Ezekiela

13 KUA tae maira oki te tuatua a Iehova kiaku nei, na ko maira,

2 E te tamaiti a te tangata na, ka totou koe ki te au peroveta i Iseraela nei i tei totou ra, e karanga atu ki te aronga i totou i to roto i to ratou uaorai ngakau, Akarongo mai kotou i te tuatua a Iehova;

3 Te na ko maira te Atu ra ko Iehova; E ae oki te au peroveta neneva, i tei aru i to ratou uaorai vaerua, e kare ua a ratou mea i kitea!

4 E Iseraela e, e aite to au peroveta ki te au suoli i te ngai motutaa ra.

5 Kare kotou i aere ki roto i te au ngai ngaa, kare oki i rave akaou i te koro, kia mou te ngutuare o Iseraela i te tamaki anga ra, i te rā o Iehova.

6 Te mea puapinga kore ta ratou i kite, e te totouanga pikikaa, i te na ko anga e, Te tuatua mairā Iehova, e kare oki a Iehova i tono ia ratou: e te akatupu ra ratou i te manako e, e tupu rai te tuatua.

7 Kare ainei te orama puapinga kore ta kotou i kite ra, e te totouanga pikikaa ta kotou i tuatua ra, ta kotou oki i karanga ana e, Te tuatua mairā Iehova, e kare rai oki au i tuatua?

8 E teianei, te na ko maira te Atu ra ko Iehova; No te mea e tuatua puapinga kore ta kotou, e ko te pikikaa ta kotou i kite, e teianei, i na, kare au e tau ia kotou, te tuatua maira te Atu ra ko Iehova.

9 E ka riro toku rima ki runga i te au peroveta i tei akara i te mea puapinga kore, e tei akatupu i te totouanga pikikaa: kare ratou e o ki roto i te uipa anga o toku nei au tangata, kare oki ratou e tataia i roto i te tata anga a te ngutuare o Iseraela, kare oki ratou e o ki te enua o Iseraela; e kite oki kotou e ko te Atu ra au ko Iehova.

10 No te mea, koia ïa, no te mea, kua pikikaa ratou i toku ra au tangata, i te na ko anga e, Ei au; e kare ua e au; e na tetai i patu i te patu, e i na, na tetai i peî ki te ngaika kare i naneia ra:

11 E karanga atu ki te aronga i peî ki te ngaika nane koreia ra, e topa ïa; e riro i te ua a vai puke ïa; e ko kotou, e te au ua toka maata, e topa ïa; e ngaangaa ïa i te uriia.

12 E i na, kia ngaangaa taua patu ra, kare ainei kotou e akaperaia mai e, Teiea iora te ngaika ta kotou i peî ra?

13 E teianei, te na ko maira te Atu ra ko Iehova; E ngaangaa ïa iaku i te uriia i te riri otooto noku ra; e riro i te ua a vai puke ra i te riri noku ra, e te ua toka maata ma te riri otooto ra, kia pou rava.

14 E naku e akangaangaa i te patu ta kotou i peî ki te ngaika nane koreia ra, e naku e tuku rava ki rara i te one, e kia kitea ua atu te tango ra; e ka topa ïa, e ko kotou te ka pou i rotopu iora: e kite oki kotou e ko Iehova au.

15 E pera au i te akatupu i toku riri otooto ki runga i taua patu ra, e ki runga i te aronga i peî ki te ngaika nane koreia ra, ka karanga atu ei kia kotou, Kua kore taua patu nei, e kua kore te aronga katoa i peî ra.

16 Koia te au peroveta a Iseraela nei, ko tei totou ia Ierusalema nei, e ko tei akara i te au orama au nona, e kare rava e au, te tuatua maira te Atu ra ko Iehova.

17 Ka ariu katoa atu oki koe i to mata, e te tamaiti a te tangata na, ki te au tamaine a to au tangata nei, ko tei totou i ta to ratou uaorai ngakau; ka totou atu oki koe ia ratou;

18 Ka karanga atu ei, Te na ko maira te Atu ra ko Iehova; E ae oki te au vaine i tui i te au urunga i raro ake i te au poo rima ravarai, e ko tei anga i te vaî upoko no te au tangata katoa, ei arumaki anga i te vaerua! E arumaki rai kotou i te au vaerua o toku nei au tangata, e e akaora ainei kotou i te au vaerua ki o kotou na?

19 E akaviivii ainei kotou iaku i rotopu i toku au tangata, i te rima kerite okotai, e i te vavaanga manga ra, kia mate atu te au vaerua kare e tau te mate, e kia ora oki te au vaerua kare e tau ia ratou te ora, i ta kotou pikikaa anga i toku au tangata e akarongo i te pikikaa nei?

20 E teianei, te na ko maira te Atu ra ko Iehova; I na, kare au e tau i ta kotou au urunga, ta kotou i arumaki ua ana i te au vaerua e rere maira, naku e aae i te reira i to kotou au poo rima, ka tuku atu ei i taua au vaerua ra, te au vaerua oki ta kotou i arumaki na e rere maira.

21 E aae katoa oki au i to kotou au vaî, e kia ora mai toku au tangata i to kotou rima, kare oki ratou e vaooia i roto i to kotou rima kia arumakiia; e kite oki kotou e ko Iehova au.

22 No te mea, kua taitaia te ngakau o te aronga tuatua-tika ia kotou i te pikikaa, i tei kore i akataitaiaia e au ra; e kua akaketaketa kotou i te rima o te aronga kino, kia kore aia e ariu mai i tona aerenga kino ra, i te tuatua anga e ka ora aia:

23 E teianei, kare kotou e akara akaou i te mea puapinga kore, e kare e rave i te totouanga: ka akaora oki au i toku au tangata i to kotou na rima: ka kite oki kotou e ko Iehova au.