Ieremia

52 TEI te mataiti e rua ngauru ma tai o Zedekia i ariki ei aia, okotai ngauru ma tai ona mataiti i te ariki anga i Ierusalema. Ko Hamutala te ingoa o tona metua vaine, e tamaine na Ieremia ra, no Libena.

2 Kua rave oki aia i te kino ki mua i te aroaro o Iehova, mei te au mea katoa ta Iehoiakima i rave ra.

3 I akaperaia oki, no te riri o Iehova ia Iuda e ia Ierusalema, e kia akaruke keia atu ratou e ia mei mua i tona aroaro, kaitamaki iora oki a Zedekia i te ariki o Babulonia.

4 E tae akera ki te iva o te mataiti o te au nona, i te ngauru o te marama, e te ngauru oki o te rā, i taua marama ra, i tae mai ei te ariki o Babulonia, ko Nebukanesa, koia e te nuku katoa nona, ki Ierusalema, e kua patia iora i te puakapa i reira, e kua patu iora i te patu i reira e pini ua ake.

5 Akapiniia iora taua oire ra e tae akera ki te mataiti okotai ngauru ma tai o te ariki ra o Zedekia.

6 I te a o te marama, e te iva o te rā i taua marama ra, te maata ra te onge i taua oire ra, e kare rava e manga ta te tangata o te enua ra.

7 Ngaangaa iora te oire, ati anake atura te au tangata tamaki, akaruke maira i taua oire ra i te po, i na te ngutupa i rotopu i nga patu e rua ra, i te pae o te kainga o te ariki ra; (tei mua mai te Kaledea i taua oire ra e pini ua ake:) aere atura oki ratou na te Araba ra.

8 Kua arumaki maira ra te nuku o te Kaledea i te ariki, e rauka iorā Zedekia i te au ngai mataataa i Ieriko ra; pueurikiriki ke atura tona nuku katoa iaia.

9 E kua opu iora ratou i te ariki, e kua arataki maira ki Ribila, ki te ariki o Babulonia ra, i te enua o Hamata; e kua tuku maira aia i te utunga iaia.

10 Kua ta iora te ariki o Babulonia i nga tamariki a Zedekia ra ki mua i ona mata: e kua ta iora oki aia i te ui ariki katoa o Iuda i Ribila ra.

11 E kua koiti akera aia i nga mata o Zedekia ra; e kua tapeka iaia ki te tapeka veo ra, e kua apai atura te ariki o Babulonia iaia ki Babulonia, e kua tuku atura iaia ki roto i te are tapeka anga e tae ua atura ki te rā i mate ei aia ra.

12 E i te rima o te marama, i te ngauru o te rā i taua marama ra, i te mataiti okotai ngauru ma iva i te au o te ariki o Babulonia ra ko Nebukanesa, i tae mai ei te rangatira no te au vaeau ra ko Nebuzaradana, ko tei tu i mua i te aroaro o te ariki o Babulonia, ki Ierusalema.

13 E kua tungia te are o Iehova, e te are o te ariki; e te au are katoa i Ierusalema, e te au are katoa o te aronga nunui ra, kua tungia e ia ki te ai:

14 E kua vavaʼi te nuku katoa o te Kaledea ki o te rangatira o te aronga vaeau, i te au patu katoa i Ierusalema e pini ua ake.

15 e to te au tangata rikiriki ra, e te toenga o te au tangata i roto i te oire, e te aronga i uri, i tei uri ana ki o te ariki o Babulonia, e te totoenga o taua aronga maata ra, ko tei apai tuikaaia ïa e te rangatira o te vaeau o Nebuzaradana,

16 Kareka tetai pae o te au tangata rikiriki ra no taua enua ra, kua vaooia ïa e te rangatira o te vaeau ra e Nebuzaradana, ei tope vine, e ei tatanu.

17 E nga pou veo i roto i te are o Iehova, e nga vairanga, e te āriki vai maata veo i roto i te are o Iehova, kua vavaʼiia ïa e te Kaledea, e kua ope to reira veo i te apaiia ki Babulonia.

