaua? na tona uaorai rima oki i anga ia ratou ravarai.

20 I te kamo anga mata e mate ei ratou, i te turuaipo e ngaueue ei te tangata, e kare akera: e e riro ke atura te aronga mana, kare e rima.

21 Tei runga oki i to te tangata nei au aerenga ona mata, e te akara maira aia i tona ra au takainga ravarai.

22 Kare e poiri, kare e maru-mate, ei pipini anga no te aronga rave tuatua kino ra.

23 Kare oki aia i roa i te akamaara anga mai i te tangata nei, ka tae ei aia ki te akavaanga ma te Atua.

24 E akaungungātiti aia i te aronga ririnui, kare e kimi anga, e e akateitei i tetai aronga ke ei tupau ia ratou.

25 Kua kite oki aia i ta ratou angaanga, kua uriapaka ravaia ratou i te po ra, paîî iora ratou.

26 No te mea e aronga kino ratou, kua ta aia ia ratou i te ngai i akaraia e te tangata;

27 No te mea kua ariu ke ratou mei te aru anga iaia, kare oki i manako i tona katoa ra au arataa:

28 E kua tae rava maira te aue o te ao kiaia, e kua akarongo aia i te aue o te aronga i tinaimateia ra.

29 Kia akamaru maira aia ra, naai e akapekapeka? e kia puroku aia i tona mata, koai tei kite atu? i te enua katoa ra, e i te tangata okotai:

30 Kia kore e riro te au ki te tangata kanga, ko te taiiia aea te au tangata.

31 E mea tika tikai oki kia karanga atu ki te Atua, Kua akoia au, kare au e ara akaou:

32 Ko tei kore i kitea e au ra, e apii mai koe iaku: i rave ana au i te kino ra, kare au e pera akaou.

33 E akono ainei aia i taau ra i te tutaki anga mai, i te na ko anga e, Tei tika ia koe ra, e tei kore i tika, auraka taku uaorai? e tenana ka tuatua ana i taau i kite ra.

34 Kia riro te au tangata kite i te tuatua mai iaku, e te tangata pakari i te akarongo mai iaku.

35 I tuatua ua nā Iobu ma te kite kore, e mea pakari kore oki tana tuatua.

36 Teia toku inangaro, kia timata tikaia ta Iobu e ope rava akera, koia i akatika mai i te tuatua a te au tangata kino.

37 Kua kapiti oki aia i te meameaau ki tana ara, kua pokarakara aia i ona rima i rotopu ia tatou, e kua akamaata aia i tana tuatua ki te Atua.