Ezekiela

22 E KUA tae maira te tuatua a Iehova kiaku nei, na ko maira,

2 E tenana, ko koe, e te tamaiti a te tangata, ka akava atu ainei koe, ka akava atu ainei koe, i te oire toto nei, ka akakite atu ei kiaia i tona ra au mea viivii ravarai?

3 E karanga atu ana koe, Te na ko maira te Atu ra ko Iehova; Te akamaringi nei te oire i te toto i rotopu iaia uaorai, kia vave mai tona tuatau, e te rapa nei i te au idolo ei akaviivii iaia uaorai i te reira.

4 Kua ara koe i te toto i maringi ia koe ra, e kua viivii koe i toou au idolo taau i rapa na; e naau i akavaitata mai i toou ra au rā, e kua tae oki ki toou ra au mataiti: i akariro ei au ia koe ei akakino anga na te au etene, e ei aviri anga na te au enua katoa ra.

5 Te aronga i vaitata, ma to te atea ke katoa, te ka aviri mai ia koe, e tei viivii to ingoa na, e tei maata te pekapeka ua anga.

6 I na, te au ariki o Iseraela, te tangata katoa ma tona ra ririnui i roto ia koe ra, i te akamaringi anga i te toto ra.

7 I roto rai ia koe ra ta ratou akavaavaa anga i te metua tane e te metua vaine: i roto rai ia koe ra kua rave pikikaa ratou i te tangata ke: i roto rai ia koe ra ta ratou tinai-mate anga i te matiroeroe e te vaine takaua.

8 Kua akavaavaa koe i taku au mea tapu ra, e kua viivii taku au sabati ia koe.

9 Tei roto ia koe te au tangata monomono korero, tei akamaringi i te toto: e i roto ia koe rai ta ratou kaikai anga ki runga i te au maunga: i roto ia koe rai ta ratou rave anga i te mea akama ra.

10 I roto ia koe rai ta ratou eeu anga i te ngai akama a te metua tane: i roto ia koe rai ta ratou tuku akaaka anga i te vaine i akataka keia ra.

11 E kua rave tetai i te mea viivii i te vaine a tona tangata tupu; e kua rave kino oki tetai e kua akaviivii i tana unonga; e i roto ia koe rai tetai i te tuku akaaka anga i tona tuaine, i te tamaine a tona metua tane.

12 I roto ia koe rai ta ratou rave anga i te tutaki kia akamaringi i te toto ra; kua rave koe i te kai ou, e te akamaata, e kua rauka taau i to tangata tupu ra i te āru, e kua akangaropoina koe iaku, te tuatua maira te Atu ra ko Iehova.

13 I na, i tenana, kua papaki au i toku rima, i taau apinga rauka anga pikikaa, e te toto i maringi i roto ia koe ra.

14 E tika ainei to ngakau kia akakoromaki, e ketaketa ainei to rima, kia tae ki te au rā e rave atu ei au ia koe ra? ko au teia e tuatua nei, ko Iehova, e naku ïa e rave.

15 E akapueurikiriki au ia koe i roto i te au etene, e akangaoro au ia koe i roto i te au enua ra, e e akapou au i toou viivii i roto ia koe ra.

16 E tuanga taau i roto ia koe uaorai ki mua i te aroaro o te au etene, e kite oki koe e ko Iehova au.

17 Kua tae maira oki te tuatua a Iehova kiaku nei, na ko maira,

18 E te tamaiti a te tangata na, kua riro te ngutuare o Iseraela ei ota iaku, e veo anake ratou, e te punu, e te auri, e te tapou, i roto i te umu e ota ario anake ratou.

19 E teianei, te na ko maira te Atu ra ko Iehova, No te mea kua riro anake kotou ei ota, i na, e akaputuputu au ia kotou i rotopu ia Ierusalema.

20 Mei ta ratou e akaputuputu i te ario, e te veo, e te auri, e te tapou, e te punu, ki rotopu i te umu, ka pupui ei i te ai i rungao kia taʼe; ka pera au i te akaputuputu ia kotou i taku riri nei, e taku riri otooto, ka vaoo atu ei ia kotou ki reira kia taʼe kotou.

21 Koia ïa, e akaputuputu au ia kotou, e pupui au ki runga ia kotou i te ai ra i taku riri nei, e taʼe oki kotou i rotopu i te reira.

22 Mei te ario e taʼe i rotopu i te umu ra, e taʼe katoa kotou i rotopu i te reira; ka kite oki kotou e, naku, na Iehova, i riringi atu i taku riri otooto ki runga ia kotou na.

23 Kua tae maira oki te tuatua a Iehova kiaku nei, na ko maira,

24 E te tamaiti a te tangata na, ka karanga atu koe kiaia, Ko koe taua enua kare i tamāia ra, e kare i topaia e te ua i te rā riri otooto ra.

25 Te kotikoti kupenga maira tona au peroveta i roto iaia ra; mei te liona ngunguru ra ratou kia aō i te kai ra: kua pou ia ratou te au vaerua: kua riro ia ratou te apinga, e te au mea memeitaki ra; e no ratou i rai ei tona au vaine takaua i roto iaia ra.

26 Kua rave kino tona kau taunga i taku nei ture, e kua akaviivii i taku au mea tapu: kare ratou i akataka ke i te mea tapu e te mea noa, kare oki ratou i akakite i te ngai i tu ke ei te mea viivii e te mea mā, kua topiri i o ratou mata i taku au sabati, e kua akaviiviia au i rotopu ia ratou.

27 Tona ra ui ariki i roto iaia ra, e tau ïa ki te au luko e aō i te kai ra, kia maringi te toto, kia pou te au vaerua, e kia rauka ta ratou apinga i te pikikaa.

28 E kua amo tona ra au peroveta ki te ngaika nane koreia no ratou, i te akara anga i te puapinga kore, e te akakite anga ia ratou i te totou pikikaa, i te tuatua anga e, Te na ko maira te Atu ra ko Iehova, e kare oki a Iehova i tuatua ua ake.

29 Kua akareionga te au tangata o te enua na, e kua noni aere ua, e kua akaanatā i te ao e te putaua, koia ïa, kua akareionga tika kore ua ratou i te tangata ke.

30 Kua kimi oki au i tetai tangata i rotopu ia ratou e akairiiri i te ngai ngaoro ra, e kia tu mai aia i roto i te ngai ngaa i mua iaku i taua enua ra, kia kore au e akapou atu: kare ra tetai i kitea e au.

31 I riringi atu ei au i toku riri otooto ki runga ia ratou; kua pou ratou iaku i te ai ra i taku riri maata: ko to ratou uaorai aerenga taku i tutaki atu ki runga i to ratou uaorai upoko, te tuatua maira te Atu ra ko Iehova.