Luka

19 E TAE aturā Iesu ki Ieriko tomo atura, na rotopu atura te aere.

2 E i na, tei reira tetai tangata ko Zakaio te ingoa, e tangata apinga; e tutara aia no te au telona.

3 I anoano aia i te akara ia Iesu, kia kite i te tu; e kare akera aia i kite i te maata o te tangata, e tangata poto oki aia.

4 Oro atura aia na mua, kake atura ki runga i tetai rakau sukamino e akara iaia: te na reira maira oki aia i te aere.

5 E tae mairā Iesu ki taua ngai ra, kua akara akera aia ki runga ra, e kite atura iaia, e kua karanga atura, E Zakaio, ka eke mai i tenana; ei to are ra oki au noo ei akonei.

6 Kua eke viviki maira aia ki raro, oo maira iaia ma te rekareka.

7 E kite akera ratou ra, kua koumuumu iora ratou ravarai, na ko akera, Te aere atura aia ei manuiri na te tangata rave ara.

8 Kua tu ua mairā Zakaio ki muao i te Atu, kua tuatua maira, E te Atu, i na, e oronga au i te afa i toku nei apinga no te tangata ngere; e i takinga-kino ana au i etai ke i tetai mea ngiti ake, kia taki a ïa taku e akaoki atu nona.

9 Kua karanga aturā Iesu kiaia, Kua tae mai te ora ki teianei ngutuare i teianei rā, e tamaiti katoa oki aia na Aberahama.

10 I aere mai nei oki te Tamaiti a te tangata e kimi i tei ngaro ra e akaora.

11 E te akarongo maira ratou i taua tuatua ra, kua tuku katoa atura aia i tetai parabole, no te mea te vaitata atura aia ki Ierusalema, e te manako ra ratou e, e kitea mai te basileia o te Atua i reira ra.

12 No reira aia i na ko atu ei. Kua aere atura tetai tangata mana ki te enua mamao, kia rauka iaia te taoonga ariki, e ka oki mai ei.

13 Kua karanga atura aia ki nga tavini tino ngauru nona ra, e kua tuku atura i nga mina okotai ngauru kia ratou, kua na ko atura kia ratou, E oko ua kotou e kia oki mai au ra.

14 Te makitakita ra tona matakeinanga iaia, e kua tono atura i te veka na muri atu, ei na ko atu e, Auraka tenana tangata ei ariki no matou.

15 E oki maira aia, ma te taoonga ariki katoa i rungao iaia, kua akaue atura aia i taua au tavini tana i tuku i te moni ra, e aere mai kiaia, kia kite aia i te tu o te apinga i rauka i ta ratou oko anga.

16 Kua aere maira tetai, kua tuatua maira, E te atu, okotai ngauru mina i rauka i te mina noou ra.

17 Kua karanga atura aia kiaia, Kua tika, e tavini meitaki koe: no te mea kua akono meitaki koe i tenana apinga iti poepoe, ei tutara koe e kia okotai ngauru oou oire.

18 Kua aere maira oki te toko rua, na ko maira E te atu, e rima mina i rauka i te mina noou ra.

19 Kua karanga katoa atura aia kiaia, Ei tutara koe kia rima oou oire.

20 Kua aere maira tetai, na ko maira, E te atu, i na, tera mai te mina noou ra, i vaio marieia e au ki roto i te vaî;

21 I mataku oki au ia koe, no te mea e tangata rotoriri koe: e rave rai koe i tei kore i vaioia e koe ra, e kokoti oki koe i tei kore i ruruia e koe ra.

22 Kua karanga atura aia kiaia, E teianei tavini kino e, e akaapa au ia koe i te tuatua no roto i toou uaorai vaa. Kua kite koe e, e tangata rotoriri au, i te rave anga i tei kore i vaioia e au ra, e te kokoti anga i tei kore i ruruia e au;

23 Eaa iora koe i kore ei i taoi atu i toku moni ki te okoanga ra, e kia tae mai au ra, rauka iora toku ma te oko?

24 Kua karanga atura aia ki te aronga i tu ua i reira ra, Ka rave atu i tona mina, ka o atu ei na te tangata okotai ngauru ona mina ra.

