Numero

32 E PUAKA maata roa ta te tamariki a Reubena, e ta te tamariki a Gada ra: e kite akera ratou i te enua ra ko Iazera, e te enua ra ko Gileada, e i na, e ngai puaka taua ngai ra. 2 Kua aere maira te tamariki a Gada, e te tamariki a Reubena, kua tuatua maira kia Mose raua ko Eleazara taunga ra, e te aronga mamaata o te uipaanga ra, na ko maira,

3 Te enua ra, ko Atarota, e ko Dibona, e ko Iazera, e ko Nimera, e ko Hesebona, e ko Eleale, e ko Sebama, e ko Nebo, e ko Beona, 4 I te enua i pou io nei ia Iehova ki mua i te aroaro o te uipaanga tamariki a Iseraela nei, e enua meitaki no te puaka, e e puaka oki ta to au tavini nei. 5 E kua tuatua maira ratou, Kia kite aroaia mai matou e koe ra, kia orongaia mai taua enua nei no to au tavini ei nooanga, e auraka matou kia tae ki tetai pae Ioridana nei. 6 Kua karanga aturā Mose ki te tamariki a Gada, e te tamariki a Reubena ra, Ko to kotou ai taeake aina te ka aere ki te tamaki, e e noo ua kotou i ko nei?

7 Eaa oki kotou e akataitaiaʼi i te ngakau o te tamariki a Iseraela i te aerenga ki te enua i orongaia mai e Iehova no ratou ra?

8 I pera oki to kotou na ai metua, iaku i tono ia ratou mei Kadesabarenea atu e tutaka i te enua ra.

9 Tae atura oki ratou ki te o ra ko Esekola, e kite akera ratou i taua enua ra, kua akataitaia maira ratou i te ngakau o te tamariki a Iseraela, kia kore ratou e tae ki te enua ta Iehova i oronga mai no ratou.

10 Tupu iora te riri o Iehova i reira, e kua taputou iora aia, na ko akera,

11 Kare rava tetai o te au tangata mei Aiphiti maira, i tei tae ki te takau okotai o te mataiti e te ara atu, e kite i te enua taku i taputou atu kia Aberahama, kia Isaaka, e kia Iakoba ra: no te mea kare ratou i aru totomapu mai iaku ra;

12 Mari ra ko Kaleba te tamaiti a Iephune ngati Kenezi ra, e ko Iosua te tamaiti a Nuna ra: no te mea kua aru totomapu raua ia Iehova ra. 13 Tupu iora te riri o Iehova ia Iseraela, vaoo iora aia ia ratou kia aere ua ana i roto i te medebara e a akera ngauru anga i te mataiti, e ope roa akera te reira uki, i tei akatupu i te tuatua kino ki mua i te aroaro o Iehova, i te mate.

14 E i na, tupu akenei kotou ei tupau i to kotou ai metua ra, ei uki tangata rave ara, ei akamaata rai i te riri viviki o Iehova ia Iseraela.

15 Kia anga ke oki kotou iaia, ka vaoo akaou raia ia ia ratou i roto i te medebara; e pou iora teia aronga katoa nei i te mate ia kotou.

16 Kua akavaitata maira ratou kiaia, e kua tuatua maira, E koro matou i te kainga i ko nei no ta matou au puaka, e e akatu matou i te oire no ta matou au tamariki: 17 Kareka matou, ka aere ïa matou ma te taoonga tamaki katoa na mua i te tamariki a Iseraela, e tae ua atu ratou ki to ratou ngai ia matou nei: ka noo ua ta matou au tamariki i roto i te au oire i patuia ra, no te tangata oki o taua enua nei.

18 Kare matou e oki ki to matou au ngutuare, e kia rauka roa ta te tamariki katoa a Iseraela ra tuanga. 19 Kare oki matou e noo katoa i roto ia ratou i tera pae Ioridana; kia riro mai ta matou tuanga i teia pae Ioridana, i te pae i te itinga o te rā nei.