18 E te au pani, e te au taipu, e te au pakoti, e te au kapu, e te au punu, e te au āriki veo katoa ra, i ta ratou i raverave ra, ko tei apai keia ïa.

19 E te au kapu, e te au āriki ai, e te au kapu, e te au pani, e te au vairanga mori, e te au punu, e te au kapu; to te au mea auro ra, ei auro ïa, e to te au mea ario, ei ario ïa, ko ta te rangatira o te vaeau i apai ke.

20 Nga pou e rua ra, e te āriki vai maata okotai, e nga puakatoro veo okotai ngauru ma rua, i raro ake i aua nga vairanga ra, i angaia e te ariki e Solomona no te are o Iehova: te veo no taua au āriki katoa nei, kare ïa e arite.

21 Nga pou oki, okotai ngauru ma varu i te kubiti i te teitei i te pou okotai; e te taura e pini ei taua pou ra, okotai ngauru ïa e ma rua i te kubiti: e e a maikaorima i te patapatatue: te puerakaua ra i roto.

22 E te tapoki i runga ra, e veo ïa; e te teitei o te tapoki okotai ra, e rima ïa kubiti; e kupenga e te remuna ki runga i taua tapoki ra e pini ua ake, e veo anake ïa. E mei te reira katoa te rua i nga pou, e remuna katoa ïa.

23 E iva ngauru e ono ara aua remuna i anga ki nga rua matangi katoa ra; okotai anere remuna ki runga i taua kupenga ra e pini ua ake.

24 Kua rave iora te rangatira a te vaeau ra i te taunga maata ra ia Seraia, e te taunga tauturu ra ia Zephania, e nga tiaki ngutupa ra toku toro:

25 Kua rave aia i tetai tavini ariki no roto i te oire ra, tei tukuia i runga i te au tangata tamaki ra; e nga tangata toko itu o ratou tei akara i te mata o te ariki ra, tei kitea i roto i te oire; e te tata tuatua maata no te nuku ra, ko tei akaputuputu mai i te tangata o te enua ra; e te au tangata katoa e ono ngauru no taua enua ra, i kitea i rotopu i taua oire ra.

26 Ko ta te rangatira oki o te vaeau ta Nebuzaradana i rave, e kua arataki atura ia ratou ki te ariki o Babulonia ki Ribila.

27 Kua ta iora te ariki o Babulonia ia ratou, e mate rava akera i Ribila, i te enua o Hamata. Apai keia atura Iuda ei tuikaa i tona uaorai enua.

28 Teia nga tangata i apai tuikaaia e Nebukanesa: i te mataiti itu ra, e toru tausani e runga ngauru ma toru ngati Iuda:

29 I te mataiti okotai ngauru ma varu o Nebukanesa ra, kua apai tuikaa aia i te au tangata e varu anere, e toru ngauru ma rua mei Ierusalema:

30 I te mataiti e rua ngauru ma toru o Nebukanesa, i apai tuikaaiaʼi e te rangatira o te vaeau ra ko Nebuzaradana, te au tangata e itu anere e a ngauru ma rima, e ngati Iuda: e taua au tangata katoa ra, e a ïa tausani e ono oki anere.

31 E tae akera ki te toru ngauru ma itu o te tuikaa anga o te ariki o Iuda ko Iehoiakina, i te ngauru ma rua o te marama, e te rā e rua ngauru ma rima i taua marama ra, kua akateitei maira te ariki o Babulonia ra ko Evile-merodaka, i te mataiti i ariki ei aia ra, i te mimiti o te ariki o Iuda ia Iehoiakina, e kua tuku iaia ki vao i te are tapeka anga ra,

32 E kua tuatua meitaki atura aia kiaia, e kua akateitei akera aia i tona terono i to te au ariki terono ki ona i Babulonia,

33 E kua kopae atura i tona kakau no te tapeka anga ra: e kua kai aia i te manga ki mua i tona aroaro e ope roa ake ona puke rā i te ora anga nei.

34 E tana ra tuanga kai, e tuanga tamou ïa, i orongaia kiaia e te ariki o Babulonia, ko te rā ko te tuanga, e tae ua atu ki tona rā e mate ei, te au rā katoa o tona ora anga nei.