Ezera

4 KITE akera te au enemi o Iuda e to Beniamina e, te akatu ra te au tamariki a te tuikaa i te nao no te Atua o Iseraela no Iehova;

2 Kua aere maira ratou kia Zerubabela, e ki te aronga mataiapo tutara ra, e kua karanga atura kia ratou, E angaanga katoa tatou: te kimi nei oki matou i to kotou Atua, mei ia kotou katoa na; e kua apai matou i te atinga nana, mei te tuatau mairai o te ariki o Asura ra, ko Esara-hadona, tei arataki mai ia matou i ku nei.

3 Kua karanga aturā Zerubabela, e ko Iesua, e tetai aronga mataiapo tutara i Iseraela kia ratou, Kare a kotou i ko nei kia akatu i te are no to matou Atua; na matou uaorai e patu i te are no te Atua o Iseraela no Iehova, i ta te ariki o Peresia ta Kuro i ikuiku mai ia matou nei.

4 Kua akaparuparu maira to taua enua ra i te rima o to Iuda, e kua taeko iora ia ratou i te patu anga ra,

5 E kua tutaki atu oki i te au tangata korero ei akatareva ke kia kore e tupu ta ratou i akakoro ra, e ope rava akera to te ariki o Peresia au rā to Kuro, e tae ua atura ki te au o te ariki o Peresia ra ko Dariu.

6 E tae akera ki te au o Ahasueru, i te mua tikai o tona au, kua tata iora ratou i te tuatua tapepe i to Iuda e to Ierusalema.

7 E tae akera ki te au rā Aretekasaseta, kua tata iorā Biselama, ko Miteredata, ko Tabeela, e to ratou ui katoa ra, ki te ariki o Peresia kia Aretekasaseta; i tata reo Arama ïa, e kua akakiteia te ariteanga i te reo Arama.

8 Ko Rehuma te tangata mana ra, e ko Simisai tata tuatua, ko tei tata i tetai leta i te tapepe anga ia Ierusalema ki te ariki ra kia Aretekasaseta, na ko ïa taua leta ra:

9 Kua tata iora te tangata mana ra ko Rehuma, e ko Simisai tata tuatua, e to ratou ui katoa ra; to Dina, to Apharasateka, to Tarepela, to Apharesa, to Arekeva, to Babulonia, to Susaneka, to Dehava, to Elama,

10 E te toenga o te pa enua i apaiia mai e te tangata maata e te mana ra ko Asenepera, e kua akanoo i roto i te au oire i Samaria, e te toenga i teia pae vai, e koia ua atu rai.

11 Teia te tu o taua leta ta ratou i akau atu kiaia, ki te ariki ra kia Aretekasaseta; Toou nei au tavini, te au tangata o teia pae vai, e koia ua atu rai.

12 Kia kite mai koe, e te ariki e, ko te au ngati Iuda i aere mai ki ko nei kia matou nei, mei ko na mai ia koe na, kua tae mai ratou ki Ierusalema nei, e te patu nei i taua oire kaitamaki e te kino ra, kua akamouia te tango, e te akatu nei i te au patu.

13 Kia kite mai oki koe, e te ariki e, kia akatuia teianei oire, e kia oti i te patu, kare ratou e oronga mai i te telo, te taūnga, e te au peu, iti iora te apinga o te ariki i akonoia ra.

14 E teianei, no ko na mai no te are o te ariki ra to matou meitaki i te rauka anga, kare oki e tika ia matou kia akara ua atu i te ariki i te tuku akaaka angaia, i akaunga atu ei matou i teianei tuatua ei akakite ki te ariki;

15 E kia kimiia i roto i te tuatua tata a to ai metua; e ka kitea e koe i roto i taua tuatua tata ra, e kite koe e oire kaitamaki taua oire nei, e te takinga-kino i te ui ariki e te pa enua; i roto i taua oire ra te tuatua kaitamaki mei tupua mai i te akatupu angaia; no reira oki i pou ei taua oire nei.

16 Te akakite nei matou ki te ariki e, kia akatu akaouia teianei oire, e kia oti akaou te patu, kare rava aau e tuanga i teianei pae vai.

17 Kua akau akera te ariki i te leta ei tuatua anga atu i ta te tangata mana ra i ta Rehuma, e ta Simisai tata tuatua, e to ratou ui katoa i noo i Samaria, e to te aronga e tera pae vai ra.

18 Kia ora, e koia ua atu rai, Te leta i akauia mai e kotou kia matou nei, kua oti i te akakite puia mai ki mua iaku nei.

19 E kua akaue akenei au, e kua kimiia, e kua kitea oki e, e oire māro teianei oire mei taito mai i te au ariki, e kua akatupuia te kaitamaki e te meameaau ra i roto i taua oire ra.

20 E ui ariki mana oki ko runga ia Ierusalema i muatangana, e tei ia ratou te au i runga i te pa enua katoa i tetai pae vai; e kua orongaia te telo, te taūnga, e te au peu katoa ra, kia ratou.

21 E tenana, e akakite aere i te ture, e kia noo ua taua aronga tangata ra, auraka taua oire e akatuia ra, e kia tae atu na tetai ture no ko nei atu iaku nei.

22 E tenana, e akamaroiroi, e akono kotou i taua tuatua nei, auraka kia kore, ko te tupu aea te ngere i te ui ariki ra.

23 E kia tatauia te leta a te ariki ra a Aretekasaseta i mua i te aroaro o Rehuma, e Simisai tata tuatua, e to ratou ui ra, aere viviki atura ratou ki Ierusalema ki te ngati Iuda, e kua akakore atura i ta ratou patu anga ma te rima e te ririnui:

24 Kore akera taua angaanga i te are o te Atua i Ierusalema ra. Kore rava akera e tae ua atura ki te mataiti rua i te au o te ariki o Peresia ko Dariu.