25 (Kua tuatua maira ratou kiaia, E te atu, okotai ngauru oki ona mina.)

26 E akakite atu oki au kia kotou, E apinga maata tona ra, e akamaataia atu rai tona; e apinga iti tona ra, e ravea ke ïa taua iti iaia ra.

27 Kareka taua au enemi noku ra, ko tei kore i āriki mai iaku ei ariki no ratou, arataki mai ana ïa i ko nei i mua i toku nei aroaro, e ta.

28 E oti akera taua tuatua nei, na mua atura aia i te aere anga atu ki Ierusalema.

29 E vaitata atura aia ki Betephage e Betania, i vaitata i te maunga i karangaia ra ko Oliveta, kua tono atura aia i e toko rua puke pipi ana ra,

30 Na ko atura, E aere ana korua ki tera ra vila, e kia tomo atu korua ki roto, ka kite korua i tetai punua asini, kua erekia, kare oki i nooia e te tangata: ka tatara ake, e taki mai.

31 E kia ui mai te tangata kia korua, Eaa korua e tataraʼi? e na ko atu korua, No te mea e tau teia i te Atu.

32 Aere atura raua tei tonokia ra, e rokoia atu koia mou tana i karanga atu kia raua.

33 E tei te tatara anga raua i taua punua ra, kua tuatua maira te au atu, Eaa korua e tataraʼi i tenana punua?

34 Kua karanga atura raua, E tau teia i te Atu.

35 Kua taki maira raua i taua asini ra kia Iesu ra: kua tuku atura i to raua kakau ki rungao i taua punua ra, e kua akanoo atura ia Iesu ki rungao.

36 E i tona aere anga, kua totoa aere ratou i to ratou kakau i te arataa.

37 E vaitata atura aia ki te oire ki te tumu o te maunga ra i Oliveta, kua rekareka iora taua aronga pipi maata katoa ra, e kua kapiki reo nui atura i te akameitaki anga i te Atua, i te au akairo katoa ta ratou i kite ra;

38 Na ko akera, Kia ora te Ariki, ko tei aere mai ma te ingoa o te Atu ra; ei au to te rangi, e te kakā i te ngai teitei.

39 Kua tuatua maira e tokotai puke Pharisea no roto i taua urupu maata ra kiaia, E te Orometua, e ako ake ana koe i to au pipi nei.

40 Kua karanga atura aia kia ratou, E akakite atu au kia kotou, Kia muteki ua ratou nei, kua kapiki ua mai ïa te au toka nei i reira.

41 E vaitata atura aia, kite atura i taua oire ra, aue atura aia,

42 Na ko atura, Naringa koe i kite ana, ko koe tikai, i teianei i toou nei tuatau, i te tuatua e oraʼi koe na! i teianei ra, kua ngaro ke ïa tuatua, kare toou mata e kite.

43 Te vaitata maira oki te tuatau, e akapiniiaʼi koe e to au enemi i te koro, e takako ratou ia koe e pini ua ake, ka tāpu ei ia koe i roto:

44 E ka uri oki ia koe ki raro ki te one, e to tamariki i roto ia koe na; e kare oki tetai toka i roto ia koe na, e vaioia i rungao i tetai: ko koe kare i akamaara i toou na kite angaia mai.

45 Kua tomo atura aia ki roto i te iero, kua tuaru atura ki vao te aronga i oko atu e i oko mai i roto ra;

46 Na ko atura kia ratou, Kua oti i te tataia, “E are pure anga toku nei are” kua akariroia io nei ra e kotou ei “ana no te aronga keia.”

47 E apii aia i roto i te iero i te au rā katoa. Kua umuumu maira te kau taunga nunui e te au tata tuatua, e te aronga nunui katoa, iaia e ta;

48 Kare ra i kite i te ravenga e tikaʼi: te akarongo marie maira te tangata katoatoa iaia.