Salamo

81 E IMENE ma te rekareka i te Atua, i to tatou maroiroi: e imene nui i te Atua o Iakoba.

2 E tumu i te salamo, e ta i te tophe, te kinura tangi meitaki, e te nabala.

3 E akatangi i te pu i te marama ou ra, i te tuatau i akonoia ra, i te rā oroa tapu no tatou ra:

4 E akonoanga oki te reira na Iseraela, e ture na te Atua o Iakoba.

5 Akono atura aia i te reira ei tuatua-akakite ia Iosepha, iaia i aere atu ki te enua ra ki Aiphiti: kua akarongo au i te reo i kitea koreia e au ra:

6 Kua apai ke atura au i te apainga i tona pakuivi; kua ora iora tona rima i te rave anga i te tapora.

7 I toou tumatetenga ra, kua kapiki mai koe, e kua akaora atu au ia koe: kua akakite au kia koe i te mangungu i te ngai ngaro ra: kua timata au ia koe i te vai ra i Meriba. Sela.

8 E akarongo mai, e taku iti-tangata, kia akakite atu au kia koe: naringa Iseraela e akarongo mai iaku e!

9 Auraka ei atua ke i roto ia koe; auraka koe e akamori i te atua ke.

10 Ko au toou Atua ko Iehova, ko tei arataki mai ia koe mei te enua ra mei Aiphiti: e amama tika mai to vaa, e naku e akaki atu.

11 Kare ra toku iti-tangata i akarongo mai i toku reo, e kare Iseraela i akono mai iaku.

12 Kua tuku rava atura au ki te ketaketa o to ratou uaorai ngakau, e kua aere atura ratou i ta ratou uaorai tuatua.

13 Naringa tikai toku iti-tangata i akarongo mai kiaku e, i aere tikai Iseraela i toku au arataa e!

14 Kare rava e roa kua tuku akaakaia e au to ratou au enemi, e kua ariu tika au i toku rima ki runga i tei māro mai ia ratou ra.

15 E tatomo tika te aronga i riri ia Iehova kiaia; kia vai rai to ratou taime e tuatau ua atu.

16 Kua angai ïa au ia ratou i reira i te sitona meitaki, e kua akamerengo au ia koe i te meli no roto i te mato ra.