Salamo

21 KA rekareka te ariki i te ririnui noou, e Iehova; e i te ora naau ra, eaa ua tona rekareka, i te maata!

2 Kua oronga mai koe i ta tona ngakau i anoano ra, e kare koe i tāpu i ta tona vaa i pati ra. Sela.

3 Kua na mua ua koe iaia ma te apinga meitaki roa ra: kua tuku koe i te korona auro meitaki ki runga i tona mimiti.

4 Kua pati atura aia i te ora ia koe, e kua oronga mai koe nona i te au rā roa kare rava e mutu ra.

5 E kakā maata tona i te ora naau: te ngateitei e te mana tei tukuia mai e koe ki runga iaia.

6 Kua oronga mai koe i te meitaki mutu kore nona: kua akarekareka mai koe iaia i te rekareka o to mata ra.

7 No te mea te irinaki nei te ariki ia Iehova, e i te aroa o Tei Teitei ra, kare rava aia e ngaueue.

8 Ka kitea e to rima toou katoa au enemi: ka kitea e to rima katau tei makitakita ia koe ra.

9 Kia tae ki te tuatau e riri ei koe, ka akariro ei koe ia ratou mei te umu e ka ra: ka apuku a Iehova ia ratou i te riri nona, ka pou takiri roa oki ratou i te ai.

10 Ka akapouia e koe ta ratou anau i te enua nei, e to ratou au uanga i roto i te tamariki a te tangata nei:

11 No te mea kua kimi ratou i te kino noou; e te takinga-kino ta ratou i akakoro, kare ra i tika.

12 Ka akariroia ratou e koe ei pa i taau ra au kakao, tei akatauia e koe ki runga i te ao naau ia ratou.

13 Kia akateiteiia koe, e Iehova, i toou ra ririnui: ka imene matou, e e akapaapaa i toou ra mana.