Salamo

79 E TE Atua e, tei roto mai nei te etene i taau ra tuanga; kua akaviivii ratou i to nao tapu ra, kua akariro ia Ierusalema ei au ututua.

2 Kua oronga ratou i te au kopapa mate ra o to au tavini ei kai na te au manu o te reva nei; te kopapa o to aronga tapu ra na te au puaka o te enua nei.

3 Kua akamaringi ratou i to ratou toto mei te vai ra e pini ua ake Ierusalema nei, e kare rava e tangata ei tanu.

4 Kua riro matou ei akakino anga na to matou au tangata tupu; e ei akavaavaa anga, e ei avirianga, na te aronga ravarai e pini ua ake matou nei.

5 Mei te aa ra te roa, e Iehova? ka akamou riri ua atu rai ainei koe? ka ka ua rai ainei to vareae mei te ai ra?

6 E riringi mai i to riri ki runga i te au etene kare i kite ia koe ra, e ki runga i te au basileia kare i tautopa i toou ra ingoa:

7 Kua pou oki Iakoba ia ratou, e kua tanea tona nooanga ia ratou.

8 Auraka e akamaara i ta matou au ara takere ra; na to aroa akaperepere ra e turu vave mai ia matou; kua tuku akaaka roaia oki matou nei.

9 E tauturu mai ia matou, e te Atua e oraʼi matou nei, no te kakā o toou ingoa; e tapoki mai oki i ta matou ara.

10 Eaa e tikaʼi i te au etene kia tuatua mai e, Teiea to ratou Atua? kia kitea ra aia i o te au etene ki mua i to matou nei mata, i te akaoko anga atu i te toto o to au tavini i akamaringiia ra.

11 Kia tae atu te aue o tei tapekaia ki mua ia koe; no te maata o toou ra maroiroi, e akaora koe i te aronga i akonoia no te mate:

12 Kia taki itu a taau akaoki anga i roto i te umauma o to matou tangata tupu nei, i te akakino ta ratou i akakino ua mai ia koe, e te Atu.

13 Ei reira matou ko toou nei au tangata, te anana oki o taau ra koro, e akameitaki ei ia koe e tuatau ua atu; e tamou rai matou i te akameitaki anga atu ia koe i tera uki i tera uki.