Levitiku

25 KUA tuatua mairā Iehova kia Mose i te maunga ra ko Sinai, na ko maira,

2 E karanga atu koe ki te tamariki a Iseraela, e na ko atu kia ratou, Kia tae kotou ki te enua taku e oronga atu no kotou nei, ei sabati ta te enua e akono no Iehova.

3 E ruru koe i te ua i toou kainga e kia ono ake mataiti, e ka tope koe i taau vine e kia ono mataiti, e ka akaputuputu mai oki i te ua no te reira ra;

4 Kia tae ra ki te itu o te mataiti ra, ei sabati noo ua ïa no te enua, na Iehova ïa sabati: auraka koe e ruru i te ua i toou kainga, auraka oki koe e tope i taau vine.

5 Auraka koe e kokoti i taau kai mou i tupu ua ra, e auraka katoa e akiaki i te vine i taau vine tope koreia ra; e mataiti noo ua oki te reira no te enua. 6 Kareka ko tei tupu ua i te enua i taua noo ua anga ra, ei kai ra ïa no kotou; naau e to tavini tane, e to tavini vaine, e to tangata i ouia ra, e to tangata ke e uarere ua i roto ia koe na, 7 E na taau puaka, e te au manu o to enua ra, ei kai anake ïa na te reira.

8 E tatau oki koe i nga mataiti sabati e itu, e itu itu anga ïa mataiti; e a ïa ngauru ma iva mataiti e ope ei aua nga sabati mataiti e itu ra.

9 E reira koe e akatangi e i te pu tangi maata, ei te ngauru o te rā i te marama itu ra; i te rā tapokiangaara ra, e akatangi ei koe i te pu e pini ua ake to kotou enua. 10 E akataka kotou i te mataiti e rima ngauru ra, ka tutu aere ei e, e mataraanga no te tangata tini ravarai o te enua e pini ua ake; ei mataiti iubile ïa no kotou; e ka oki akaou kotou katoa, ko te tangata ko tona uaorai kainga tikai; ka oki akaou oki kotou ravarai, ko te tangata ko tona uaorai kopu-tangata. 11 Ei iubile taua mataiti e rima ngauru ra no kotou: auraka kotou e ruru i te ua, auraka oki e kokoti i tei tupu ua i taua mataiti ra, auraka oki e akiaki i te vine i ta kotou au vine tope koreia ra i reira. 12 E iubile oki te reira; ei mea tapu ïa ia kotou: e kai ua kotou i to reira kai mei te kainga mai.

13 Kia tae ki taua mataiti iubile ra, ka oki kotou ravarai, ko te tangata ko tona uaorai kainga tikai.

14 Kia oko kotou i tetai apinga ki to tangata tupu, e kia oko atu i to taua tangata tupu ra noou, auraka kotou e takinga-kino tetai ki tetai; 15 E akono koe i te mataiti i oti ei te iubile kia oko koe i to tangata tupu ra, e akono oki aia i te mataiti ua anga kai i oko mai ei aia ia koe: 16 E mataiti manganui tei toe ra, e akamaata koe i te oko, e te iti ra te mataiti, e akaiti koe i te oko: e akono oki i te au mataiti ua anga kai ka oko ei koe. 17 E teianei, auraka kotou e takinga-kino tetai ki tetai; kia mataku ra koe i to Atua: ko au oki to kotou Atua ra, ko Iehova.

18 E teianei, e akono kotou i taku ra au akonoanga, e e tāpu i taku au tuatua-tau, ko ta kotou ïa e rave; kia noo oki kotou ki runga i te enua ma te au.

19 E manga oki to te enua i reira, e kai oki kotou e ka merengo, noo uaʼi ma te au.

20 E kia karanga mai kotou e, Eaa ta matou kia kai i te mataiti itu ra? i na, auraka matou e ruru i te ua, e auraka ta matou ei kai e akaputuputuia mai i reira: 21 Naku ïa e akaue atu i te meitaki noku nei ki rungao ia kotou i te mataiti ono ra, e ka ua te kai i te reira mataiti e e toru ua atu mataiti e pou ei. 22 Ka ruru oki kotou i te ua i te mataiti varu, e kai ua ra kotou i te kai taito e tae ua atu ki te mataiti iva; e kia ua ua mai to te reira mataiti i te kai ua anga kotou i te kai taito. 23 Auraka te enua e oko akariro roaia ra: noku oki te enua; e tangata ke ke oki kotou, e uarere ua kotou i oku nei.

24 E vaoo ua te enua katoa ta kotou e noo, kia oko akaouia mairai te enua.

25 Kia rokoia to taeake e te putaua, e kua oko aia i tetai pae i tona kainga, kia aere maira to te kopu-tangata nona e oko akaou i te reira ra, e tika ïa iaia kia oko akaou i ta tona taeake i oko ra.

26 E kare ra ona kia oko akaou i taua kainga ra, e tika ra iaia uaorai kia oko akaou i taua kainga ra; 27 E tatau aia i nga mataiti i topa i te oko anga ra, ka akaoki ei i te moni i toe i te tangata tana i oko i taua kainga ra; ka oki akaou ei aia i tona kainga. 28 Kia kore ra e tika iaia, kare ana e rauka akaou ei iaia, e vaoo ua atu tei okoia ra i te rima o tei oko mai, e kia tae ki te mataiti iubile; kia tae oki ki te iubile ra, e tukuia mai ïa, kia oki akaou aia ki tona kainga.

