Salamo

76 KUA kitea te Atua i Iuda: te maata ra tona ingoa i Iseraela.

2 Tei Salema tona puakapa, e tei Ziona tona nooanga.

3 I reira aia i te atiati anga i te au kakao ana ra, te paruru, e te koke, e te tamaki ra. Sela.

4 E manea maata toou e te meitaki, i to te au maunga i ki i te apinga āru ra.

5 Te aronga ate nui ra, kua auinaia ïa, te moe ra ratou i ta ratou moe: e kare anake oki to taua au tangata ririnui ra i te kite anga i to ratou rima.

6 I toou ra akamura anga mai, e te Atua no Iakoba, te kariota e te oroenua katoa ra, kua tinainai i te moe.

7 Ko koe, ko koe tei mataku maataia: e koai te ka mou ki mua i to mata me riri koe?

8 Kua kitea to tuku anga utunga mei te rangi mai; mataku akera te enua, e kua muteki iora,

9 Ka tu mai ei te Atua ki runga e akataka i te utunga, kia ora te aronga maru katoa i te enua nei. Sela.

10 Ka akameitakiia oki koe i te riri o te tangata nei; te toenga o taua riri ra, naau ïa e tāpu.

11 E tia, e ka akatupu i taua tia ra i to kotou Atua ra ia Iehova: e te aronga katoa ki ona ra e pini rava ake, e apai ïa i te taoonga-rima kiaia i tei tau kia matakuia ra.

12 E kokoti ke aia i te ngakau parau o te ui ariki ra; e mea mataku oki aia na te au ariki o te enua nei.