Numero

23 KUA tuatua mairā Balaama kia Balaka, E patu i nga atarau e itu naku i ko nei, e ka akateateamamao mai oki i nga puakatoro e itu, e nga mamoe toa e itu, naku i ko nei.

2 Kua pera oki a Balaka i ta Balaama i tuatua maira; e kua apai akerā Balaka raua ko Balaama i te puakatoro e te mamoe toa ki rungao i taua au atarau ravarai ra. 3 Kua tuatua mairā Balaama kia Balaka, Tu io na koe i vaitata i taau na atinga karakaratio, e aere ana au: peneiake ko te aere mai a Iehova e aravei mai iaku; e tana e akakite mai kiaku ra, naku ïa e akakite atu kia koe na. Aere atura aia ki runga i te ngai tokoraa ua.

4 Kua aravei maira te Atua ia Balaama: e kua karanga aturā Balaama kiaia, Kua oti iaku nga atarau e itu, e kua apaiia e au te puakatoro e te mamoe toa ki rungao i te au atarau katoa. 5 Kua tuku mairā Iehova i te tuatua ki roto i te vaa o Balaama, e kua tuatua maira, Ka oki koe kia Balaka ra, ka akapera atu koe kia tuatua.

6 Kua oki atura aia kiaia ra, e i na, te tu ua ra aia i vaitata i tana atinga karakaratio, koia e te au tutara katoa o Moabi ra.

7 Kua tuku atura aia i tana maseli, karanga atura, Na te ariki o Moabi, na Balaka, au i arataki mai mei Arama mai, mei te maunga mai i te itinga o te rā ra, na ko maira, E aere mai, e taumaa ia Iakoba, e aere mai e akakino ia Iseraela naku. 8 E akapeea au i te taumaa i tei kore i taumaaia e te Atua ra? e akapeea au i te akakino i tei kore i akakinoia e Iehova ra?

9 I akara ana au iaia i rungao i te au mato ra, i akara au iaia i runga i te au tuaivi ra; i na, e noo taka ke rai taua aronga ra, kare e kapitiia ki roto i te au iti-tangata ra.

10 Naai e tatau i te one-pueu o Iakoba, e te rainga o te tuanga a o Iseraela? Kia riro toku mate mei te mate o te aronga tuatua-tika, e kia riro toku nei openga mei tona! 11 Kua tuatua mairā Balaka kia Balaama, Kua aa io nei oki koe iaku nei? i arataki mai oki au ia koe e taumaa i toku au enemi, e i na, kua akameitaki roa io nei koe ia ratou. 12 Kua karanga atura aia, na ko atura, Auraka au e akono meitaki, e ko ta Iehova i tuku mai ki roto i toku vaa ra, ko taku ïa e tuatua?

13 Kua tuatua mairā Balaka kiaia, E aere mai na ka aere taua ki tetai ngai ke atu, kia kite koe ia ratou i reira; ko te openga ua o taua aronga ra taau ka akara na, kare rai koe e kite ia ratou ravarai: e ei reira koe e taumaa ia ratou.

14 Kua arataki atura aia iaia ki te kainga o Zophima ra, ki rungao i Pisega ra, kua patu iora i nga atarau e itu ra, e kua apai i te puakatoro okotai, e te mamoe toa okotai, ki rungao i taua au atarau ravarai ra. 15 Kua karanga atura aia kia Balaka, Tu io na koe i vaitata i taau na atinga karakaratio, e aere ana au ki ko akera e aravei ia Iehova. 16 Kua aravei mairā Iehova ia Balaama, e kua tuku maira i te tuatua ki roto i tona vaa, e tuatua maira, Ka oki koe kia Balaka ra, ka akapera atu koe kia tuatua.

17 E tae maira aia kiaia ra, e i na, te tu ua ra aia i vaitata i tana atinga karakaratio, e te au tutara o Moabi i vaitata iaia. Kua karanga aturā Balaka kiaia, Eaa ta Iehova tuatua?

18 Kua tuku atura aia i tana maseli, karanga atura, E tu mai koe ki runga, e Balaka, e akarongo mai; e akarongo mai koe iaku, e te tamaiti a Zipora:

19 Kare te Atua i te tangata, ka pikikaa mai ei aia: kare oki i te tamaiti a te tangata, ka tataraaraʼi aia: kua tuatua ainei aia, e kare rai aia e rave? kua tuatua ainei aia, e kare rai aia e akatupu i te reira ra?

20 I na, ko te akameitaki tei tukuia mai kiaku: kua akameitaki oki aia; kare oki i tika iaku kia akakore.

21 Kare o Iakoba kino i kitea e ia, kare a Iseraela ara i akaraia e ia: tei i ona tona Atua ra ko Iehova; e tei rotopu ia ratou te maeva ariki.

22 Na te Atua i arataki mai ia ratou mei Aiphiti mai: mei te ririnui puakatoro taetaevao ra to ratou.

23 Kare rava e purepure ia Iakoba, kare rava e tauraatua ia Iseraela: ka tuatuaia rā Iakoba, e Iseraela katoa oki, kareka mei teianei rai tuatau e, Ko te ravenga a te Atua e!

24 I na, mei te liona tinana ra taua aronga ra kia tu mai ki runga; e mei te liona kia tu ra: ko tei kore e moe ki raro kia kore e pou tei rauka ra i te keingaia, e kia inumia te toto o tei mate ra.

25 Kua tuatua mairā Balaka kia Balaama. Auraka e taumaa atu, e auraka katoa e akaora atu ia ratou.

26 Kua karanga aturā Balaama kia Balaka, na ko atura, Kare au i karanga atu kia koe, i te na ko anga atu e, Ko te au mea katoa ta Iehova e tuatua maira, e akapera au e tikaʼi?

27 Kua tuatua mairā Balaka kia Balaama, E aere mairai koe, e arataki au ia koe ki tetai ngai ke atu; peneiake ko te tika i te Atua e, ei reira koe e taumaa atu ei i taua aronga ra.

28 Kua arataki aturā Balaka ia Balaama ki runga i te take o Peora, i aite tika ki Iesimona.

29 Kua karanga aturā Balaama kia Balaka, E patu i nga atarau naku e itu i ko nei, e rave mai oki i nga puakatoro e itu, e nga mamoe toa e itu, naku i ko nei.

30 Kua akapera oki a Balaka i ta Balaama i karanga atura, e kua apai oki i te puakatoro okotai e te mamoe toa okotai ki runga i taua au atarau ravarai ra.