Iobu

3 E MURI ake i te reira, kua amama akerā Iobu i tona vaa, e kua akakino iora i tona rā.

2 E kua tuatua iorā Iobu kua na ko akera,

3 Kia kore ua te rā i anau ei au nei, e te po i tuatuaiaʼi e, Kua toia e tamaroa.

4 Kia riro taua rā ra ei poiri, auraka te Atua kia na runga mai i te akono i te reira, auraka te mārama kia kakā mai ki runga i te reira.

5 Kia takinokinoia te reira i te poiri e te marumate; kia toakia mai te tumurangi ki runga i te reira; kia rikarikaia i te rā akapoiriia.

6 Ko taua po ra, kia opukia ïa e te poiri; auraka kia kapitiia mai ki te au rā katoa o te mataiti, auraka kia akaoia mai ki roto i te tatauanga o te au marama.

7 I na, kia vaiavare ua taua po ra, auraka te reo rekareka kia o mai i reira.

8 Na ratou e akakino, na tei akakino i te rā; ratou tei karape i te akaara ia Leviatana.

9 Tona au etu aiai kia poiri ïa: kia tiaki te reira i te mārama, e kare ra; e te mārama popongi auraka rai e kitea:

10 No te mea kare i momani i te ngutupa o te kopu iaku, kare oki i uuna ke atu i te aue i oku nei mata.

11 Eaa au i kore ei i mate mei roto mai i te kopu ra? i kore ei au i unui rava iaku i tae mai ki vao mei roto i te kopu?

12 Eaa i tauturu mai ei nga turi iaku? e nga u oki, kia ngoteia e au ra?

13 Kua tiraa ïa au i teianei, e kua muteki ua, kua moe ïa au: e kua akaanga i taku roi i reira,

14 Matou ma nga ariki, e nga tumu korero o te enua nei, ko tei patu i te au ngai meamea no ratou uaorai;

15 Matou e te ui mataiapo no ratou te auro, tei akaki i to ratou au are ki te ario:

16 E kare ra, mei te tamaiti tiria ngaro ua ra, kua kore ïa au; mei te tamaiti varevare, kare i kite i te mārama.

17 Kua akapaki te aronga kino i te akamanamanata i reira; e ei reira tei roiroi e akaangaroi ei.

18 Ei reira te aronga i tapekaia e noo mataku kore uaʼi te ngai okotai; kare ratou e akarongo i te reo o te takinga-kino.

19 Tei reira te aronga rikiriki e te aronga nunui; e kua matara mai te tuikaa i tona pu.

20 Eaa i orongaia mai ei te mārama ki tei tumatetenga ra, e te ora ki tei mamae te ngakau;

21 Ki tei noinoi i te mate, e kare ra; e tei keri ua ra, e iti te keri i te apinga uunaia ra;

22 Ki tei rekareka maata, e kia kite ua ake ratou i te vaarua, kua pereperekavana ïa;

23 Ki te tangata i akangaroia tona arataa, ki tei koropiniia e te Atua?

24 Kua na mua nei toku aue i taku nei kai, e te maringi ua nei toku kakaoa anga mei te vai.

25 Ko taku tikai oki i mataku ra, tei rokoia mai ïa e au, e taku oki i rikarika ra, ko tei iri mai ïa ki runga iaku.

26 Kare oku e au, e kare au e muteki ua ana, e kare rai e tukutuku ua anga iaku; e kua tupu mairai te tumatetenga.