Salamo

95 TATOU, e imene ia Iehova: e imene nui i te mato e oraʼi tatou nei.

2 E aere tatou ki mua i tona aroaro ma te akameitaki, ma te salamo e imene nui atu ei iaia.

3 E Atua maata oki a Iehova, e Ariki maata i runga i te au atua katoa ra.

4 Tei tona rima te ngai oonu o te enua nei: e te teiteianga o te au maunga ra, nona ïa.

5 Nana te tai, nana oki i anga: e na tona rima i anga te one marō.

6 E aere mai tatou, e akamori ma te tupou ki raro; e tuturi tatou ki mua i te aroaro o tei anga ia tatou nei ia Iehova:

7 Koia oki to tatou Atua, ko tatou oki te au tangata o tana ra koro, te au mamoe o tona rima. Kia tika ia kotou i teianei rā i te akarongo i tona reo.

8 Auraka e akamārokiakia i to kotou ngakau, mei tei te akakoko anga ra; mei tei te timata anga, i te medebara ra;

9 I ta to kotou ai metua timata anga mai iaku ra, kua akakoko mai iaku, kite uaʼi ratou i taku ra au angaanga.

10 Ka a akera ngauru anga oku mataiti i te ongoongo anga i taua uki ra, e kua tuatua akera au, E aronga ngakau apa ratou, e kare ratou i kite i toku ra au aerenga;

11 Ko tei taputouia e au i toku riri anga ra e, auraka roa ratou kia o i toku ra akaangaroianga.