20 Kua karanga aturā Mose kia ratou, Kia pera kotou na, kia na mua kotou ia Iehova ma te taoonga tamaki katoa i te aerenga ki te tamaki:

21 Kia na mua kotou katoatoa ia Iehova i te aere ki tetai pae Ioridana, ma te taoonga tamaki katoa, e kia pueurikiriki ke tona au enemi iaia ki vao ra,

22 E pou ake taua enua ra ki mua i te aroaro o Iehova; ka oki mai ïa kotou i reira, ma te ara kore ki mua ia Iehova, e ki mua katoa ia Iseraela; e no kotou teianei enua ei nooanga ki mua i te aroaro o Iehova.

23 Kia kore ra kotou e akapera ra, i na, kua ara ïa kotou ia Iehova ra; kia kite tikai kotou e, ka rokoia kotou e ta kotou ara.

24 Ka akatu i te oire no ta kotou au tamariki, e te koro no ta kotou au anana: e te tuatua ta to kotou au vaa i tuatua maira, e rave.

25 Kua tuatua maira taua tamariki a Gada ra, e te tamariki a Reubena, kia Mose, na ko maira, Ka pera toou au tavini i ta taku pu e akaue mai na.

26 Ta matou au tamariki, ta matou au vaine, te au anana katoa, e te au puaka, ei roto ïa i te au oire i Gileada:

27 Ka aere ra toou au tavini ki tera pae vai, te tangata katoa ma te taoonga tamaki katoa, ki mua i te aroaro o Iehova ei tamaki, ta taku pu e tuatua mai na. 28 Kua ikuiku iorā Mose ia Eleazara taunga, e ia Iosua te tamaiti a Nuna ra, e te aronga mataiapo tutara no te au kopu tamariki a Iseraela ra, ia ratou:

29 Kua karanga aturā Mose kia ratou, Kia aere katoa te tamariki a Gada, e te tamariki a Reubena, te au tangata ravarai ma te taoonga tamaki, ma kotou ki mua i te aroaro o Iehova, ki tetai pae Ioridana, e eke iora te enua ki mua ia kotou; ei reira kotou ka apai atu ei i te enua ra ko Gileada no ratou ei nooanga:

30 Kia kore ra ratou e tae katoa ki tetai pae Ioridana, ma te taoonga tamaki katoa, ei roto katoa ia kotou na ta ratou ra tuanga i te enua ra i Kanaana. 31 Kua tuatua maira te tamariki a Gada, e te tamariki a Reubena, na ko maira, Ko ta Iehova i tuatua mai ki to au tavini nei, ko ta matou ïa e rave.

32 E na mua matou ia Iehova ma te taoonga tamaki katoa ki te enua ra ki Kanaana, ei ko nei ra ta matou ra tuanga i to matou kainga, ei teia pae Ioridana.

33 Kua oronga aturā Mose i te basileia o te ariki o te ngati Amori ra, ko Sihona, e te basileia o te ariki o Basana ra, ko Oga, no te tamariki a Gada, e no te tamariki a Reubena, e no tetai pae i te kopu o Manase te tamaiti a Iosepha ra; te enua, e te au oire i roto i te au kotinga ra, e te au oire no te enua e pini ua ake. 34 E kua patu akera te tamariki a Gada i te oire ra, ko Dibona, e ko Atarota, e ko Aroera, 35 E ko Aterota, ko Sophana, e ko Iazera, e ko Iogebeha,

36 E ko Bete-nimera, e ko Beteharana, e aronga oire patu ïa; e kua rave katoa i te koro no te au mamoe. 37 E kua patu te tamariki a Reubena ia Hesebona, e ko Eleale, e ko Kiriataima,

38 E ko Nebo, e ko Baalameona, (kua akaingoa keia taua au oire ra,) e ko Sibema, e kua tapa atura i te ingoa ou i taua au oire ta ratou i patu ra. 39 E aere atura te tamariki a Makira te tamaiti a Manase ra ki Gileada, e pou iora ïa ia ratou, eke iora te ngati Amori i noo i reira.

40 Oronga aturā Mose ia Gileada kia Makira te tamaiti a Manase ra; noo iora i reira.

41 E kua aere iorā Iaira te tamaiti a Manase ra, kua rave iora i te au vila, tapa iora te ingoa ko Havotaiaira. 42 Kua aere iorā Noba, kua rave iora i te oire ra ko Kenata, e to reira oki au vila, tapa iora oki i te ingoa ko Noba, tona uaorai ingoa.