29 Kia oko te tangata i te are nooanga i roto i te oire i patuia ra, ei taua mataiti ra i okoiaʼi ra aia ka oko akaou ei kia oko; kare i ope te mataiti tika tikai ra, e tika iaia kia oko akaou. 30 Kia kore ra e oko akaouia e ope ua atu te mataiti tika tikai ra, ka riro taua are i roto i te oire patuia ra nona roa atu no te tangata i oko, e ope ua ake tona au uki ra; kare ïa e tukuia kia tae ki te iubile ra. 31 Kareka te are no te au vila kare i akapiniia ki te patu ra, ka riro ïa mei te au kainga o te enua ra: e tika te reira kia oko akaouia, e e tukuia oki te reira kia tae ki te iubile.

32 Kareka te au oire o te ngati Levi ra, e te au are i taua au oire no ratou ra, e tika i te ngati Levi kia oko akaou i te reira i te au rā katoa nei. 33 E kia oko akaou tetai ngati Levi i te are, i taua are no tona oire i okoia ra, ka tukuia mai ïa kia tae ki te iubile ra: ko te au are oki no te au oire o te ngati Levi ra, ko to ratou ïa kainga i roto i te tamariki a Iseraela. 34 Kareka te au kainga ki te pae ki vao mai i to ratou au oire ra, kare ïa e okoia; ko to ratou ïa kainga kai mātu te reira.

35 E kia rokoia to taeake e te putaua ra, e kua riro aia ei ao i o ou ra; e tauturu koe iaia mei te tangata ke katoa ra, e te tuitarere; kia noo aia i o ou ra. 36 Auraka koe e rave i te tutaki, auraka e rave i tana; ko toou Atua taau e mataku; kia noo to taeake i o ou ra.

37 Auraka koe e apai i taau moni nana kia tutakiia mai, auraka oki e apai i taau kai nana kia maata taau. 38 Ko au to kotou Atua ra ko Iehova, tei arataki mai ia kotou mei te enua maira mei Aiphiti, kia oronga au i te enua ra ko Kanaana no kotou, e kia riro au ei Atua no kotou. 39 E kia rokoia to taeake e te putaua i o ou, e kia oko aia iaia uaorai kia koe, auraka koe e akaapo iaia mei te tavini ra:

40 Mei te tavini i tutakiia ra, e mei te tuitarere ra, e noo aia i o ou na; ka rave ei i taau angaanga, e kia tae ki te tamaiti iubile; 41 Ei reira aia e aere ke ei, koia ma tana au tamariki, e ka oki aia ki tona uaorai kopu-tangata tikai; e ki te ipukarea o tona ai metua ka oki ïa aia ki reira.

42 E tavini oki ratou noku, taku i arataki mai mei te enua maira mei Aiphiti: kare ratou e okoia mei te tuikaa ra.

43 Auraka koe e akaapo ki rungao iaia, ko toou Atua ra taau e mataku.

44 E oko ra koe i to tavini tane, e to tavini vaine i te au etene i vaitata ia kotou na e pini ua ake; ko ta kotou ïa tavini tane e oko, e te tavini vaine. 45 E te tamariki katoa no te au tangata ke e tuitarere ua i roto ia kotou, e tika ia kotou kia oko ia ratou, e ta ratou au tamariki i o ou, i anau i to kotou na enua; e ka riro ratou ei apinga no kotou.

46 E vaio oki kotou ia ratou no ta kotou au tamariki i muri ake ia kotou, mei te apinga kainga ipukarea ra; ei tavini ratou no kotou e tuatau ua atu: kareka to kotou ai taeake i te tamariki a Iseraela ra, auraka kotou e akaapo ki runga i to kotou uaorai ra.

47 E kia riro tetai tangata ke e tei uarere ua i roto ia koe na ei tangata taoiau, e kia riro to taeake i noo i vaitata iaia ra ei ao, e kia oko aia iaia uaorai ki tera tangata ke i uarere ua i roto ia koe na, e kare ra, ki tetai aka o te kopu-tangata o taua tangata ke ra: 48 Kia okoia aia ra e tika ia kia oko akaou; e tika ki tetai taeake nona kia oko akaou iaia:

49 Te taeake o tona metua tane, e te tamaiti a taua taeake o tona metua tane ra, e tika ïa kia oko akaou iaia, e tetai piritanga katoa nona i tona uaorai kopu-tangata, e tika ïa kia oko akaou iaia; e kia tika oki iaia ra, e oko ua atu aia iaia uaorai.

50 E akatau oki aia i te tuatua i te tangata i oko mai iaia ra, e akono i te mataiti i okoiaʼi aia ra, e tae ua atu ki te mataiti iubile: e akatau oki i te moni e oko iaia i taua au mataiti ra: e akatauia tona tuatau mei te tavini i ouia ra. 51 Te manganui ra te mataiti toe, e akatau tana moni e akaoki ei oko iaia i reira, no roto i te moni i okoiaʼi aia ra. 52 E te iti ra te mataiti toe e tae ei ki te mataiti iubile, e akatau rai tana tuatua iaia, ka akaoki ei i te moni oko iaia kia tau ki tona mataiti ra.

53 Kia riro aia mei te tavini ouia ra, i te noo anga iaia ra, i tera mataiti i tera mataiti; auraka ra aia e akaapoapo ki runga iaia ki mua i to mata.

54 E kia kore aia e oko akaouia mei te reira ra, ka aere ua ïa aia kia tae ki te mataiti iubile, koia, e tana au tamariki katoa ra.

55 E tavini oki te tamariki a Iseraela noku; ko toku ïa tavini ratou, taku i arataki mai mei te enua maira mei Aiphiti: ko au to kotou Atua ra ko Iehova.