Salamo

107 E AKAMEITAKIia Iehova: e meitaki oki tona, ka tu oki tona aroa e rimua. 2 Kia pera tei akaoraia e Iehova, i tei akaoraia e ia i te rima o te enemi ra; 3 E kua akaputuputu mai ia ratou mei te au enua mai; mei te itinga o te rā e mei te opunga o te rā, mei apatokerau mai e mei apatonga. 4 I uoa ua ana ratou na te medebara, na te arataa vaiavare ua: kare i kitea e ratou tetai oire ei nooanga. 5 Ma te pongi e te kaki vai, kua ngaeva ua to ratou vaerua i roto ia ratou. 6 Kua kapiki ra ratou ia Iehova i to ratou tumatetenga ra, e kua akaora iora aia ia ratou i to ratou au mate ra. 7 Kua arataki oki aia ia ratou i te arataa tikai ra, e tae atura ratou ki te oire nooanga ra. 8 Kia akameitaki oki ratou ia Iehova i tona ra aroa, e te au angaanga taka ke nana i te tamariki a te tangata nei. 9 Ko te mate oki i te kaki vai, kua akamerengoia ïa e ia, e tei aati i te pongi ra, kua akakiia ïa e ia ki te meitaki. 10 Ko tei noo i roto i te poiri e te marumate, i tapekaia ki te auri, e te tumatetenga; 11 No te mea kua taitoito ratou i te tuatua a te Atua, e kua akatokā i te ako a Tei Teitei. 12 I tuku akaakaʼi oki aia i to ratou ngakau i te roiroi; inga iora ratou ki raro e kare rava e tauturu. 13 I to ratou tumatetenga ra kua kapiki ratou ia Iehova, e kua akaora aia ia ratou i to ratou au mate ra. 14 Kua arataki maira aia ia ratou mei roto i te poiri e te maru-mate, e kua atiati taka ke atura i to ratou au tapeka. 15 Kia akameitaki oki ratou ia Iehova i tona ra aroa, e te au angaanga taka ke nana i te tamariki a te tangata nei. 16 Kua ngaangaa oki iaia te au pa veo; e kua tipu keia e ia te au tea auri. 17 Te aronga neneva ra no ta ratou ara i rave ra, e ta ratou ra tuatua kino, i makiiaʼi: 18 Te toanu ra ratou i te au kia katoa ra, e te vaitata maira te ngutupa o te mate ia ratou. 19 I to ratou tumatetenga ra kua kapiki ratou ia Iehova, e kua akaora aia ia ratou i to ratou ra au mate. 20 Kua tuku maira aia i tana tuatua e kua ora iora ratou, e kua ora akera ratou iaia i to ratou ra au mate. 21 Kia akameitaki oki ratou ia Iehova i tona ra aroa, e te au angaanga taka ke nana i te tamariki a te tangata nei. 22 E apai ratou i te atinga akameitaki, e e akakite ratou i tana au angaanga ma te imene. 23 Te aronga i na tai te aere i na runga i te au pai ra, tei te moana maata ra ta ratou ra taoonga, 24 Ko ratou tei kite i te angaanga a Iehova, e tana ïa ravenga taka ke i te moana ra. 25 Kua akaue oki aia, e kua tupu maira te uriia, e teitei roa maira te kare. 26 E kake atura ratou ki runga i te rangi, kua eke ki raro i te oonu; taravai rava akera to ratou ngakau i te tumatetenga. 27 Kua anini e kua turorirori ratou mei te tangata konā kava ra, e ope rava akera ta ratou ravenga. 28 I to ratou tumatetenga ra, kua kapiki ratou ia Iehova, e kua akaora aia ia ratou i to ratou ra au mate. 29 Kua akariro aia i taua uriia ra ei marino; e tona au kare ra, kua akamutekiia ïa. 30 Kua mareka ratou no te mea kua marino te tai; e kua apai aia ia ratou ki to ratou tapaeanga i anoano ra. 31 Kia akameitaki oki ratou ia Iehova i tona ra aroa, e te au angaanga taka ke nana i te tamariki a te tangata nei. 32 E akateitei ratou iaia i roto i te uipa anga o te tangata ra, e akapaapaa iaia i roto i te uipa anga o te aronga pakari ra. 33 Te akariro nei aia i te vai puke ei medebara, e te vai mapia ra ei ngai papa-marō; 34 Te enua uua ra ei one pariri, no te ara a te aronga i noo i reira. 35 Te akariro nei aia i te medebara ei vai puna; e te ngai one marō ra ei vai mapia. 36 E kua akanoo aia i tei mate i te pongi ra i reira, kia akonokono ratou i tetai oire nooanga; 37 E kia ruru i te ua i te kainga, e kia tanu i te kainga vine, kia ua mai te kai e kia maata. 38 Kua akameitaki oki aia ia ratou ra, kua maata roa ratou i reira, e kare ua ta ratou au puaka e tukua uaia kia iti. 39 Te oki akaou ra ratou ki te iti anga, e kua taakaakaia, i te takinga-kino, te tumatetenga, e te aue. 40 Kua akavaavaa aia i te ui ariki, e kia uoa aere ua ana ratou na te medebara arataa kore ra. 41 Te akateitei nei ra aia i te putaua mei roto mai i te tumatetenga ra, e te akariro nei i tona kopu-tangata mei te anana ra. 42 Ka kite mai te aronga tiratiratu i teia ma te rekareka, e momani anake ïa oki te kino i tona vaa. 43 Ko tei pakari ra, e ko tei akono i teianei au mea, ka kite ratou i te aroa takinga-meitaki o Iehova ra.