Salamo
74 EAA koe, e te Atua, i akaruke takiri mai ei ia matou? e otooto ua rai ainei to riri i te mamoe o taau uaorai koro?
2 E akamaara mai i taau ra uipa anga, i okoia e koe i muatangana ra, to tuanga aiteia i akaoraia e koe ra: i teianei maunga ko Ziona, i nooia e koe ra.
3 E takai nui mai koe ki te ngai i taitaipakoko roaia ra, i te au takinokino anga katoa a te enemi i roto i te ngai-tapu ra.
4 Te tuoa nei to au enemi i te uipa anga naau ra: te akatu nei i to ratou au reva ei akairo.
5 Mei te tangata i kitea i te apai anga i te tapae ki runga i te vaorakau,
6 Kua vavaʼi ratou i teianei i te au angaanga akamanea o te iero, ki te toi ma te amara.
7 To ngai-tapu ra, kua taʼu naia e ratou ki te ai; te vairanga no toou ra ingoa, kua akaviiviiia ïa i te tuku anga ki raro i te one ra.
8 I tuatua ratou i roto i to ratou ngakau e, Tatou e akapou rava ia ratou katoa; kua ka ia ratou te au ngai uipa anga katoa a te Atua i te enua nei.
9 Kare ua ta tatou au akairo i te kitea anga: kare ua oki e peroveta, e kare oki e tangata, i rotopu ia tatou nei, i kite i te roa anga.
10 Mei te aa ra te roa, e te Atua, i ta te ekai akakino anga? e akakino tamou rai ainei te enemi i toou ingoa?
11 Eaa oki koe i akataka ke ei i to rima, to rima katau? ka kiriti ana i to umauma na!
12 Ko koe oki, e te Atua, toku ariki mei tupua mai; ko tei akatupu i te ora i te enua nei.
13 Naau i vee i te tai i to ririnui; te au mimiti o te au taae, kua ngaangaa ïa ia koe i te moana:
14 Naau i akangaangaa i te au mimiti o Leviatana; e kua oronga koe i te reira ei kai na te au tangata i te medebara.
15 Naau i akangaangaa i te punavai e te vai puke ra; naau i tamarō i te au vai mamaata ra.
16 Noou te ao, e noou katoa te po: naau i akonokono i te mārama, e te rā.
17 Kua akonoia e koe te au kotinga ravarai o te enua: te akaū e te paroro, kua akonoia e koe ra.
18 E akamaara koe i teia, e Iehova, e kua akakino te enemi; kua akakino oki te aronga neneva i toou ra ingoa.
19 Auraka kia orongaia to kukupa ki te manu taae ra: auraka e akapoina takiri rava i to au tangata i tairoia ra.
20 E akono ana i te koreromotu ra; ko te au ngai poiri o te enua nei, kua ki ïa i te nooanga o te takinga-kino ra.
21 Auraka tei taakaakaia ra kia oki ma te akama; kia akapaapaa ra te aronga ao e te putaua i toou ra ingoa.
22 Ka tu, e te Atua; e akataka ana i taau uaorai tuatua: e akamaara i ta te manako kore ra akakino anga ia koe kare e rā i tukua.
23 Auraka te reo o toou au enemi kia ngaropoina ia koe; te ana atura te oripu ua anga o tei māro mai ia koe ra kare i vata.