Isaia
27 KIA tae ki taua rā ra e tutaki ei a Iehova, kite koke māro, e te maata, e te pakari, nona ra, ia Leviatana, i te ovi rere ra, e ia Leviatana, te ovi mingimingi ra, e ka ta oki aia i te taae i raro i te moana ra.
2 I te reira rā, i te kainga vine i akaperepereia nei, e peʼe kotou:
3 Ko au, ko Iehova, e tiaki iaia nei: e tamauu au iaia ki te vai kare e tukua: e tiaki au iaia i te po e te ao nei, kia kore e rave kinoia.
4 Kare e makitakita o roto iaku: naringa e tamaki ta tatou ko te rakau taratara e te tataramoa! E oro pu ua atu au ki runga i te reira, e ka kapipiti katoa ïa iaku.
5 Kia opu ra tetai iaku ei akapuanga, ka ongi mai aia iaku; ka ongi mairai aia iaku.
6 I te au rā a muri atu e toro ei te aka o Iakoba: e kao oki Iseraela, e e pua oki, e kapi te enua katoa nei i tona ua.
7 Kua ta ainei aia iaia, mei tana i ta i tei ta iaia ra? kua arite ainei tona tainga mei to tei ta mai iaia ra?
8 I taumāro rikiriki rai koe iaia i tona tuku ke angaia: i te rā maoake oki aia i apai ke ei iaia i tana matangi viviki:
9 Ko te mea teia e mā ai te ara a Iakoba; ko teia anake ra te openga, ko te apai ke anga i tana ara: kia akariro aia i te au toka roarai o te atarau ra mei te ngaika i pueurikiriki ke ra; kare e tu akaou te au Asetoreta e te au tiki rā ra.
10 E riro te oire akatekatekaia ra i te tanea; ei kainga akarukeia ra, e vaioia mei te medebara; ei reira te punua puakatoro e kaikai aere ei, ei reira rai moe ei; e kai aere oki aia i te au rakau tupu ou i reira.
11 Kia mae tona au mangamanga, e aatiia ïa: e aronga vaine te ka aere mai ka taʼu ei ki te ai. E aronga kite kore rai ratou: e kore ei Tei anga ia ratou e aroa ia ratou, e ko Tei anga ia ratou, kare e akaperepere mai ia ratou.
12 E kia tae ki taua rā ra, ei koi anga olive ta Iehova, mei te manga anga o te vai ra e tae ua atu ki te kauvai i Aiphiti ra, e e koi aere aia tataki tai ia kotou, e te au tamariki a Iseraela e.
13 E kia tae ki taua rā ra, e akatangiiaʼi te pu maata ra, e ko tei vaitata i te mate i te enua ra o Asura te ka aere mai, e ko tei akapueurikirikiia i te enua ra i Aiphiti, e akamori oki ratou ia Iehova, i te maunga tapu ra i Ierusalema.