2 Ariki

20 TEI taua au rā ra, mate iorā Hezekia i te maki, e maki mate. Kua aere maira te peroveta ra ko Isaia te tamaiti a Amoza kiaia ra, e kua tuatua maira kiaia, Te na ko mairā Iehova, Ka akonokono ana i to ngutuare; ka mate oki koe, kare e ora.

2 Kua ariu akera aia i tona mata ki te pae paruru, e kua pure kia Iehova, karanga atura,

3 Teia taku tuatua kia koe, e Iehova e, e akamaara mai koe iaku i toku nei aerenga ki mua ia koe ma te tuatua-mou, e ma te ngakau tiratiratu, e kua rave au i te mea tika i mua i to mata. Aue iorā Hezekia, e aue maata.

4 E kare a Isaia i topa tika ki vao i te paepae i rotopu ra, i tae mai ei te tuatua a Iehova kiaia, na ko maira,

5 Ka oki, e karanga atu ki te rangatira o toku ra iti-tangata kia Hezekia, Te na ko mairā Iehova, te Atua o to tupuna ra o Davida, Kua akarongo au i taau pure, kua kite au i toou roi-mata: i na, ka akaora au ia koe: kia tae ki te po toru ra, ka aere ei koe ki runga ki te are o Iehova.

6 E kapiti katoa atu au i toou ra au rā, okotai ngauru ma rima i te mataiti: e naku koe e akaora, e teianei oire katoa, i te rima o te ariki o Asura ra; e naku e tiaki i teianei oire noku uaorai, e no toku tavini no Davida.

7 Kua karanga aturā Isaia, Ka rave i tetai kou suke ra: kua rave iora ratou, kua topiri ki runga i taua maki ra, kua ora aia.

8 Kua tuatua mairā Hezekia kia Isaia, Eaa te akairo e ka akaoraia au e Iehova; e ka tae au ki runga i te are o Iehova kia tae ki te po toru ra?

9 Kua karanga aturā Isaia, Teia taau akairo no ko ia Iehova ra, e ka rave rai a Iehova i tana i tuatua maira: Ka aere ainei te maru ata ki runga i te akairo rā akera ki mua e kia topa nga kotinga okotai ngauru, e ka akaoki ainei ki muri e kia ngauru te kotinga kia topa?

10 Kua tuatua mairā Hezekia, E mea māmā ua kia aere te maru ata ki mua e kia ngauru te kotinga kia topa: auraka, e akaoki ra te maru ata ki muri e kia ngauru te kotinga kia topa.

11 Kua kapiki aturā Isaia peroveta kia Iehova: e kua akaoki maira aia i taua maru ata ra e okotai ngauru akera kotinga i topa, kua aere oki ki mua ki runga i te akairo rā a Ahaza.

12 I reira to Berodaka-baladana te tamaiti a Baladana, ariki no Babulonia, unga anga mai i te leta, ma te apinga na Hezekia: kua rongo akera e i mate anā Hezekia i te maki.

13 Akarongo akerā Hezekia ia ratou, e kua akakite atura i te are vairanga apinga katoa nana, i te ario, e te auro, e te au rakau kakara, e te manongi meitaki ra, e te au are taoonga ravarai nona ra, e te au mea katoa i kitea i roto i te uipaanga apinga nana: kare rava e apinga i toe i roto i tona are, e tona katoa ra basileia, i kore i akakiteia e Hezekia ra.

14 Kua aere mairā Isaia peroveta ki taua ariki ra kia Hezekia, e kua tuatua maira kiaia, I peea mai nga tangata nei? mei ea mai i aere mai ei ratou kia koe nei? Kua karanga aturā Hezekia, Mei te enua mamao mai ratou, mei Babulonia mai.

15 Kua tuatua maira aia, Eaa ta ratou i kite i roto i to are na? Kua karanga aturā Hezekia, Kua kite ratou i te au mea katoa i roto i toku are nei: kare takiri rai aku e apinga toe i te akakiteia e au kia ratou.

16 Kua tuatua mairā Isaia kia Hezekia, E akarongo mai ana i te tuatua a Iehova:

17 I na, te vaitata maira te au rā, ka ope takiri ei te apinga i roto i to are, e ta to ai metua i akaputuputu ra, e tae rava akenei ki teianei rā, i te apaiia ki Babulonia: kare rava e akatoeia, te pera mairā Iehova:

18 E to te au tamariki aau, no roto ia koe ra, taau e anau ra, na ratou ïa e apai ke; ka riro oki ratou ei eunuka i te are o te ariki o Babulonia.

19 Kua karanga aturā Hezekia kia Isaia, E tuatua meitaki ta Iehova taau i tuatua maira. Kua karanga atura aia, kare aina ei au e te tuatua-mou i toku nei au rā?

20 E te toenga o te tuatua ia Hezekia, e tona katoa oki maroiroi, e te vai puna i raveia e ia, e te akataʼeanga i tae mai ei te vai i roto i te buka, te tuatua no te au rā o te au ariki no Iuda?

21 Moe iorā Hezekia ki o tona ra ai metua: tupauia akera aia i te au e tana tamaiti ra e Manase.